ఏపీలో తొలిరోజు 229 నామినేషన్లు

ఈనాడు డిజిటల్‌, అమరావతి: రాష్ట్రంలో తొలిరోజు లోక్‌సభ స్థానాలకు 39 నామినేషన్లు, శాసనసభ స్థానాలకు 190 నామినేషన్లు దాఖలయ్యాయి. సార్వత్రిక ఎన్నికలకు సంబంధించి గురువారం ఉదయం నోటిఫికేషన్‌ విడుదలైంది. ఆ వెంటనే నామినేషన్ల స్వీకరణ ప్రారంభమైంది. మంగళగిరి కూటమి అభ్యర్థిగా నారా లోకేశ్‌ తరఫున బీసీ, ఎస్సీ, ఎస్టీ, మైనారిటీ నేతలు రెండు సెట్ల నామినేషన్‌ పత్రాలు దాఖలు చేశారు.

భీమిలి కూటమి అభ్యర్థిగా మాజీ మంత్రి గంటా శ్రీనివాసరావు, తిరుపతి వైకాపాఅభ్యర్థిగా భూమన అభినయ్‌రెడ్డి, తాడిపత్రి వైకాపా అభ్యర్థిగా కేతిరెడ్డి పెద్దారెడ్డి, శ్రీశైలం వైకాపా అభ్యర్థిగా శిల్పా చక్రపాణిరెడ్డి, ఎమ్మిగనూరు వైకాపా అభ్యర్థిగా బుట్టా రేణుక, విజయవాడ పశ్చిమ కూటమి అభ్యర్థిగా యలమంచిలి సత్యనారాయణచౌదరి, విశాఖ లోక్‌సభ స్థానానికి ప్రజాశాంతి పార్టీ అధ్యక్షుడు కేఏ పాల్‌ నామినేషన్‌ పత్రాలు సమర్పించారు.