NDA: బిహార్‌లో ‘ఎన్డీయే’ సీట్ల పంపకం పూర్తి.. అధిక స్థానాల్లో భాజపా పోటీ

పట్నా: లోక్‌సభ ఎన్నికల (Lok Sabha Elections)కు బిహార్‌లో ఎన్డీయే(NDA) భాగస్వామ్య పార్టీల మధ్య సీట్ల పంపకం పూర్తయింది. రాష్ట్రంలో మొత్తం 40 లోక్‌సభ స్థానాలు ఉండగా.. అత్యధికంగా భాజపా 17 స్థానాల్లో పోటీ చేయనుంది. ఇకపోతే సీఎం నీతీశ్ కుమార్‌కు చెందిన జేడీయూ 16, చిరాగ్‌ పాసవాన్‌కు చెందిన ఎల్‌జేపీ (రాంవిలాస్‌) పార్టీ ఐదు స్థానాల్లో పోటీ చేసేందుకు అంగీకారం కుదిరింది. మిగతా రెండు ఎన్డీయే భాగస్వామి పార్టీలైన హిందుస్థానీ అవామ్‌ మోర్చా, ఉపేంద్ర కుష్వాహాకు చెందిన రాష్ట్రీయ లోక్‌ మంచ్‌ పార్టీ చెరో ఒక్కో స్థానాల్లో పోటీ చేస్తాయని భాజపా బిహార్‌ రాష్ట్ర వ్యవహారాల ఇన్ ఛార్జి  వినోద్‌ తాడ్వే వెల్లడించారు. ఈమేరకు ఆయన ఎన్డీయే భాగస్వామి పార్టీల నేతలతో కలిసి దిల్లీలో మీడియా సమావేశంలో మాట్లాడారు.

చిరాగ్‌ పాసవాన్‌ హాజీపూర్‌ సీటు నుంచి పోటీ చేస్తారని ఆ పార్టీ నేత రాజు తివారీ వెల్లడించారు. ఎల్జేపీలో మరో వర్గం నేత, కేంద్రమంత్రి పశుపతి పరాస్‌ వర్గానికి ఈ సీట్ల పంపకంలో ఎలాంటి ప్రాధాన్యం కల్పించకపోవడం గమనార్హం. అయితే, ఆయనతో భాజపా రాష్ట్ర అధ్యక్షుడు సామ్రాట్‌ చౌదరి చర్చలు జరుపుతున్నట్లు సమాచారం.