పెట్టుబడుల పేరుతో ఆన్‌లైన్‌లో ఘరానా మోసం.. రూ.300 కోట్లు టోకరా

ఆన్‌లైన్‌ యాప్‌లో ఓ వ్యక్తి.. పెద్ద మొత్తంలో పెట్టుబడులు పెట్టి మోసపోయాడు. ఫిర్యాదు అందుకున్న పోలీసులు మోసాన్ని ఛేదించారు. నిందితుల ఖాతాల్లోని లావాదేవీల వివరాలు చూసి షాక్‌ అయ్యారు. సుమారు రూ.300 కోట్లకు టోకరా వేసినట్లు గుర్తించారు. ఈ సంఘటన హరియాణాలో వెలుగు చూసింది. హిసార్‌లోని పటేల్‌నగర్‌కు చెందిన చంద్రశేఖర్‌ విన్‌మనీ అనే మొబైల్‌ గేమింగ్‌ యాప్‌లో రూ.లక్షలు పెట్టుబడి పెట్టానని, అయితే ఆ డబ్బు తిరిగి రాలేదని ఫిర్యాదు చేశాడు. విన్‌మనీ యాప్‌లో ఫిర్యాదుదారుడు డిపాజిట్‌ చేసిన డబ్బు ..మహారాష్ట్రలోని ఓ బ్యాంకు ఖాతాకు వెళ్లిందని, ఆపై ఒడిశాలోని బ్యాంకు ఖాతాలో జమ అయిందని పోలీసులు తేల్చారు. ఈ మోసానికి సంబంధించి చైనా, దుబాయ్‌లలోని ముఠాలకు కూడా సంబంధాలు ఉన్నట్లు సమాచారం. నిందితుల్లో ఒకడైన ఆకాశ్‌కు జైపుర్‌లో 13 బ్యాంక్‌ ఖాతాలున్నట్లు విచారణలో తేల్చారు. మరో నిందితుడు సచిన్‌ గుడాలియా ఖాతా నుంచి రూ.300 కోట్ల లావాదేవీలు జరిగినట్లు పోలీసులు గుర్తించారు.