ICC: బౌలింగ్‌ ఆలస్యం చేస్తే 5 పరుగుల పెనాల్టీ

అహ్మదాబాద్‌: ఆట వేగాన్ని పెంచేందుకు వన్డే, టీ20 క్రికెట్లో ప్రయోగాత్మకంగా స్టాప్‌ క్లాక్‌ను ప్రవేశపెట్టాలని ఐసీసీ నిర్ణయించింది. ఓవర్‌ పూర్తయిన 60 సెకన్లలో లోపు తర్వాతి ఓవర్‌ను మొదలెట్టడంలో ఫీల్డింగ్‌ జట్టు మూడోసారి విఫలమైతే ఆ జట్టుకు 5 పరుగుల పెనాల్టీ విధిస్తారు. మంగళవారం ఐసీసీ బోర్డు సమావేశంలో ఈ నిర్ణయం తీసుకున్నారు. ‘‘వన్డే, టీ20 క్రికెట్లో డిసెంబరు 2023 నుంచి ఏప్రిల్‌ 2024 వరకు ప్రయోగాత్మకంగా స్టాప్‌ క్లాక్‌ను ఉపయోగించాలని సమావేశంలో నిర్ణయించారు. ఓవర్ల మధ్య సమయం వృథా కాకుండా చూడాలన్నదే ఉద్దేశం’’ అని ఐసీసీ ఓ ప్రకటనలో తెలిపింది. అంతర్జాతీయ క్రికెట్‌ నుంచి పిచ్‌ను నిషేధించే నిబంధనల్లో కూడా ఐసీసీ మార్పులు చేసింది. అయిదేళ్ల కాలంలో ఒక పిచ్‌ 5 అయోగ్యతా పాయింట్లు పొందితే నిషేధానికి గురయ్యేది. ఇప్పుడు ఆ పాయింట్లను ఆరుకు పెంచినట్లు ఐసీసీ తెలిపింది.