ఆ కుర్రాళ్లు చాలా తుంటరులు... వాళ్లతో ఆడడాన్ని ఆస్వాదించా: రోహిత్‌ శర్మ

దిల్లీ: ఇంగ్లాండ్‌తో సిరీస్‌లో అరంగేట్ర కుర్రాళ్లలో కలిసి ఆడడాన్ని ఆస్వాదించానని టీమ్‌ఇండియా కెప్టెన్‌ రోహిత్‌ శర్మ అన్నాడు. వారి అరంగేట్రం భావోద్వేగాన్ని కలిగించిందని చెప్పాడు. ఇంగ్లాండ్‌తో సిరీస్‌ ద్వారా రజత్‌ పటీదార్‌, ధ్రువ్‌ జురెల్‌, సర్ఫరాజ్‌ఖాన్‌, ఆకాశ్‌ దీప్‌, దేవ్‌దత్‌ పడిక్కల్‌ తమ అంతర్జాతీయ కెరీర్‌ను ఆరంభించిన సంగతి తెలిసిందే.

‘‘వాళ్లతో ఆడడాన్ని ఆస్వాదించా. ఆ కుర్రాళ్లు చాలా తుంటరులు. వాళ్లలో చాలా మంది నాకు బాగా తెలుసు. వారి బలాలు, వాళ్లు ఎలా ఆడాలనుకుంటారో తెలుసు. వాళ్లు ఎంత మంచి ఆటగాళ్లో చెప్పడం, గతంలో ఎంత బాగా రాణించారో చెప్పడం ద్వారా వారిని ప్రోత్సహించడం నా బాధ్యత. వాళ్లు స్పందించిన తీరు అద్భుతం’’ అని రోహిత్‌ అన్నాడు. ‘‘ఈ అరంగేట్ర కుర్రాళ్లతో ఆడుతూ మైమరిచిపోయా. వాళ్ల తల్లిదండ్రులూ అక్కడే ఉన్నారు. ఎంతో భావోద్వేగం. ఆ కుర్రాళ్ల అరంగేట్రాన్ని చూడడం ఎంతో సంతోషాన్నిచ్చింది. నేను కుర్రాడిగా ఉన్నప్పుడు కంగా లీగ్‌లో సర్ఫరాజ్‌ తండ్రితో కలిసి ఆడా’’ అని చెప్పాడు.