Mohammed Shami: రంజీ ట్రోఫీలో అదరగొడుతున్న షమీ.. మళ్లీ జాతీయ జట్టులోకి వస్తాడా?

ఇంటర్నెట్ డెస్క్: టీమ్‌ఇండియాలో తిరిగి చోటు దక్కించుకోవాలనే లక్ష్యంతో రంజీ ట్రోఫీ (Ranji Trophy) బరిలోకి దిగిన సీనియర్ పేసర్ మహ్మద్ షమీ (Mohammed Shami) అదరగొడుతున్నాడు. బెంగాల్ తరఫున ఆడుతున్న షమీ.. ఎలైట్ గ్రూప్‌ సిలో ఈడెన్ గార్డెన్స్‌ వేదికగా గుజరాత్‌తో జరిగిన మ్యాచ్‌లో రెండు ఇన్నింగ్స్‌ల్లో కలిపి ఎనిమిది వికెట్లు పడగొట్టాడు. తొలి ఇన్నింగ్స్‌ల్లో (3/44)తో మెరిసిన ఇతను.. రెండో ఇన్నింగ్స్‌లో (5/61) ఐదు వికెట్ల ప్రదర్శన చేశాడు. దీంతో గుజరాత్‌ను బెంగాల్‌ 141 పరుగుల తేడాతో ఓడించి వరుసగా రెండో విజయాన్ని నమోదు చేసింది. ఇదే రంజీ ట్రోఫీలో ఉత్తరాఖండ్‌తో జరిగిన పోరులో షమీ ఏడు వికెట్లు పడగొట్టి ప్లేయర్ ఆఫ్‌ ది మ్యాచ్‌గా నిలిచాడు.

• స్కై జోరు పెంచాల్సిందే: సూర్య నెత్తిన.. వేలాడుతున్న గిల్‌ కత్తి

35 ఏళ్ల షమీ భారత్ తరఫున చివరగా ఛాంపియన్స్ ట్రోఫీలో ఆడాడు. ఆ తర్వాత ఏ ఫార్మాట్‌లోనూ జాతీయ జట్టుకు ఎంపిక కాలేకపోతున్నాడు. ఫిట్‌నెస్ సమస్యల దృష్ట్యా అతడిని పక్కనపెడుతున్నారనే వాదన ఉంది. ఇటీవల ఆస్ట్రేలియాతో పరిమిత ఓవర్ల సిరీస్‌ల్లోనూ చోటు దక్కకపోవడంపై షమీ సెలక్టర్లు, టీమ్‌మేనేజ్‌మెంట్‌పై విమర్శలు చేశాడు. రంజీ మ్యాచ్‌లు ఆడేందుకు సరిపోయే ఫిట్‌నెస్.. వన్డేలు ఆడటానికి సరిపోదా? అని సెలక్టర్లను ప్రశ్నించాడు. రంజీల్లో చేస్తున్న ప్రదర్శన చూసైనా షమీని జట్టులోకి తీసుకోవాలని ఫ్యాన్స్ అభిప్రాయపడుతున్నారు. నవంబర్ 14 నుంచి సౌతాఫ్రికాతో భారత్ రెండు టెస్టులు ఆడనుంది. తొలి మ్యాచ్‌లో ఈడెన్ గార్డెన్స్‌లో, రెండో మ్యాచ్‌ నవంబర్ 22 నుంచి గువాహటిలో జరగనుంది. ఈ సిరీస్‌ కోసం త్వరలో జట్టును ప్రకటించనున్నారు. మరి ఇటీవల ఈడెన్‌లో మెరిసిన షమీని సఫారీలతో టెస్టులకు ఎంపిక చేస్తారో లేదో చూడాలి.