Sunil Gavaskar: టీమ్‌ఇండియా ముందున్న ఏకైక సమస్య అదే..

ఇంటర్నెట్‌ డెస్క్: విరాట్ కోహ్లీ అద్భుత బ్యాటింగ్‌, హార్దిక్‌ పాండ్య సమయోచిత ఇన్నింగ్స్‌తో పాక్‌పై భారత జట్టు విజయం సాధించి ఈ టీ20 ప్రపంచకప్‌లో భారత్‌ ఘనంగా బోణీ కొట్టింది. అయితే, కొద్దిరోజులుగా విఫలమవుతూ వచ్చిన కెప్టెన్‌ రోహిత్‌ శర్మ ఈ మ్యాచ్‌లోనూ రాణించలేదు. 7 బంతులు ఎదుర్కొని కేవలం 4 రన్స్‌ మాత్రమే చేసి ఔటయ్యాడు. మరో ఓపెనర్‌ రాహుల్‌ సైతం నాలుగు పరుగులే చేశాడు. కానీ ఈ మ్యాచ్‌లో విజయంతో ఈ విషయంపై ఎవరూ మాట్లాడలేదు. కాగా ఈ అంశంపై భారత మాజీ కెప్టెన్‌, క్రికెట్‌ విశ్లేషకుడు సునీల్‌ గావస్కర్‌ తాజాగా స్పందించాడు. రోహిత్ శర్మ ఫామ్ కోల్పోవడం టీమ్ఇండియాను ఆందోళనకు గురిచేస్తోందని గవాస్కర్ అభిప్రాయపడ్డాడు. ఈ సమస్యను వెంటనే పరిష్కరించుకోవాల్సిన అవసరం ఉందన్నాడు.

‘ప్రస్తుతం జట్టులో ఉన్న ఏకైక సమస్య రోహిత్‌ శర్మ ఫామ్‌. కొద్దిరోజులుగా అతడి స్థాయికి తగినట్లు ఆడటంలేదు. అతడు ఆడితే ఇతరులకు బ్యాటింగ్ చేయడం ఎంతో సులువవుతుంది. మంచి ఓపెనింగ్‌ ఇస్తే ఆ తర్వాత వచ్చే బ్యాటర్లపై ఒత్తిడి ఉండదు. వచ్చీ రాగాగే మొదటి బంతి నుంచే హిట్టింగ్‌ చేసే అవకాశం ఉంటుంది. ఫలితంగా మంచి స్కోర్‌ సాధించవచ్చు’ అని అన్నాడు. తదుపరి జరిగే మ్యాచ్‌ల్లో మొదటి 6 ఓవర్లలో వికెట్ కోల్పోకుండా ఉంటడమే కీలకం అని వ్యాఖ్యానించాడు. నెమ్మదిగా బ్యాటింగ్‌ చేసినా.. వికెట్‌ కాపాడుకోవాల్సిన అవసరం ఉందని గావస్కర్‌ సూచించాడు. కాగా భారత్‌ గురువారం తన తదుపరి మ్యాచ్‌లో నెదర్లాండ్స్‌తో తలపడనుంది.