Sat, February 06, 2016

Type in English and Give Space to Convert to Telugu

'గులాబీ.. సునామీ''మాట నిలబెట్టుకుంటాం''నౌకా సంరంభం నేడే''కక్షతోనే పార్లమెంటులో రగడ!''వ్యూహాత్మక విజయం''ఆఖర్లో వచ్చారు.. అదరగొట్టారు!''సమర సేనాని''పర్యాటకులకు మణిహారం''ముద్రగడ ఆమరణ దీక్ష''హైదరాబాద్‌లో మరో రెండు పెద్దాసుపత్రులు'
గ్రామస్థాయి ఉద్యోగులంతా ఒకే కార్యాలయంలో
14 శాఖల సిబ్బందికి ఒకే భవనం
ఈసేవ, మీసేవలు కూడా అక్కడే
పంచాయతీల్లో 7200 గ్రామ సమూహాలు
ఏపీ ఉన్నతాధికారుల కసరత్తు
ఈనాడు - హైదరాబాద్‌
ప్రభుత్వ శాఖలు ఏ కార్యక్రమం చేసినా అంతిమంగా చేరాల్సింది కిందనున్న ప్రజలకే. అందులోను అత్యధిక శాతం నివసించే గ్రామీణ ప్రజలకే. అయితే పదుల సంఖ్యలో ఉన్న శాఖలు ఏ శాఖకు ఆ శాఖపరంగా... వేటి పని అవి చేసుకుంటూ పోతున్నాయి. ఆయా శాఖల్లో పై నుంచి కింది వరకూ అజమాయిషీ ఉంటున్నా... గ్రామ పంచాయతీ పరిధిలో మాత్రం ఆయా శాఖల మధ్య సమన్వయం లేదు. అన్ని శాఖల కార్యకలాపాలు గ్రామాల్లో జరుగుతున్నా...వాటిని ఏకీకృతం చేసి సమన్వయం చేసే వ్యవస్థ లేదు. ప్రజలందరికీ ఒకే వేదిక మీద, ఒకే కార్యాలయంలో అన్ని విభాగాల సేవలు అందే అవకాశమూ ప్రస్తుతం లేదు. ఈ వ్యవస్థను మార్చి ప్రజలకు అందిస్తున్న వివిధ విభాగాల సేవలన్నింటినీ సమన్వయం చేస్తూ ఒక వేదికపైకి తేవాలని ఏపీ ప్రభుత్వం ఆలోచిస్తోంది. ప్రతి విభాగం ఇప్పటిలా వేటికవి స్వతంత్రంగా ఉంటూనే... గ్రామస్థాయిలో మాత్రం ఒక సమన్వయంతో వ్యవహరించేలా చేసేలా మార్పులు తేబోతున్నారు. అన్ని రకాల సేవలు ఒకే వేదికపై లభించేలా చేయడమే దీని లక్ష్యం. ఇప్పటికే ఈ విధానంపై అన్ని శాఖల ముఖ్య కార్యదర్శుల మధ్య జరిగిన సమావేశంలో సుముఖత వ్యక్తమైందని సమాచారం. అయితే ప్రభుత్వం దీనికి ఇంకా తుది ఆమోదం తెలపాల్సి ఉంది.

ప్రతి 5 వేల జనాభాకు ఒక సమూహం: రాష్ట్రంలో దాదాపుగా 13 వేల గ్రామ పంచాయతీలు ఉన్నాయి. జనాభా ప్రాతిపదికగా ఇప్పుడు కొత్తగా గ్రామ పంచాయతీ సమూహాలను ఏర్పాటు చేయాలని అనుకుంటున్నారు. గిరిజన ప్రాంతాల్లో అయితే 2,500 జనాభా, మిగతా ప్రాంతాల్లో 5 వేల మంది జనాభాను దీనికి ప్రాతిపదికగా తీసుకోనున్నారు. ఉదాహరణకు ఒక పంచాయతీలో 2 వేల మంది జనాభా, మరో పంచాయతీలో 2 వేల మంది జనాభా, మరో పంచాయతీలో వెయ్యి మంది జనాభా ఉంటే... ఐదు వేల మందితో కూడిన ఈ మూడు గ్రామాలను కలిపి కలిపి ఒక సమూహంగా ఏర్పాటు చేస్తారు. గోదావరి జిల్లాల్లో పంచాయతీల్లో జనాభా కొంచెం ఎక్కువగా ఉండడంతో... అక్కడ రెండు గ్రామాలు కలిపితే ఒక సమూహం అవుతోంది. అదే అనంతపురం, చిత్తూరు లాంటి జిల్లాల్లో చాలాచోట్ల గ్రామాల్లో జనాభా తక్కువ ఉండడంతో ఒక్కో చోట ఐదారు గ్రామాల్ని కలిపితేనే ఐదువేల జనాభా అవుతున్నారు. ఒకవేళ ఒకే గ్రామంలో ఐదు వేలు, అంతకంటే ఎక్కువ మంది జనాభా ఉంటే ఆ గ్రామమే ఒక సమూహంగా ఉంటుంది.

14 శాఖల సిబ్బంది ఒకే వేదిక పైకి: ప్రతి సమూహానికి ఒక భవనం నిర్మిస్తారు. ఇప్పటికే భవనాలు ఉన్న చోట కాకుండా అవసరం ఉన్న చోటే వీటిని నిర్మిస్తారు. అదే సముదాయంలో గ్రామ పంచాయతీ పరిధిలో పనిచేసే వివిధ శాఖల సిబ్బందికి స్థానం కల్పిస్తారు. ఇప్పుడు ఏ పంచాయతీకి ఆ పంచాయతీ ఉండి, చిన్న చిన్న పంచాయతీలు ఉండడంతో... అన్నిచోట్ల అవసరమైన ప్రభుత్వ సిబ్బంది లేరు. అదే గ్రామ సమూహాలు ఏర్పాటు చేస్తే రెండు అంతకంటే ఎక్కువ గ్రామాలు కలుస్తాయి కాబట్టి... ప్రతి సమూహంలోనూ అన్ని శాఖల సిబ్బంది ఉంటారని అంచనా వేస్తున్నారు. పంచాయతీ కార్యదర్శి, గ్రామ రెవిన్యూ అధికారి, వ్యవసాయ విస్తరణాధికారి, వైద్య సేవలందించే ఏఎన్‌ఎం, అంగన్‌వాడీ సహాయకురాలు, నీటి అవసరాలు చూసే లష్కర్‌... ఇలా మొత్తం 14 మంది సిబ్బంది ప్రతి సమూహంలోను ఉంటారు. వీరందరినీ పంచాయతీ కార్యదర్శి సమన్వయం చేస్తారు. ఏ కార్యక్రమం నిర్వహించినా.. అవసరమైన మేరకు ఆయా శాఖల తోడ్పాటు తీసుకుంటారు. అయితే ఈ 14 మంది సిబ్బంది గ్రామ సముదాయం భవనంలోనే కూర్చుంటారని కాదు. ఎవరికి వారుగా పని చేసుకుంటూనే అవసరమైనప్పుడు సమన్వయంతో ఉండేందుకు ఈ కార్యాలయంలో అందరికీ చోటు కల్పిస్తారు. ప్రతి శాఖ ఉద్యోగి ఆ రోజు ఎక్కడెక్కడికి వెళ్తున్నారు? ఏ సేవలందిస్తున్నారన్న విషయాన్ని మాత్రం గ్రామ సమూహ కార్యాలయంలో నమోదు చేయాల్సి ఉంటుంది. ఇలాంటి ఏర్పాటు ప్రజలకు, అదే విధంగా ఉద్యోగులకు కూడా సౌలభ్యంగా ఉంటుందని భావిస్తున్నారు. మరో వైపు కొత్తగా ఏర్పాటు చేయాలనుకుంటున్న 7,200 గ్రామ సమూహాల్లోనూ ఈసేవ, మీసేవ కేంద్రాలను కూడా ఏర్పాటు చేస్తారు. ఇప్పటికే ఉన్న చోట వదిలేసి, మిగిలిన చోట్ల కొత్తగా ఈ కేంద్రాలను ప్రారంభిస్తారు. వీటిలో ఒక కంప్యూటర్‌ ఆపరేటర్‌ను ఉంచుతారు. ఆ గ్రామ సమూహంలోని వారందరికీ ఈసేవ, మీసేవ కేంద్రాలు మరింతగా అందుబాటులోకి వస్తాయి. మొత్తంగా ఆదర్శ పంచాయతీ వ్యవస్థను, ప్రజలందరికీ సత్వర సేవలందించే వ్యవస్థను ఏర్పాటు చేయాలని ఏపీ ప్రభుత్వం కసరత్తు చేస్తోంది.

జీన్స్‌ ప్రభ!

కొన్నిరోజులు వాడగానే జీన్స్‌ బిగుతైపోతాయి. అలాగని వాటిని పారేయలేం. ఎందుకంటే చూడ్డానికేమో కొత్తగా ఉంటాయి. అలాంటి జీన్స్‌నే రీసైకిల్‌ చేసి కొత్త ఉత్పత్తులుగా మార్కెట్‌లోకి...

బుల్డోజర్స్‌పై విజయం మాదే: అఖిల్‌

సినీతారల క్రికెట్‌ మ్యాచ్‌లకు అభిమానుల నుంచి విశేష స్పందన లభిస్తోందని తెలుగు వారియర్స్‌ జట్టుకు సారథ్యం వహిస్తున్న యువ కథానాయకుడు అఖిల్‌....

 
 
 
 
 
Copyright © 2014 Ushodaya Enterprises Pvt. Ltd., All Rights Reserved.
For Digital Marketing enquiries contact 9000180611 or Mail :Marketing@eenadu.net