Sat, February 06, 2016

Type in English and Give Space to Convert to Telugu

'గులాబీ.. సునామీ''మాట నిలబెట్టుకుంటాం''నౌకా సంరంభం నేడే''కక్షతోనే పార్లమెంటులో రగడ!''వ్యూహాత్మక విజయం''ఆఖర్లో వచ్చారు.. అదరగొట్టారు!''సమర సేనాని''పర్యాటకులకు మణిహారం''ముద్రగడ ఆమరణ దీక్ష''హైదరాబాద్‌లో మరో రెండు పెద్దాసుపత్రులు'
ఇది మరో ఎమ్మార్‌ ప్రాజెక్టే!
బొటానికల్‌ గార్డెన్‌పై హైకోర్టులో తెలంగాణ సర్కారు కౌంటర్‌
హైదరాబాద్‌లోని బొటానికల్‌ గార్డెన్‌ ప్రాజెక్టు ‘మరో ఎమ్మార్‌ ప్రాజెక్టే’నని తెలంగాణ సర్కారు పేర్కొంది. ఈ ప్రాజెక్టు వ్యవహారంలో నిబంధనలకు నిలువునా పాతరేశారని నిగ్గుతేల్చింది. హైటెక్‌ సిటీకి కూతవేటు దూరంలో ఉన్న రూ.6850 కోట్ల విలువైన బొటానికల్‌ గార్డెన్‌ను కొన్నేళ్ల కిందట అప్పటి కాంగ్రెస్‌ సర్కారు ఎకో టూరిజం పేరిట మూడు ప్రైవేటు సంస్థలకు కట్టబెట్టింది. ఈ మొత్తం వ్యవహారంలో జరిగిన అక్రమాలను ‘ఈనాడు’ వరస కథనాలతో వెలుగులోకి తెచ్చింది. నాడు ‘ఈనాడు’ చెప్పిన అంశాలనే నేడు తెలంగాణ సర్కారు కూడా ధ్రువీకరించింది. నిబంధనలను తుంగలో తొక్కి ప్రైవేటు వ్యక్తులకు లబ్ధి చేకూర్చేందుకే ఈ ప్రాజెక్టును చేపట్టారని స్పష్టంచేసింది. ఈ ప్రాజెక్టు వల్ల మహానగరానికి, భావి తరాలకు ఎదురయ్యే దుష్పరిణామాలను కూలంకషంగా వివరిస్తూ తెలంగాణ ప్రభుత్వం బుధవారం హైకోర్టులో కౌంటర్‌ దాఖలు చేసింది. తగు ఆదేశాలు జారీ చేయాలని న్యాయస్థానాన్ని అభ్యర్థించింది.
నిబంధనలు తుంగలో తొక్కారు
ప్రైవేటు వ్యక్తులకు లబ్ధి చేకూర్చేందుకే రూపొందించారు
అప్పణంగా రూ.6850 కోట్ల స్థలాన్ని కట్టబెట్టారు
ఈ ప్రాజెక్టు పర్యావరణానికి గొడ్డలిపెట్టు
‘ఈనాడు’ ఆనాడే చెప్పింది
ఈనాడు, సిటీబ్యూరో ప్రధాన ప్రతినిధి
‘‘నిబంధనలను తుంగలో తొక్కారు.. చట్టాలను బుట్టదాఖలు చేశారు.. హైదరాబాద్‌ నగరంలో రూ.6850 కోట్ల విలువైన 274 ఎకరాల బొటానికల్‌ గార్డెన్‌ను ప్రైవేటు సంస్థలకు కట్టబెట్టారు.. ఆయా సంస్థలు ప్రత్యామ్నాయ భూమి కోసం ప్రభుత్వానికి ఇచ్చింది కేవలం రూ.10.20 కోట్లు. ఈ ప్రాజెక్టు సీబీఐ విచారణ చేస్తున్న ఎమ్మార్‌ ప్రాజెక్టును తలపిస్తోంది’’
-బొటానికల్‌ గార్డెన్‌ను ప్రైవేటు సంస్థలకు అప్పగించడంపై న్యాయస్థానానికి సమర్పించిన కౌంటర్‌లో తెలంగాణ ప్రభుత్వం చేసిన వ్యాఖ్యలివి.

హైటెక్‌ సిటీకి కూతవేటు దూరంలో ఉన్న రూ.వేల కోట్ల విలువైన బొటానికల్‌ గార్డెన్‌ను కొన్నేళ్ల కిందట అప్పటి కాంగ్రెస్‌ సర్కారు ఎకో టూరిజం పేరిట మూడు ప్రైవేటు సంస్థలకు కట్టబెట్టింది. ఈ మొత్తం వ్యవహారంలో జరిగిన అక్రమాలను ‘ఈనాడు’ వరస కథనాలతో వెలుగులోకి తెచ్చింది. అవే అంశాలను ఇప్పుడు రాష్ట్ర ప్రభుత్వం కూడా ధ్రువీకరించింది. ఈ ప్రాజెక్టు ఏర్పాటును సవాల్‌ చేస్తూ హైదరాబాద్‌కు చెందిన లుంబినీ ఎస్‌ఎల్‌ఎన్‌ స్ప్రింగ్స్‌ వెల్ఫేర్‌ అసోసియేషన్‌ అధ్యక్షుడు ఎ.కృష్ణారెడ్డి ఉమ్మడి హైకోర్టులో ప్రజాప్రయోజన వ్యాజ్యం దాఖలు చేశారు. ఈ పిటిషన్‌పై ఉమ్మడి హైకోర్టు ఆదేశాల మేరకు తెలంగాణ రాష్ట్ర ప్రభుత్వం తరఫున అటవీ, పర్యావరణ శాఖ ముఖ్యకార్యదర్శి రేమండ్‌ పీటర్‌ బుధవారం కౌంటర్‌ దాఖలు చేశారు. ఈ ప్రాజెక్టు వల్ల మహానగరానికి, భావి తరాలకు ఎదురయ్యే దుష్పరిణామాలను కూలంకషంగా వివరిస్తూ తగిన ఆదేశాలు జారీ చేయాలని కోర్టును అభ్యర్థించారు. 

కొత్తగూడలో కొండలు, గుట్టలు, పచ్చదనం, జంతువులతో కూడిన రక్షిత అటవీ ప్రాంతాన్ని మొదట్లో పర్యావరణ ప్రాజెక్టుగా మూడు సంస్థలకు ఇవ్వాలని భావించారు. కానీ, తర్వాత వచ్చిన కాంగ్రెస్‌ ప్రభుత్వం నిబంధనలకు విరుద్ధంగా ఈ ప్రాజెక్టును పూర్తిగా మూడు ప్రైవేటు సంస్థలకు కట్టబెట్టింది.

బొటానికల్‌ గార్డెన్‌ ప్రాజెక్టు కింద అభివృద్ధి చేయడానికి డెలీరా టూరిజం ప్రాజెక్టు కోసం 51.83 హెక్టార్ల రక్షిత అడవితో పాటు 6.5 ఎకరాల రెవెన్యూ భూమిని కేటాయించారు. నైట్‌ సఫారీ ఎకో టూరిజం ప్రాజెక్టు కింద 45.61 హెక్టార్లను ట్రాక్‌ ఇండియా సంస్థకు ఇచ్చారు. బర్డ్‌పార్కు ఎకో టూరిజం ప్రాజెక్టు కింద 12.43 హెక్టార్లను హైదరాబాద్‌ బర్డ్‌ పార్కు అండ్‌ గార్డెన్‌ సంస్థ (ముంబయి)కు కేటాయించారు. ఈ మూడు ప్రాజెక్టుల్లో భాగంగా అరుదైన వృక్షాలు, పక్షులు, జంతువులను ఇక్కడ పెంచాల్సి ఉంది. కానీ, 274 ఎకరాల్లో ఎనిమిది సినిమా థియేటర్లతో పాటు అనేక భారీ భవనాలు నిర్మించడానికి అనుమతి ఇచ్చారు. దీంతో నిబంధనలను తుంగలో తొక్కి ఇక్కడ చెట్లను నరికి, జంతువులను తరలించి నిర్మాణాలను ప్రారంభించారు. ఈ మొత్తం వ్యవహారాన్ని ‘ఈనాడు’ వెలుగులోకి తీసుకురావడంతో స్థానికులు ఆందోళన ప్రారంభించారు. ఈ నేపథ్యంలో హైకోర్టు ఆదేశం మేరకు ప్రభుత్వం నివేదికను రూపొందించింది. ఈ ప్రాజెక్టును అక్రమాల పుట్టగా తేల్చింది. ప్రభుత్వ కౌంటర్‌లోని వివరాలు..

ఎంత దారుణం!
* ఈ పర్యావరణ- పర్యాటక ప్రాజెక్టు ప్రభుత్వం, ప్రజల ప్రయోజనాలకు ఉద్దేశించింది కాదు. మౌలిక ఖర్చులు, ఆదాయాలను పరిగణనలోకి తీసుకోలేదు. లాభదాయకతను చేకూర్చే అంశంలో రాష్ట్రానికి తీవ్ర నష్టం వాటిల్లనుంది. కొంతమంది ప్రైవేటు వ్యక్తులకు లబ్ధి చేకూర్చడం కోసం ఈ ప్రాజెక్టు రూపకల్పన జరిగింది. ఈ ప్రైవేటు సంస్థలు నిర్మించే స్థలాన్ని ఇతరులకు భారీ మొత్తాలకు విక్రయించి రూ.కోట్లు కొల్లగొట్టడానికి ప్రయత్నిస్తున్నాయి. ఈ మూడు సంస్థలు ప్రభుత్వానికి చెల్లించే మొత్తం నామమాత్రంగానే ఉంది. ప్రస్తుతం సీబీఐ దర్యాప్తు చేస్తున్న ఎమ్మార్‌ ప్రాపర్టీస్‌ కేసులాగానే ఈ ప్రాజెక్టు కూడా ఉంది.
* భావి తరాల కోసం కొత్తగూడ రక్షిత అటవీ ప్రాంతాన్ని పర్యావరణ ఆస్తిలా రక్షించాల్సిన అవసరం ఉంది. ఇది రాజ్యాంగంలోని 21, 48ఏ, 51ఏ(జీ) అధికరణల కింద జీవించే హక్కులకు భంగం కలిగించడమే. హైదరాబాద్‌ నగర వాసులకు ఈ రక్షిత అటవీ ప్రాంతం అరుదైన పర్యావరణ ఆస్తి. దీని విలువను లెక్కించలేం. భవిష్యత్తు తరాల కోసం దీన్ని రక్షించాల్సిన బాధ్యత, వారికి మెరుగైన జీవితం అందించాల్సిన అవసరం ప్రభుత్వంపై ఉంది.
* ఈ ప్రాజెక్టు అటవీ ప్రాంతాన్ని ధ్వంసం చేయడమే కాకుండా అశాంతిని సృష్టిస్తోంది. అటవీ ప్రాంతం విధ్వంసం పర్యావరణ సమతుల్యాన్ని దెబ్బతీస్తోంది. ఇక్కడ ఎకరం కనీస ధర రూ.25 కోట్లు పలుకుతోంది. ఈ 274 ఎకరాల విలువ రూ.6850 కోట్లు. ఇంత విలువైన భూమికి ప్రత్యామ్నాయంగా చిత్తూరు జిల్లాలో ప్రభుత్వానికి చెందిన అంతే భూమిని అటవీపరంగా అభివృద్ధి చేయడానికి కేవలం రూ.10.20 కోట్లను ఈ మూడు సంస్థలు చెల్లించాయి. అక్కడ భూమిని ఇవ్వడం ద్వారా బొటానికల్‌ గార్డెన్‌లో 4డీ, 2డీ, 3డీ థియేటర్లు, హోటళ్లు, వాణిజ్య సముదాయాలను నిర్మించుకోవడానికి హక్కులను కల్పించారు. 
* బొటానికల్‌ గార్డెన్‌లో సందర్శకులకు ఆహ్లాదాన్ని కలిగించేలా ఇక్కడ పచ్చదనాన్ని పెంపొందించడం కోసమే ఈ ఎకో టూరిజం ప్రాజెక్టును రూపొందించాలని మొదట్లో భావించారు. కానీ, మూడు సంస్థలకు లబ్ధి చేకూరేలా తర్వాత షరతులను సడలించారు. తద్వారా థియేటర్లు, హోటళ్లు, కన్వెన్షన్‌ సెంటర్లు, మల్టీప్లెక్సులను నిర్మించుకునే అవకాశం కల్పించారు. ఈ నిర్మాణాల వల్ల పర్యావరణంతో పాటు అటవీ ప్రాంతం మొత్తం ధ్వంసమవుతోంది. మటి,్ట జీవవైవిధ్యం తదితరాలను దెబ్బతీసేలా ఈ ప్రాజెక్టు ఉంది. పర్యావరణ సమతుల్యతకు ఈ ప్రాజెక్టు గొడ్డలి పెట్టు. హోటళ్లు ఇక్కడ చేపట్టాల్సిన అవసరమే లేదు.
* ఈ ప్రాజెక్టు ఏర్పాటు చట్టాలకు అనుగుణంగా జరగలేదు. నిర్దేశిత విధానాలు అవలంబించలేదు. ముఖ్యంగా అటవీ, పర్యావరణ చట్టాలను తుంగలో తొక్కారు. ఈ ప్రాజెక్టు అమలులో నిబంధనలను ఉల్లంఘించారని విజిలెన్సు, ఎన్‌ఫోర్సుమెంట్‌ కూడా విచారణలో తేల్చింది.

జీన్స్‌ ప్రభ!

కొన్నిరోజులు వాడగానే జీన్స్‌ బిగుతైపోతాయి. అలాగని వాటిని పారేయలేం. ఎందుకంటే చూడ్డానికేమో కొత్తగా ఉంటాయి. అలాంటి జీన్స్‌నే రీసైకిల్‌ చేసి కొత్త ఉత్పత్తులుగా మార్కెట్‌లోకి...

మనసంతా పొరుగు కథలపైనే!

మహేష్‌బాబు లాంటి ఒకరిద్దరు కథానాయకులు తప్ప దాదాపుగా మిగిలిన తెలుగు హీరోలందరూ రీమేక్‌ చిత్రాలపై మోజు ప్రదర్శించేవాళ్లే. పొరుగు భాషలో ఒక మంచి సినిమా...

 
 
 
 
 
Copyright © 2014 Ushodaya Enterprises Pvt. Ltd., All Rights Reserved.
For Digital Marketing enquiries contact 9000180611 or Mail :Marketing@eenadu.net