శ్రీవిష్ణు కథానాయకుడిగా అనిల్‌ రావిపూడి దర్శకత్వ పర్యవేక్షణలో   రూపొందుతోన్న చిత్రం ‘గాలి సంపత్‌’. అనీష్‌ దర్శకుడు. ఎస్‌.క్రిష్ణ నిర్మాత. నటుడు రాజేంద్ర ప్రసాద్‌ ప్రధాన పాత్ర పోషిస్తుండగా.. లవ్‌లీ సింగ్‌ కథానాయికగా నటిస్తోంది. ఈ చిత్రాన్ని మహా శివరాత్రి కానుకగా మార్చి 11న విడుదల చేస్తున్నట్లు చిత్ర బృందం ఆదివారం ప్రకటించింది. ఈ సందర్భంగా దర్శకుడు అనిల్‌ రావిపూడి మాట్లాడుతూ.. ‘‘అందర్నీ అలరించే వెరైటీ సినిమా ఇది. ఈ చిత్రానికి నేను స్క్రీన్‌ప్లే అందించడంతో పాటు దర్శకత్వ పర్యవేక్షణ చేస్తూ.. సమర్పకుడిగానూ వ్యవహరిస్తున్నా’’ అన్నారు. ‘‘కొత్తదనం ఉన్న మంచి సినిమా ఇది. నేనిప్పటి వరకు చేయని ఓ విభిన్నమైన పాత్ర ఈ చిత్రంలో పోషించా. వినోదంతో పాటు మదిని తాకే చక్కటి భావోద్వేగాలు ఉన్నాయ’’న్నారు రాజేంద్ర ప్రసాద్‌. హీరో శ్రీవిష్ణు మాట్లాడుతూ.. ‘‘మార్చి 11న కడుపు చెక్కలయ్యేలా నవ్వడానికి థియేటర్లలో సిద్ధంకండి’’ అన్నారు. ‘‘మా ‘గాలి సంపత్‌’ అందరికీ వినోదం పంచుతుంద’’న్నారు దర్శకుడు అనీష్‌.   ‘‘తుది షెడ్యూల్‌లో ఉంది. డబ్బింగ్‌ పనులు మొదలు పెట్టాం’’ అన్నారు నిర్మాత. ఈ చిత్రానికి సంగీతం: అచ్చు రాజమణి, ఛాయాగ్రహణం: సాయి శ్రీరామ్‌.