Breaking | Feedback | ePratibha | E-PAPER | Pratibha

పోలీసుల కళ్లుగప్పి ముగ్గురు దొంగలు పరారీ

Updated : 15 Aug 2023 22:34 IST

సంక్షిప్త వార్తలు - చిత్ర వార్తలు

15/08/2023 23:26(IST)

విశాఖ నుంచి రాజమహేంద్రవరం చేరుకున్న చంద్రబాబు

తెదేపా అధినేత చంద్రబాబు నాయుడు విశాఖ నుంచి రాజమహేంద్రవరం చేరుకున్నారు. విమానాశ్రయంలో పార్టీ నేతలు ఆయనకు స్వాగతం పలికారు. రాజమహేంద్రవరం గ్రామీణ మండలం తొర్రేడులో చంద్రబాబు బస చేశారు. బుధవారం నుంచి 3 రోజుల పాటు కోనసీమ జిల్లాలో ఆయన పర్యటించనున్నారు. మండపేట, కొత్తపేట, అమలాపురం నియోజకవర్గాల్లో చంద్రబాబు పర్యటన కొనసాగనుంది.

15/08/2023 21:25(IST)

సచివాలయం వద్ద సందర్శకుల సందడి

స్వాతంత్ర్య దినోత్సవం.. అందులోనూ సెలవు రోజు కావడంతో తిరంగా వెలుగుల్లో ఉన్న సచివాలయాన్ని చూసేందుకు సందర్శకులు పెద్ద సంఖ్యలో తరలివస్తున్నారు. దీంతో సచివాలయం రోడ్డు మొత్తం ట్రాఫిక్ జాం అయింది.

15/08/2023 19:59(IST)

పోలీసుల కళ్లుగప్పి ముగ్గురు దొంగలు పరారీ

ములుగు: మంగపేటలో పోలీసుల కళ్లుగప్పి ముగ్గురు దొంగలు పరారయ్యారు. దొంగతనం కేసులో ముగ్గురు దొంగలను పోలీసులు అరెస్ట్‌ చేశారు. స్వాతంత్ర్య వేడుకల్లో పోలీసులు నిమగ్నమైన సమయంలో దొంగలు పరారయ్యారు.

15/08/2023 19:35(IST)

భవిష్యత్తు ప్రణాళిక ఉంటేనే దేశాభివృద్ధి సాధ్యం: చంద్రబాబు

విశాఖపట్నం: విశాఖ బీచ్‌ రోడ్డులో చంద్రబాబు సమైక్య వాక్‌ నిర్వహించారు. అనంతరం ఏర్పాటు చేసిన సభలో మాట్లాడారు. వృద్ధులను గౌరవించే సమాజం మనది అని చెప్పారు. రాబోయే వందేళ్ల సమయం.. నేటి చిన్నారులు, విద్యార్థులదే అని వివరించారు. భవిష్యత్తు ప్రణాళిక ఉంటేనే దేశాభివృద్ధి సాధ్యమని ఆయన వివరించారు. ఈ సభలో ప్రజలు, నాయకులు భారీఎత్తున పాల్గొన్నారు.

15/08/2023 19:31(IST)

మంగళగిరిలో నారా లోకేశ్‌కు ఘన స్వాగతం పలికిన స్థానికులు

మంగళగిరి: మంగళగిరిలో నారా లోకేశ్‌కు స్థానికులు ఘన స్వాగతం పలికారు. అక్కడి రైల్వే గేటు వద్ద తెదేపా నేతలు ఎల్‌ఈడీ తెరలు ఏర్పాటు చేశారు. పేదలకు లోకేశ్‌ చేస్తున్న సాయం వివరించేలా ఉపకరణాలను ప్రదర్శించనున్నారు. దీంతో మంగళగిరి గౌతమబుద్ధ రహదారి రద్దీగా మారింది.

15/08/2023 19:23(IST)

స్థిరాస్తి వ్యాపారి దగ్గరి నుంచి రివాల్వర్‌ స్వాధీనం

జగిత్యాల: ముస్తాబాద్‌కు చెందిన స్థిరాస్తి వ్యాపారి మహేందర్‌ వద్ద రివాల్వర్‌ను పోలీసులు స్వాధీనం చేసుకున్నారు. అనంతరం మహేందర్‌ను పోలీసులు అరెస్టు చేశారు. బిహర్‌లో రూ. 50 వేలకు రివాల్వర్‌ కొని స్థిరాస్తి దందా చేస్తున్నట్లు పోలీసులు గుర్తించారు.

15/08/2023 19:05(IST)

రాష్ట్రంలో దళితులపై దాడులు పెరిగాయి: వర్ల రామయ్య

అమరావతి: రాష్ట్రంలో ప్రస్తుత ప్రభుత్వంలో దళితులకు రక్షణ కరవైందని తెదేపా పొలిట్ బ్యూరో సభ్యుడు వర్ల రామయ్య ధ్వజమెత్తారు. ఆయన మీడియాతో మాట్లాడారు. రాష్ట్రంలో దళితులపై దాడులు విపరీతంగా పెరిగాయని ఆగ్రహం వ్యక్తం చేశారు. దళితులను చంపినా ఈ ప్రభుత్వానికి, ముఖ్యమంత్రికి చీమ కుట్టినట్లు కూడా లేదని ఆరోపించారు.

15/08/2023 18:59(IST)

విరిగిపడిన కొండచరియలు.. కొనసాగుతున్న సహాయక చర్యలు

హిమాచల్‌ ప్రదేశ్‌: శిమ్లాలోని కృష్ణానగర్‌లో కొంచరియలు విరిగిపడ్డాయి. దాదాపు ఏడు ఇళ్లపై కొండచరియలు విరిగిపడ్డాయి. శిథిలాల కింద చిక్కుకున్న వారి కోసం సహాయక చర్యలు కొనసాగుతున్నాయి.

15/08/2023 18:54(IST)

రాజ్‌భవన్‌ దర్బార్‌ హాల్‌లో ఫొటో గ్యాలరీ ప్రారంభించిన గవర్నర్‌

హైదరాబాద్‌: గవర్నర్‌ తమిళిసై సౌందర రాజన్‌ రాజ్‌భవన్‌ దర్బార్‌ హాల్‌లో ఫొటో గ్యాలరీ ప్రారంభించారు. పలు రంగాలకు చెందిన ప్రముఖులు ఈ కార్యక్రమానికి హాజరు కానున్నారు.

15/08/2023 18:17(IST)

రాజ్‌భవన్‌లో ఎట్‌ హోమ్‌ కార్యక్రమం

విజయవాడ: రాజ్‌భవన్‌లో ఎట్‌ హోమ్‌ కార్యక్రమం నిర్వహించారు. సీఎం జగన్‌ దంపతులు, పలువురు మంత్రులు ఎట్‌ హోమ్‌ కార్యక్రమంలో పాల్గొన్నారు. హైకోర్టు ప్రధాన న్యాయమూర్తి, పురందేశ్వరి హాజరయ్యారు.

15/08/2023 18:04(IST)

వాఘా సరిహద్దులో ఘనంగా పంద్రాగస్టు వేడుకలు

వాఘా సరిహద్దులో పంద్రాగస్టు వేడుకలు ఘనంగా నిర్వహించారు. అక్కడి సరిహద్దులో ఘనంగా బీటింగ్ రీట్రీట్‌ కార్యక్రమం నిర్వహించారు. పోటాపోటీగా భారత్‌, పాకిస్థాన్‌ జవాన్లు విన్యాసాలు చేశారు.

15/08/2023 17:59(IST)

పోలీసు కవాతు మైదానంలో నేలపైనే విద్యార్థుల నృత్య ప్రదర్శన

ఆదిలాబాద్: స్వాతంత్ర్య దినోత్సవం సందర్భంగా ఆదిలాబాద్‌ జిల్లా కేంద్రంలోని పోలీసు కవాతు మైదానంలో విద్యార్థులు నేలపైనే నృత్యం చేశారు. విద్యార్థులు ఇబ్బంది పడుతూ.. నృత్య ప్రదర్శన చేశారు. అనంతరం నిర్వాహకులు స్పందించి మ్యాట్‌ అమర్చారు.

15/08/2023 17:52(IST)

ఐర్లాండ్‌కు బయలుదేరిన టీమ్‌ఇండియా

ఆగస్టు 18 నుంచి ఐర్లాండ్, టీమ్‌ఇండియా మధ్య మూడు టీ20ల సిరీస్‌ ప్రారంభంకానుంది. ఈ సిరీస్‌ కోసం భారత ఆటగాళ్లు ఐర్లాండ్‌కు బయలుదేరిన ఫొటోలను బీసీసీఐ ట్విటర్‌లో పంచుకుంది. ఈ టూర్‌లో టీమ్‌ఇండియాకు బుమ్రా నాయకత్వం వహించనున్నాడు.

15/08/2023 17:49(IST)

Satya: ‘ది సోల్‌ ఆఫ్‌ సత్య’ సాంగ్ రిలీజ్‌ వేడుక

సాయిధరమ్‌ తేజ్‌, స్వాతి జంటగా ‘సత్య’ (Satya) అనే మ్యూజికల్‌ షార్ట్‌ ఫీచర్‌ రూపొందింది. దేశభక్తి ప్రధానంగా సాగే ఈ ఫీచర్‌కు నవీన్ విజయ్‌ కృష్ణ దర్శకత్వం వహించారు. తాజాగా ఈ సినిమా నుంచి ‘ది సోల్‌ ఆఫ్‌ సత్య’ పాటను విడుదల చేశారు.

15/08/2023 17:41(IST)

కాచిగూడ తిలక్‌నగర్‌లో బాలిక అదృశ్యం

హైదరాబాద్‌: కాచిగూడ తిలక్‌నగర్‌లో బాలిక అదృశ్యమైంది. స్నేహితురాలి వద్ద పుస్తకం తెచ్చుకుంటానని రెండు రోజుల క్రితం రమ్య(15) ఇంట్లో నుంచి వెళ్లింది. ఇప్పటికీ తిరిగి రాలేదు. దీంతో బాలిక తల్లిదండ్రులు కాచిగూడ పోలీస్‌ స్టేషన్‌లో ఫిర్యాదు చేశారు.

15/08/2023 17:37(IST)

విశాఖ బీచ్‌ రోడ్డులో చంద్రబాబు సమైక్య వాక్‌

విశాఖ: మువ్వన్నెల జెండాలతో విశాఖ ఆర్కేబీచ్‌ రెపరెపలాడింది. పంద్రాగస్టు సందర్భంగా ఆర్కేబీచ్‌లోని ఎన్టీఆర్‌ విగ్రహం నుంచి అల్లూరి విగ్రహం వరకు నిర్వహించిన సమైక్య వాక్‌లో తెదేపా అధినేత చంద్రబాబుతో పాటు పలువురు పార్టీ నేతలు, నగర ప్రజలు పెద్ద ఎత్తున పాల్గొన్నారు. దాదాపు 2.5 కిలోమీటర్ల మేర చంద్రబాబు జాతీయ జెండా పట్టుకుని నగర వాసులతో కలిసి ముందుకు సాగారు. తొలుత ఆర్కేబీచ్‌లోని ఎన్టీఆర్‌ విగ్రహానికి పూలమాలవేసి నివాళులర్పించారు. సమైక్య వాక్‌ అనంతరం ఎంజీఎం గ్రౌండ్‌లో నిర్వహించనున్న సభలో పాల్గొననున్నారు. 2047 విజన్‌ డాక్యుమెంట్‌ ఆవిష్కరణలో భాగంగా వివిధ వర్గాలకు చెందిన మేధావులతో చంద్రబాబు చర్చించనున్నారు.

15/08/2023 17:21(IST)

సులభ్‌ ఇంటర్నేషనల్‌ వ్యవస్థాపకుడు బిందేశ్వర్‌ పాఠక్‌ మృతి

దిల్లీ: సులభ్‌ ఇంటర్నేషనల్‌ వ్యవస్థాపకుడు బిందేశ్వర్‌ పాఠక్‌ మృతి చెందారు. దిల్లీ ఎయిమ్స్‌లో అనారోగ్యంతో బిందేశ్వర్ పాఠక్‌ మృతి చెందారు. బిందేశ్వర్‌ పాఠక్‌ మృతికి ప్రధాని మోదీ సంతాపం తెలిపారు.

15/08/2023 17:06(IST)

శంషాబాద్‌ విమానాశ్రయానికి ప్రయాణికుల తాకిడి

హైదరాబాద్‌: శంషాబాద్‌ విమానాశ్రయానికి ప్రయాణికుల తాకిడి పెరిగింది. రోజూ 50 వేల మంది డొమెస్టిక్‌, 10 వేల మంది అంతర్జాతీయ ప్రయాణికులు రాకపోకలు సాగిస్తున్నారు. ఉన్నత విద్య కోసం రోజూ 5 వేల మంది విద్యార్థులు విదేశాలకు వెళ్తున్నారు. అమెరికా, కెనడాకు అధిక సంఖ్యలో విద్యార్థులు వెళ్తున్నారు.

15/08/2023 17:01(IST)

Hyderabad: ఆకట్టుకున్న ఫ్యాషన్‌ డిజైన్‌ విద్యార్థుల ర్యాంప్‌ వాక్‌

హైదరాబాద్‌లోని బంజారాహిల్స్‌లో లఖోటియా కాలేజ్ ఆఫ్ డిజైన్‌ విద్యార్థులు ఘనంగా స్వాతంత్ర్య దినోత్సవ వేడుకలు నిర్వహించారు. ఈ సందర్భంగా విద్యార్థులు ఫ్యాషన్‌ వాక్‌ చేసి ఆకట్టుకున్నారు.

15/08/2023 16:51(IST)

రేవంత్‌ రెడ్డిపై నాగర్‌ కర్నూల్‌ పీఎస్‌లో కేసు నమోదు

నాగర్‌కర్నూల్‌: తెలంగాణ పీసీసీ అధ్యక్షుడు రేవంత్‌రెడ్డిపై నాగర్‌ కర్నూలు పోలీస్‌ స్టేషన్‌లో కేసు నమోదైంది. పోలీసులపై రేవంత్‌రెడ్డి అనుచిత వ్యాఖ్యలు చేశారంటూ నాగర్‌కర్నూలు జిల్లా పోలీసు అధికారుల సంఘం అధ్యక్షుడు గుణవర్ధన్‌ జిల్లా ఎస్పీకి ఫిర్యాదు చేశారు. ఎస్పీ ఆదేశాల మేరకు రేవంత్‌రెడ్డితో పాటు మాజీ ఎమ్మెల్యేలు వంశీచందర్‌రెడ్డి, సంపత్‌ కుమార్‌లపై పోలీసులు కేసు నమోదు చేశారు.

15/08/2023 16:18(IST)

పంద్రాగస్టు సందర్భంగా పలు విభాగాల ఉద్యోగులకు అవార్డులు

హైదరాబాద్‌: పంద్రాగస్టు సందర్భంగా పలు విభాగాల ఉద్యోగులకు అవార్డులు ప్రకటించారు. ములుగు జిల్లాకు చెందిన ఎస్‌జీటీ వీనయ్యకు అవార్డును ప్రకటించారు. ములుగు జిల్లాలో వరదల్లో చిక్కిన విద్యార్థులను వీనయ్య కాపాడారు. జనగామ జిల్లాకు చెందిన లైన్‌మెన్‌ రహమాన్‌కు అవార్డును ప్రకటించారు. విద్యుత్‌ పునురుద్ధరణలో విశేష సేవలందించిన లైన్‌మెన్‌కు అవార్డును ప్రకటించారు.

15/08/2023 16:13(IST)

రష్యాలోని పెట్రోల్‌ స్టేషన్‌లో భారీ పేలుడు.. 35 మంది మృతి!

రష్యా: రష్యాలోని పెట్రోల్‌ స్టేషన్‌లో భారీ పేలుడు సంభవించింది. దీంతో 35 మంది మృతి చెందారు. ఈ ఘటనలో 100 మందికిపైగా గాయాలయ్యాయి. కార్ల సర్వీసింగ్ సెంటర్‌ నుంచి మంటలు వ్యాపించాయి. దీంతో వాహనాలు కాలి బూడిదయ్యాయి.

15/08/2023 15:17(IST)

నాచారంలో గొంతు కోసి వ్యక్తి దారుణ హత్య

హైదరాబాద్‌: హైదరాబాద్‌ నాచారంలో దుండగులు ఓ వ్యక్తి గొంతు కోసి హత్య చేశారు. హత్యకు గురైన వ్యక్తి బిహార్‌కు చెందిన ప్రజాపతిగా గుర్తించారు. నాచారంలోని ఓ సిమెంట్ పరిశ్రమలో ప్రజాపతి పని చేస్తున్నాడు.

15/08/2023 15:05(IST)

భర్త ఇంటి వద్ద భార్య నిరసన

ఎన్టీఆర్‌ జిల్లా: ఎన్టీఆర్ జిల్లా చందర్లపాడు మండలం ముప్పాళ్లలో భర్త ఇంటి వద్ద భార్య బైఠాయించి నిరసనకు దిగింది. పద్మజ విజయవాడలో చార్టెడ్ అకౌంటెంట్‌గా పని చేస్తుంది. భార్య భర్తలు పద్మజ, సురేష్‌కు మధ్య గత కొంతకాలంగా విభేదాలు ఉన్నాయి. వివాహం అయిన అనంతరం విజయవాడలోని లబ్బీపేటలో పద్మజ తన సొంత ఇంట్లో నివాసం ఉన్నారు. వీరి మధ్య విభేదాలు రావడంతో పద్మజ ఎనికెపాడులో అద్దె ఇంట్లో ఉంటుంది. ఆదివారం భర్త తన వద్దకు వచ్చి గొడవకు దిగి పిల్లలను కొట్టారని పద్మజ ఆరోపించింది. ముప్పాళ్లలోని భర్త ఇంటి వద్ద బైఠాయించి నిరసనకు దిగింది. గతంలో కూడా పోలీస్ స్టేషన్‌లో ఫిర్యాదు చేసినట్లు పద్మజ తెలిపింది. విజయవాడలో ఉన్న ఇల్లును తనకు ఇవ్వాలని పద్మజ డిమాండ్ చేసింది.

15/08/2023 14:55(IST)

విశాఖ చేరుకున్న చంద్రబాబు

తెదేపా అధినేత చంద్రబాబు నాయుడు విశాఖ చేరుకున్నారు. సాయంత్రం 4 గంటలకు జాతీయ జెండాతో చంద్రబాబు పాదయాత్ర చేయనున్నారు. ఆర్కే బీచ్‌ రోడ్డులో ఎన్టీఆర్‌ విగ్రహం నుంచి అల్లూరి విగ్రహం వరకు పాదయాత్ర సాగనుంది. పాదయాత్ర అనంతరం ఎంజీఎం గ్రౌండ్‌ సభలో పాల్గొననున్నారు.

15/08/2023 14:50(IST)

పంచాయతీలకు తిరిగి పూర్వవైభవం తీసుకొస్తాం: లోకేశ్‌

మంగళగిరి: నిడమర్రులో తెదేపా జాతీయ ప్రధాన కార్యదర్శి లోకేశ్‌కు ఉమ్మడి గుంటూరు జిల్లా సర్పంచులు వినతిపత్రం సమర్పించారు. 14, 15 ఆర్థిక సంఘం నిధులు ఇప్పించేలా చొరవ తీసుకోవాలని సర్పంచులు విజ్ఞప్తి చేశారు. పంచాయతీల అభివృద్ధిపై ఎన్నికల మేనిఫెస్టోలో పొందుపర్చాలని సర్పంచులు ఆయన్ను కోరారు. హక్కుల కోసం పోరాడే సర్పంచులకు పూర్తి మద్దతు ఇస్తామని లోకేశ్‌ తెలిపారు. తాము అధికారంలోకి వచ్చాక పంచాయతీలకు తిరిగి పూర్వవైభవం తీసుకొస్తామని హామీ ఇచ్చారు.

15/08/2023 14:41(IST)

నెక్లెస్ రోడ్డు వద్ద నగరవాసుల సందడి

హైదరాబాద్‌: స్వాతంత్ర్య దినోత్సవం సందర్భంగా సెలవు దినం కావడంతో హైదరాబాద్‌లోని ఎన్టీఆర్ మార్గ్, నెక్లెస్ రోడ్డు వద్ద సందర్శకుల తాకిడి పెరిగింది. కుటుంబ సభ్యులు, స్నేహితులతో కలిసి నగరవాసులు ఎన్టీఆర్ మార్గ్‌కు అధిక సంఖ్యలో తరలివచ్చారు. సచివాలయం, అమరవీరుల స్మారకం, అంబేడ్కర్ విగ్రహం, హుస్సేన్ సాగర్ వద్ద నగరవాసుల సందడి నెలకొంది.

15/08/2023 14:34(IST)

రౌడీషీటర్‌పై కత్తుల దాడి

కృష్ణా: కప్పలదొడ్డికి చెందిన రౌడీషీటర్‌ పంతం బలరామ్‌పై పెడనలో ఇద్దరు వ్యక్తులు కత్తులతో దాడి చేశారు. దాడి చేసిన వారిని యర్రా దేవ, యర్రా జీవన్‌గా గుర్తించారు. బలరామ్‌ను హుటాహుటిన మచిలీపట్నం ప్రభుత్వాసుపత్రికి తరలించారు. పోలీసులు ఘటనాస్థలికి చేరుకొని విచారణ ప్రారంభించారు.

15/08/2023 14:27(IST)

కూచిపూడి-పెద్దపూడి గ్రామాల మధ్య పాఠశాల బస్సు బోల్తా

బాపట్ల జిల్లా అమృతలూరు మండలంలో కూచిపూడి-పెద్దపూడి గ్రామాల మధ్య పాఠశాల బస్సు బోల్తాపడింది. స్వాతంత్ర్య వేడుకలు ముగించుకొని బస్సులో ఇళ్లకు వెళ్లే క్రమంలో ప్రమాదం చోటు చేసుకుంది. వేరే వాహనాన్ని ఓవర్‌టేక్‌ చేయబోయి బస్సు అదుపు తప్పింది. బస్సులోని 9 మంది విద్యార్థులకు గాయాలయ్యాయి. ఇందులో ఇద్దరి పరిస్థితి విషమంగా ఉంది. క్షతగాత్రులను 108 వాహనంలో తెనాలి ప్రైవేటు ఆసుపత్రికి తరలించారు.

15/08/2023 14:22(IST)

చలో విజయవాడకు పోలీసుల అనుమతి లేదు: సీపీ కాంతిరాణా

విజయవాడ: ఈ నెల 17న చలో విజయవాడకు విద్యుత్‌ ఉద్యోగుల పోరాట కమిటీ పిలుపునిచ్చింది. చలో విజయవాడకు పోలీసుల అనుమతి లేదని విజయవాడ సీపీ కాంతిరాణా తెలిపారు. కార్యక్రమానికి హాజరైన వారిపై కేసులు నమోదు చేస్తామని హెచ్చరించారు. ఎస్మా చట్టం పక్రారం చర్యలు చేపడతామని తెలిపారు.

15/08/2023 13:41(IST)

కేంద్రం హామీలు నెరవేర్చకపోయినా నాయకులు అడిగే పరిస్థితి లేదు: తోట చంద్రశేఖర్‌

అమరావతి: రాష్ట్ర విభజన జరిగి సుమారు 10 ఏళ్లు అవుతున్నా.. నేటికి రాజధాని కూడా నిర్మించుకోలేకపోయామని భారాస రాష్ట్ర అధ్యక్షుడు తోట చంద్రశేఖర్ అన్నారు. గుంటూరు భారాస కార్యాలయంలో జరిగిన స్వాతంత్ర్య దినోత్సవ వేడుకల్లో ఆయన పాల్గొని జెండా వందనం చేశారు. ఆయన మాట్లాడుతూ.. పోలవరం, ప్రత్యేక హోదా సహా విభజన హామీలను కేంద్రం నెరవేర్చకపోయినా.. అధికార, ప్రతిపక్ష నేతలు అడిగే పరిస్థితి లేదని ఆరోపించారు.

15/08/2023 13:37(IST)

నారా లోకేశ్‌కు స్వాతంత్ర్య దినోత్సవ శుభాకాంక్షలు తెలిపిన తెలుగు యువత

గుంటూరు: స్వాతంత్ర్య దినోత్సవం సందర్భంగా నారా లోకేశ్‌కు తెలుగు యువత, నాయకులు వినూత్నంగా శుభాకాంక్షలు తెలిపారు. గుంటూరు జిల్లా మంగళగిరి మండలం నిడమర్రు సమీపంలోని లోకేశ్‌ శిబిరం వద్ద హాట్ ఎయిర్ బెలూన్ సాయంతో ఫ్లెక్సీ ప్రదర్శించారు. గుంటూరు జిల్లా తెలుగు యువత అధ్యక్షుడు రావిపాటి సాయి కృష్ణ.. యువనేతకు సరికొత్త విధానంలో స్వాతంత్ర్య దినోత్సవ శుభాకాంక్షలు తెలియజేశారు.

15/08/2023 13:34(IST)

ఆర్టీసీ బస్సు, బైక్‌ ఢీ.. యువకుడు మృతి

నిర్మల్‌: నిర్మల్‌లోని డాక్టర్స్‌ లైన్ కాలనీలో ప్రమాదం జరిగింది. ఆర్టీసీ బస్సు, బైక్‌ ఢీకొని యువకుడు మృతి చెందాడు. బోథ్‌ మండలం దన్నూర్‌కు చెందిన హరీశ్‌(25) మృతి చెందినట్లు పోలీసులు తెలిపారు.

15/08/2023 13:22(IST)

ఐటీ టవర్‌లో 1500 మందికి ఉద్యోగాలు వచ్చేలా కృషి చేస్తాం: హరీశ్‌రావు

సిద్దిపేట ఐటీ హబ్‌లో ఐటీ టవర్‌ వెబ్‌సైట్‌ను మంత్రి హరీశ్‌రావు ప్రారంభించారు. ఉద్యోగంలో చేరిన వారికి నియామక పత్రాలు అందజేశారు. ఈ సందర్భంగా ఆయన మాట్లాడుతూ.. సిద్దిపేటలో ఐటీ టవర్‌ ఏర్పాటు చాలా సంతోషకరమని చెప్పారు. ఐటీ టవర్‌లో 1500 మందికి ఉద్యోగాలు వచ్చేలా కృషి చేస్తామని చెప్పారు.

15/08/2023 13:02(IST)

నాటు తుపాకీ పేలి నాలుగేళ్ల బాలిక మృతి

కాకినాడ: తుని మండలంలోని లోవ కొత్తూరులో నాటు తుపాకీ పేలి నాలుగేళ్ల బాలిక మృతి చెందింది. తుపాకీ మిస్‌ఫైర్‌ అయి ఆడుకుంటున్న చిన్నారికి బుల్లెట్‌ తగిలింది. పందులను కాల్చడానికి సిద్ధం చేస్తుండగా పేలినట్లు సమాచారం. తుపాకీని వినియోగించిన వ్యక్తిని పోలీసులు అదుపులోకి తీసుకున్నారు.

15/08/2023 12:30(IST)

విచిత్రమైన టీషర్ట్‌తో జడేజా సందడి

లండన్‌ పర్యటనలో ఉన్న భారత క్రికెటర్‌ రవీంద్ర జడేజా అక్కడి ఫ్యాన్స్‌ పాయింట్‌లో పసుపు రంగు మచ్చలున్న టీషర్ట్‌తో ఫొటో దిగారు. ఈ ఫొటోను ఆయన ఇన్‌స్టా ఖాతాలో పంచుకోగా ఈ చొక్కా విచిత్రంగా ఉందంటూ పలువురు కామెంట్లు పెడుతున్నారు. ఐర్లాండ్‌, భారత్‌ టీ20 సిరీస్‌ ఈ నెల 18 నుంచి ప్రారంభం కానుంది.

15/08/2023 12:29(IST)

బాలీవుడ్‌ నటుడు అక్షయ్‌ కుమార్‌కు భారతీయ పౌరసత్వం

పౌరసత్వం విషయంలో తరచూ విమర్శలు ఎదుర్కొనే బాలీవుడ్‌ నటుడు అక్షయ్‌ కుమార్‌కు ఎట్టకేలకు భారతీయ పౌరసత్వం లభించింది. ఈ విషయాన్ని ఆయన ట్విటర్‌ వేదికగా వెల్లడించారు. తనకు కెనడా పౌరసత్వం ఉందన్న విషయాన్ని అక్షయ్‌ గతంలో బయటపెట్టిన విషయం తెలిసిందే.

15/08/2023 12:28(IST)

కర్రతో దాడి చేసి తండ్రిని హతమార్చిన కుమారుడు

సంగారెడ్డి: జహీరాబాద్‌ మండలం కొత్తూరు(బి)లో కుమారుడు శివకుమార్‌ తండ్రి కృష్ణ(56)ను కర్రతో దాడి చేసి హతమార్చాడు. సోమవారం రాత్రి తండ్రి, కుమారుడు కలిసి మద్యం తాగుతుండగా వివాదం చోటు చేసుకుంది. ఈక్రమంలో శివకుమార్‌ ఆగ్రహంతో తండ్రిపై దాడి చేసి హత్య చేశాడు.

15/08/2023 12:20(IST)

చేవెళ్లలో కాంగ్రెస్‌ సభ తేదీ మార్పు

చేవెళ్లలో జరిగే సభ తేదీని కాంగ్రెస్‌ నేతలు మార్చారు. ఈ నెల 18కి బదులు 24న సభను నిర్వహించాలని నిర్ణయించారు. సమయం తక్కువగా ఉండటంతో సభ తేదీని ఈ నెల 24కు మార్చారు. చేవెళ్ల సభ ఏర్పాట్లపై నియోజకవర్గ నేతలతో రేవంత్‌ రెడ్డి భేటీ అయ్యారు. సభా ఏర్పాట్లపై పార్టీ రాష్ట్ర వ్యవహారాల ఇన్‌ఛార్జి మాణిక్‌రావు ఠాక్రే, రేవంత్‌ చర్చించారు.

15/08/2023 12:08(IST)

గద్దర్‌ ఒక వ్యక్తి కాదు.. వ్యవస్థ: చంద్రబాబు

హైదరాబాద్‌: తెదేపా అధినేత చంద్రబాబు నాయుడు అల్వాల్‌లోని ప్రజాగాయకుడు గద్దర్‌ నివాసానికి వెళ్లి కుటుంబ సభ్యులను పరామర్శించారు. అనంతరం గద్దర్‌ చిత్రపటానికి నివాళి అర్పించారు. ఈ సందర్భంగా చంద్రబాబు మాట్లాడుతూ.. గద్దర్‌ ఒక వ్యక్తి కాదు, ఆయనొక వ్యవస్థ అని తెలిపారు. ప్రజా చైతన్యం అనగానే గుర్తుకు వచ్చే పేరు గద్దర్‌ అని చెప్పారు. నిరంతరం ప్రజల పోరాటంలోనే బతికిన వ్యక్తి గద్దర్‌ అని గుర్తుచేశారు. ప్రాథమిక హక్కులు, పేదల హక్కుల రక్షణ కోసం గద్దర్‌ ప్రత్యేక పంథాను ఎంచుకున్నారని చంద్రబాబు చెప్పారు.

15/08/2023 11:49(IST)

ఒకనాడు దగాపడిన పల్లెలు నేడు ధగధగలాడుతున్నాయి: కేటీఆర్‌

సిరిసిల్ల: స్వాతంత్ర్య దినోత్సవం సందర్భంగా సిరిసిల్లలో మంత్రి కేటీఆర్‌ జాతీయ జెండాను ఆవిష్కరించారు. ఈ సందర్భంగా ఆయన మాట్లాడుతూ.. మన ఊరు- మన బడి పథకంలో భాగంగా పాఠశాలలను తీర్చిదిద్దినట్లు తెలిపారు. జిల్లాలో 172 కళాశాలల్లో వసతులు కల్పించినట్లు చెప్పారు. ఒకనాడు దగాపడిన పల్లెలు నేడు ధగధగలాడుతున్నాయని చెప్పారు. స్వచ్ఛ సర్వేక్షణ్‌ అవార్డులో రాష్ట్రానిదే సింహ భాగమని అన్నారు. రాష్ట్రంలోని మున్సిపాలిటీలు, పట్టణాలు దేశానికే ఆదర్శంగా నిలిచాయని కేటీఆర్‌ తెలిపారు.

15/08/2023 11:35(IST)

పీవీ, మన్మోహన్‌ సింగ్‌ దేశాన్ని పురోగతి వైపు నడిపించారు: రేవంత్‌రెడ్డి

హైదరాబాద్‌: గాంధీ భవన్‌లో స్వాతంత్ర్య వేడుకలను ఘనంగా నిర్వహించారు. స్వాతంత్ర్య సమరయోధుల చిత్రపటాలకు టీపీసీసీ చీఫ్‌ రేవంత్ రెడ్డి నివాళి అర్పించారు. అనంతరం జాతీయ జెండాను ఆవిష్కరించారు. కార్యక్రమంలో ఏఐసీసీ రాష్ట్ర వ్యవహారాల ఇన్‌ఛార్జి మాణిక్‌రావు ఠాక్రే , పార్టీ నేతలు మహేశ్‌ కుమార్ గౌడ్, అంజన్ కుమార్ యాదవ్, పార్టీ సీనియర్ నాయకులు, కార్యకర్తలు పాల్గొన్నారు. ఈ సందర్భంగా రేవంత్‌రెడ్డి మాట్లాడుతూ.. దేశ ప్రజలకు స్వాతంత్ర్య ఫలాలు అందించాలని లక్షలాది మంది కాంగ్రెస్ శ్రేణులు ప్రాణత్యాగాలు చేశారని తెలిపారు. మహాత్మా గాంధీ, అంబేడ్కర్‌, నెహ్రూలను స్మరించుకోవాలని చెప్పారు. దేశంలో ఐటీ రంగంలో గొప్ప స్ఫూర్తినిచ్చిన ప్రధాని రాజీవ్ గాంధీ అని చెప్పారు. పీవీ నరసింహారావు, మన్మోహన్‌ సింగ్‌ దేశాన్ని ఆర్థికంగా పురోగతి వైపు నడిపించారని వివరించారు.

15/08/2023 11:05(IST)

సమైక్య రాష్ట్రంలో తెలంగాణ ఘోరమైన వివక్ష ఎదుర్కొంది: కేసీఆర్‌

హైదరాబాద్‌: గోల్కొండ కోటలో నిర్వహించిన స్వాతంత్ర్య దినోత్సవ వేడుకల్లో సీఎం కేసీఆర్‌ ప్రసంగించారు. 75 ఏళ్ల ప్రగతి ఘనమే అయినా ఇంకా చేయాల్సింది ఉందని తెలిపారు. పాలకుల అసమర్థత, భావ దారిద్ర్యం వల్ల ఇంకా సమస్యలున్నాయని చెప్పారు. పేదరికం, అసమానతలు ఇంకా తొలగిపోలేదన్నారు. అన్నివర్గాలు అభివృద్ధి సాధించిన రోజే నిజమైన స్వాతంత్ర్యమని చెప్పారు. సమైక్య రాష్ట్రంలో తెలంగాణ ఘోరమైన వివక్ష ఎదుర్కొందని గుర్తుచేశారు.

15/08/2023 10:21(IST)

గొంతు కోసుకున్న మతిస్థిమితం లేని వ్యక్తి

తిరుమలలో ఓ మతిస్థిమితం లేని వ్యక్తి బ్లేడుతో గొంతు కోసుకున్నాడు. స్థానికులు గమనించి ఓ ప్రైవేటు ఆసుపత్రికి తరలించారు. అక్కడి నుంచి మెరుగైన చికిత్స కోసం తిరుపతి రుయా ఆసుపత్రికి తరలించారు.

15/08/2023 10:16(IST)

ఆక్వా రైతులకు రూ.1.50కే విద్యుత్‌ ఇస్తున్నది ఏపీ ప్రభుత్వమే: సీఎం జగన్‌

విజయవాడలో నిర్వహించిన స్వాతంత్ర్య దినోత్సవ వేడుకల్లో ముఖ్యమంత్రి జగన్‌మోహన్‌రెడ్డి ప్రసంగించారు. 50 నెలల్లో గ్రామ స్వరాజ్యానికి అర్థం తెచ్చామని తెలిపారు. గ్రామ, వార్డు సచివాలయ వ్యవస్థకు అర్థం తెచ్చినట్లు చెప్పారు. ఆక్వా రైతులకు రూ.1.50కే విద్యుత్‌ ఇస్తున్నది ఏపీ ప్రభుత్వమే అని చెప్పారు. పాడి రైతులకు పాలవెల్లువ కార్యక్రమం తీసుకొచ్చినట్లు వివరించారు.

15/08/2023 10:11(IST)

స్వాతంత్ర్య దినోత్సవ వేడుకల్లో పవన్‌ కల్యాణ్‌

మంగళగిరి: స్వాతంత్ర్య దినోత్సవం సందర్భంగా జనసేన అధినేత పవన్‌ కల్యాణ్‌ మంగళగిరిలోని పార్టీ కార్యాలయంలో జాతీయ జెండాను ఆవిష్కరించారు. అనంతరం జాతీయ గీతాన్ని ఆలపించారు. కార్యక్రమంలో నాదెండ్ల మనోహర్‌ తదితరులు పాల్గొన్నారు.

15/08/2023 10:02(IST)

భాజపా కార్యాలయంలో స్వాతంత్ర్య దినోత్సవ వేడుకలు

హైదరాబాద్‌లోని భాజపా కార్యాలయంలో స్వాతంత్ర్య దినోత్సవ వేడుకలు ఘనంగా నిర్వహించారు. కార్యక్రమంలో భాజపా తెలంగాణ రాష్ట్ర అధ్యక్షుడు కిషన్‌రెడ్డి, ఎంపీ లక్ష్మణ్‌ తదితరులు పాల్గొన్నారు.

15/08/2023 09:17(IST)

తెలంగాణ భవన్‌లో జాతీయ జెండాను ఆవిష్కరించిన ఎంపీ కేశవరావు

స్వాతంత్ర్య దినోత్సవం సందర్భంగా భారాస ఎంపీ కేశవరావు తెలంగాణ భవన్‌లో జాతీయ జెండాను ఆవిష్కరించారు. స్వాతంత్ర్య ఉద్యమం కోసం త్యాగాలు చేసిన యోధుల సేవలను గుర్తు చేసుకున్నారు.

15/08/2023 08:56(IST)

వసుధైక కుటుంబం అన్నదే భారత నీతి: మోదీ

దిల్లీ: సరిహద్దు గ్రామాల అభివృద్ధిలో నూతన శకాన్ని ప్రారంభిస్తున్నట్లు ప్రధాని నరేంద్ర మోదీ తెలిపారు. సరిహద్దు గ్రామాలు ఇక చివరివి కావని, అవి మొదటి గ్రామాలని చెప్పారు. విశ్వమిత్ర రూపంలో భారత్‌ ప్రతి దేశానికి మిత్ర దేశంగా ఉంటోందని గుర్తు చేశారు. వసుధైక కుటుంబం అన్నదే భారత నీతి అని పేర్కొన్నారు.

15/08/2023 08:49(IST)

మధ్యతరగతి వారి సొంతింటి కల సాకారానికి త్వరలో కొత్త పథకం : మోదీ

దిల్లీ: మధ్యతరగతి వారి సొంతింటి కల సాకారానికి కొత్త పథకం తీసుకురాబోతున్నామని ప్రధాని నరేంద్ర మోదీ తెలిపారు. బ్యాంకు రుణాలపై రాయితీ ఇచ్చే కొత్త పథకానికి శ్రీకారం చుడుతున్నామని చెప్పారు. పట్టణ ప్రాంతాల దిగువ, మధ్యతరగతి ప్రజల సొంతింటి కల సాకారమే లక్ష్యంగా పథకాన్ని రూపొందిస్తున్నట్లు తెలిపారు. ₹లక్షల ప్రయోజనం కల్పించే ఈ పథకం త్వరలో ప్రకటిస్తామని ప్రధాని వ్యాఖ్యానించారు.

15/08/2023 08:37(IST)

సాగు రంగంలో తెచ్చిన సంస్కరణలు రైతులకు లబ్ధి చేకూర్చాయి: నరేంద్ర మోదీ

దిల్లీ: సాగు రంగంలో తెచ్చిన సంస్కరణలు రైతులకు లబ్ధి చేకూర్చాయని ప్రధాని నరేంద్ర మోదీ తెలిపారు. యూరియాపై రూ.10లక్షల కోట్ల రాయితీ రైతులకు లభిస్తోందని చెప్పారు. 2014 నాటికి తాము అధికారంలోకి వచ్చేనాటికి కుంభకోణాలు రాజ్యమేలాయని తెలిపారు. తాము ప్రవేశపెట్టిన బలమైన ఆర్థిక విధానాలు, పారదర్శక పాలన దేశానికి కొత్త శక్తినిచ్చాయని చెప్పారు. పథకాల్లో ఉన్న అనేక అవకతవకలను కట్టడి చేసినట్లు ప్రధాని నరేంద్ర మోదీ గుర్తు చేశారు.

15/08/2023 08:20(IST)

కరోనా తర్వాత భారత్‌ సామర్థ్యం ప్రపంచానికి తెలిసింది: మోదీ

దిల్లీ: భారత్‌లో జీ20 సమావేశాలు భారత సామర్థ్యం, వైవిధ్యాన్ని ప్రపంచం ముందుంచాయని ప్రధాని నరేంద్ర మోదీ తెలిపారు. జీ20 సమావేశాలు ప్రపంచానికి కొత్త భారతాన్ని పరిచయం చేశాయని చెప్పారు. మన ఎగుమతులు కొత్త లక్ష్యాలను చేరుకుంటున్నాయని తెలిపారు. కరోనా తర్వాత భారత్‌ సామర్థ్యం ప్రపంచానికి తెలిసిందని చెప్పారు. కొత్త ప్రపంచంలో భారత్‌ను విస్మరించడం ఎవరి తరమూ కాదని వివరించారు.

15/08/2023 08:14(IST)

తెలంగాణ పరిపాలన దేశానికి దిక్సూచి: పోచారం

హైదరాబాద్‌: ఎందరో సమరయోధుల త్యాగ ఫలాల వల్లే స్వాతంత్ర్యం సిద్ధించిందని స్పీకర్‌ పోచారం శ్రీనివాస్‌రెడ్డి అన్నారు. అసెంబ్లీలో నిర్వహించిన స్వాతంత్ర్య దినోత్సవ వేడుకల్లో ఆయన ప్రసంగించారు. స్వాతంత్ర్య ఫలాలు అన్నివర్గాల ప్రజలు పొందాలని తెలిపారు. మహాత్మా గాంధీ, అంబేడ్కర్‌ ఆశయాలను సీఎం కేసీఆర్‌ పాటిస్తున్నారని చెప్పారు. తెలంగాణ పరిపాలన దేశానికి దిక్సూచిగా నిలుస్తోందని వివరించారు. ఏ రాష్ట్రంలో లేని విధంగా తెలంగాణలో పెద్ద ఎత్తున సంక్షేమ కార్యక్రమాలు అమలవుతున్నాయని వివరించారు.

15/08/2023 08:09(IST)

అసెంబ్లీలో స్వాతంత్ర్య దినోత్సవ వేడుకలు

హైదరాబాద్‌: తెలంగాణ అసెంబ్లీలో స్వాతంత్ర్య దినోత్సవ వేడుకలను ఘనంగా నిర్వహించారు. స్పీకర్‌ పోచారం శ్రీనివాస్‌రెడ్డి, మండలి ఛైర్మన్‌ గుత్తా సుఖేందర్‌రెడ్డి గాంధీజీ, అంబేడ్కర్‌ విగ్రహాల వద్ద నివాళి అర్పించారు. అనంతరం స్పీకర్ పోచారం శ్రీనివాస్ రెడ్డి జాతీయ పతాకాన్ని ఆవిష్కరించారు.

15/08/2023 08:06(IST)

శాసన మండలిలో స్వాతంత్ర్య దినోత్సవ వేడుకలు

హైదరాబాద్: శాసన మండలిలో స్వాతంత్ర్య దినోత్సవ వేడుకలను ఘనంగా నిర్వహించారు. మండలి ఛైర్మన్‌ గుత్తా సుఖేందర్‌రెడ్డి గాంధీజీ చిత్రపటానికి పూలమాల వేసి నివాళి అర్పించారు. అనంతరం జాతీయ పతాకాన్ని ఎగురవేశారు.

15/08/2023 08:04(IST)

అమృత కాలంలో నవయవ్వన భారతం ఆవిష్కృతమవుతోంది: మోదీ

దిల్లీ: వెయ్యేళ్ల బానిసత్వం తర్వాత భారత్‌ స్వాతంత్ర్యం పొందిందని ప్రధాని నరేంద్ర మోదీ తెలిపారు. స్వాతంత్ర్యం తర్వాత ఇప్పుడు కొత్త వెలుగులవైపు భారత్‌ పయనిస్తోందని చెప్పారు. అమృత కాలంలో నవయవ్వన భారతం ఆవిష్కృతమవుతోందని వివరించారు. ప్రజాస్వామ్యం, జనాభా, వైవిధ్యతల త్రివేణి సంగమం భారత్‌ను స్వర్ణయుగంలోకి నడిపిస్తోందని చెప్పారు. వెయ్యేళ్ల భవిష్యత్తు సంధికాలంలో మనం నిలబడి ఉన్నామని ప్రధాని పేర్కొన్నారు.

15/08/2023 07:57(IST)

మణిపుర్‌కు యావత్‌ జాతి అండగా నిలుస్తోంది: మోదీ

దిల్లీ: మణిపుర్‌లో జరిగిన హింస అత్యంత బాధాకరమైందని ప్రధాని నరేంద్ర మోదీ తెలిపారు. అక్కడ జరిగిన హింసాత్మక సంఘటనలు గర్హించదగినవని చెప్పారు. కొద్దిరోజులుగా మణిపుర్‌లో శాంతి నెలకొంటోందని అన్నారు. మణిపుర్‌కు యావత్‌ జాతి అండగా నిలుస్తోందని తెలిపారు. మణిపుర్‌లో వంద శాతం శాంతి సాధించాలన్న సంకల్పంతో పనిచేస్తున్నామని ప్రధాని వివరించారు.

15/08/2023 07:49(IST)

రాణి దుర్గావతి, మహాభక్తురాలు మీరాబాయిని స్మరించుకోవాల్సిన తరుణమిది: మోదీ

దిల్లీ: ఈ ఏడాది అరవిందుడు, దయానంద సరస్వతి 150వ జయంతిని నిర్వహిస్తున్నట్లు ప్రధాని మోదీ తెలిపారు. రాణి దుర్గావతి, మహాభక్తురాలు మీరాబాయిని స్మరించుకోవాల్సిన తరుణమిదని గుర్తు చేశారు. కొద్దివారాల క్రితం మణిపుర్‌లో జరిగిన హింస అత్యంత బాధాకరమని ప్రధాని నరేంద్ర మోదీ తెలిపారు.

15/08/2023 07:37(IST)

ఎర్రకోట వద్ద ప్రధాని మోదీ ప్రసంగం

దిల్లీ: ప్రధాని నరేంద్ర మోదీ ఎర్రకోట వద్ద జాతినుద్దేశించి ప్రసంగిస్తున్నారు. 140 కోట్ల మంది భారతీయులకు ఆయన స్వాతంత్ర్య దినోత్సవ శుభాకాంక్షలు తెలిపారు. భారత్‌ ప్రపంచంలోనే అతిపెద్ద ప్రజాస్వామ్య దేశమని పేర్కొన్నారు. బాపూజీ చూపిన అహింస మార్గంతో స్వాతంత్ర్యం సాధించామని గుర్తుచేశారు.

15/08/2023 07:31(IST)

ఎర్రకోటపై జాతీయ జెండాను ఆవిష్కరించిన మోదీ

దిల్లీ: స్వాతంత్ర్య దినోత్సవం సందర్భంగా ప్రధాని నరేంద్ర మోదీ ఎర్రకోటపై జాతీయ జెండాను ఆవిష్కరించారు. ఆయన వరుసగా ఇక్కడ పదోసారి జెండా ఎగురవేయడం విశేషం. కేంద్ర మంత్రులు, ఉన్నతాధికారులతో పాటు వివిధ రంగాల్లో ప్రతిభ చూపిన వారు ఈ వేడుకల్లో పాల్గొన్నారు.

15/08/2023 07:16(IST)

నైజీరియాలో జరిగిన ఎన్‌కౌంటర్‌లో 26 మంది మృతి

నైజీరియాలో పలువురు నేరస్థులతో జరిగిన ఎన్‌కౌంటర్‌లో సుమారు 26 మంది మంది భద్రతా బలగాల సభ్యులు మృతి చెందారు. 8 మంది గాయాల పాలయ్యారు. దీనికితోడు ఈ ఘటనలో గాయపడిన వారిని తీసుకెళ్తున్న హెలికాప్టర్‌ ప్రమాదానికి గురైంది.

15/08/2023 07:11(IST)

రాజ్‌ఘాట్‌ వద్ద ప్రధాని మోదీ నివాళి

దిల్లీ: స్వాతంత్ర్య దినోత్సవాన్ని పురస్కరించుకొని ప్రధాని నరేంద్ర మోదీ రాజ్‌ఘాట్‌ వద్ద గాంధీకి నివాళి అర్పించారు. స్వాతంత్ర్య ఉద్యమంలో ఆయన చేసిన సేవలను గుర్తు చేసుకున్నారు.

పోలీసుల కళ్లుగప్పి ముగ్గురు దొంగలు పరారీ

తాజా వార్తలు (Latest News)

ఆస్ట్రేలియా వీసాలకు.. ఇక ‘టోఫెల్‌’ స్కోర్‌ చెల్లుబాటు

సూర్యకుమార్‌ యాదవ్‌ శతకం.. హైదరాబాద్‌పై ముంబయి విజయం

‘నేనూ ఎంజాయ్‌ చేశా’.. తనపై వచ్చిన వీడియోను రీట్వీట్‌ చేసిన మోదీ

ఆ రికార్డు సాధించిన తొలి భారతీయ పాట ‘కేసరియా’

ప్రైవేట్‌ పార్ట్‌కు బాల్ తగలడంతో బాలుడి మృతి

దక్ష నగర్కర్‌కు ఏమైంది..?ఆందోళనలో అభిమానులు

సుఖీభవ

చదువు