Breaking | Feedback | ePratibha | E-PAPER | Pratibha

G20 Summit: జీ20 దిల్లీ డిక్లరేషన్‌పై ఏకాభిప్రాయం: ప్రధాని మోదీ ప్రకటన

G20 Summit: భారత్ అధ్యక్షతన ప్రతిష్ఠాత్మక జీ20 దేశాధినేతల శిఖరాగ్ర సదస్సు ప్రారంభమైంది. దిల్లీలోని ప్రగతి మైదాన్‌లో సర్వాంగ సుందరంగా తీర్చిదిద్దిన భారత్‌ మండపంలో ఈ సమావేశం జరుగుతోంది. పలు దేశాల అధినేతలు, అంతర్జాతీయ సంస్థల ప్రతినిధులు ఈ సదస్సుకు హాజరయ్యారు.

Updated : 09 Sep 2023 15:42 IST

09/09/2023 16:17(IST)

బైడెన్‌తో బంగ్లా ప్రధాని సెల్ఫీ

జీ20 సదస్సు మధ్యలో అమెరికా అధ్యక్షుడు జో బైడెన్‌తో బంగ్లాదేశ్‌ ప్రధాని షేక్‌ హసీనా కొంతసేపు ముచ్చటించారు. ఈ సందర్భంగా వీరిద్దరూ సెల్ఫీ తీసుకున్నారు. ఈ ఫొటోలను బంగ్లాదేశ్ హైకమిషన్‌ తమ సామాజిక మాధ్యమాల్లో పంచుకుంది.

09/09/2023 15:36(IST)

దిల్లీ డిక్లరేషన్‌పై ఏకాభిప్రాయం: మోదీ

జీ20 సదస్సులో దిల్లీ డిక్లరేషన్‌పై ఏకాభిప్రాయానికి వచ్చినట్లు ప్రధాని మోదీ ప్రకటించారు. ఈ సంయుక్త డిక్లరేషన్‌ను సాధ్యమయ్యేలా చేసినందుకు జీ20 షెర్పాలు, మంత్రులు, ఇతర అధికారులకు కృతజ్ఞతలు తెలిపారు.

పూర్తి వార్త కోసం క్లిక్‌ చేయండి..

09/09/2023 15:21(IST)

జీవ ఇంధనంపై ప్రపంచ కూటమి: మోదీ

జీ20 సదస్సులో రెండో సెషన్‌ ప్రారంభమైంది. ఈ సందర్భంగా ప్రధాని మోదీ మాట్లాడుతూ.. జీవ ఇంధనంపై ప్రపంచ కూటమిని ప్రారంభిస్తున్నట్లు ప్రకటించారు. ఈ కూటమిలో ప్రపంచమంతా చేరాలని కోరారు. దీంతో పాటు ‘జీ20 శాటిలైట్‌ మిషన్‌ ఫర్‌ ఎన్విరాన్‌మెంట్‌ అండ్‌ క్లైమేట్‌ అబ్జర్వేషన్‌’ను ప్రారంభించేందుకు ప్రధాని ప్రతిపాదించారు. గ్రీన్‌ క్రెడిట్ ఇనిషియేటివ్‌పై కలిసి పనిచేయాలని జీ20 దేశాలను మోదీ కోరారు.

09/09/2023 14:42(IST)

కూటమిలో.. ‘ఆఫ్రికన్‌ యూనియన్‌’ చేరికతో ప్రయోజనమేంటి..?

భారత్‌ ప్రతిపాదించిన ఆఫ్రికన్‌ యూనియన్‌కు (AU) శాశ్వత సభ్యత్వాన్ని సభ్యదేశాలన్నీ అంగీకరించడం కీలక పరిణామంగా విశ్లేషకులు చెబుతున్నారు. 50కిపైగా దేశాలు, సుమారు 130 కోట్ల జనాభా కలిగిన ఏయూ.. ఇందులో చేరడంతో జీ20 కూటమి మరింత శక్తిమంతం అయినట్లేనని ప్రపంచదేశాల అభిప్రాయంగా కనిపిస్తోంది. మరి దీని వల్ల ఆఫ్రికాకు లాభమేంటీ? పూర్తి వార్త కోసం చదవండి..

09/09/2023 14:21(IST)

రాష్ట్రపతి ఆహ్వానం మేరకే దిల్లీకి వచ్చా: బిహార్‌ సీఎం

బిహార్‌ ముఖ్యమంత్రి నీతీశ్‌ కుమార్‌ దిల్లీ చేరుకున్నారు. జీ20 సదస్సు నేపథ్యంలో ఏర్పాటు చేసిన విందులో ఆయన పాల్గొననున్నారు. రాష్ట్రపతి ద్రౌపది ముర్ము ఆహ్వానం మేరకు తాను దిల్లీకి వచ్చినట్లు చెప్పారు.

09/09/2023 14:20(IST)

దిల్లీకి చేరుకున్న ఫ్రాన్స్ అధ్యక్షుడు

ఫ్రాన్స్‌ అధ్యక్షుడు ఇమ్మాన్యుయేల్‌ మెక్రాన్‌ దిల్లీ చేరుకున్నారు. ఆయనకు కేంద్ర మంత్రి అనుప్రియా పటేల్‌ సహా పలువురు అధికారులు విమానాశ్రయంలో స్వాగతం పలికారు. అక్కడే ఏర్పాటు చేసిన సంప్రదాయ నృత్య ప్రదర్శనను తిలకించారు. నేరుగా ఆయన అక్కడి నుంచి జీ20 సదస్సు వేదిక వద్దకు చేరుకోనున్నారు.

09/09/2023 13:56(IST)

జీ20లో.. క్యూఆర్‌ కోడ్‌తో బ్రెజిల్‌ ప్రతినిధుల చెల్లింపులు

జీ20 సదస్సు జరుగుతున్న భారత్‌ మండపం వద్ద ఏర్పాటు చేసిన క్రాఫ్ట్స్‌బజార్‌ను బ్రెజిల్‌ ప్రతినిధులు సందర్శించారు. ఈ సందర్భంగా అక్కడ ఏర్పాటు చేసిన స్టాళ్లలో కొన్ని కళాకృతులను కొనుగోలు చేసిన బ్రెజిల్‌ ప్రతినిధులు.. అందుకు క్యూఆర్‌ కోడ్‌తో చెల్లింపులు చేయడం విశేషం.

09/09/2023 13:40(IST)

జాఫ్రానీ గుచ్చీ పులావ్‌.. కుర్‌కురీ బెండీ.. విదేశీ అగ్రనేతలకు దేశీయ రుచులు

జీ20 శిఖరాగ్ర సదస్సు(G20 Summit)లో ప్రపంచ అగ్రనేతలకు భారతీయ వంటకాలను రుచి చూపించనున్నారు. ఈ మేరకు భారత్‌ మండపం వద్ద వంటకాలను సిద్ధం చేశారు. ఈ రెండు రోజులు పాటు ఈ వీఐపీ సదస్సుకు ఐటీసీ హోటల్స్‌ ఆహారాన్ని అందిస్తున్నాయి.

పూర్తి వార్త కోసం క్లిక్‌ చేయండి..

09/09/2023 13:30(IST)

కీలక సవాళ్ల సమయంలో జీ20 భేటీ: సునాక్‌

జీ20 సదస్సుపై యూకే ప్రధాని రిషి సునాక్‌ ట్వీట్‌ చేశారు. ‘‘15ఏళ్ల క్రితం ఆర్థిక సంక్షోభం తర్వాత ప్రపంచ వృద్ధిని పునరుద్ధరించడానికి జీ20 దేశాధినేతలు తొలిసారి సమావేశమయ్యారు. ఇప్పుడు అపారమైన సవాళ్ల సమయంలో మనం మళ్లీ భేటీ అయ్యాం. మనమంతా కలిసి ఈ సవాళ్లను పరిష్కరించగలమని విశ్వసిస్తున్నా’’ అని సునాక్‌ రాసుకొచ్చారు.

09/09/2023 13:05(IST)

మోదీ ద్వైపాక్షిక చర్చలు..

సదస్సు మధ్యలో ప్రధాని మోదీ పలు దేశాధినేతలతో ద్వైపాక్షిక చర్చలు జరపనున్నారు. యూకే ప్రధాని రిషి సునాక్‌, జపాన్‌ ప్రధాని ఫుమియో కిషిద, జర్మనీ ఛాన్సలర్‌ ఒలాఫ్‌ షోల్జ్‌, ఇటలీ ప్రధాని జార్జియా మెలోనీతో మోదీ భేటీ కానున్నారు.

09/09/2023 13:03(IST)

కీలక ఒప్పందాలపై అగ్రనేతల చర్చలు

జీ20 దేశాధినేతల శిఖరాగ్ర సదస్సు కొనసాగుతోంది. పలు కీలక ఒప్పందాలపై ప్రపంచ నేతలు చర్చలు జరుపుతున్నారు. అమెరికా, సౌదీ అరేబియా, యూఏఈ, భారత్‌ మధ్య మెగా రైల్‌-పోర్టు కనెక్టివిటీ డీల్‌ను ఆవిష్కరించనున్నట్లు తెలుస్తోంది.

09/09/2023 12:30(IST)

జీ20లో చంద్రయాన్‌-3

జీ20 సదస్సులో ఏర్పాటు చేసి క్రాఫ్ట్‌ బజార్‌లో చంద్రయాన్‌-3 ప్రదర్శన ఆకట్టుకుంది. బిహార్‌కు చెందిన మధుబని పెయింటింగ్‌ ఆర్టిస్ట్‌ శాంతి దేవి.. చంద్రయాన్‌-3 విజయాన్ని ప్రతిబింబించే కళాకృతిని ప్రదర్శించారు.

09/09/2023 12:19(IST)

అతిరథులను స్వాగతించిన వేళ.. ఆకట్టుకున్న కోణార్క్‌ వీల్‌

జీ20 సదస్సు కోసం విచ్చేసిన ప్రపంచ దేశాల అధినేతలకు వేదిక వద్ద ప్రధాని మోదీ(PM Modi) స్వయంగా ఆహ్వానం పలికారు. వారికి స్వాగతం పలికే ప్రదేశంలో బ్యాగ్రౌండ్‌లో కోణార్క్‌ చక్రం(Konark Wheel) ప్రధాన ఆకర్షణగా నిలిచింది. దీని ప్రత్యేకతను తెలుసుకోవడం కోసం పూర్తి వార్తను క్లిక్‌ చేయండి..!

09/09/2023 12:14(IST)

జీ20 విస్తరణ.. భారత్‌ చెరగని ముద్ర

భారత్‌ అధ్యక్ష స్థానంలో జీ20 గ్రూప్‌పై చెరగని ముద్ర వేసింది. తొలిసారి ఈ గ్రూప్‌ను విస్తరించింది. ఈ సందర్భంగా ప్రధాని మోదీ మాట్లాడుతూ.. ‘‘కొవిడ్‌ 19 సంక్షోభం తర్వాత ప్రపంచంలో విశ్వాస రాహిత్యం ఏర్పడింది. యుద్ధం ఈ అపనమ్మకాన్ని మరింత పెంచింది. కొవిడ్‌ను ఓడించిన మనం ఈ విశ్వాస రాహిత్యంపై కూడా విజయం సాధించవచ్చు’’ అని తెలిపారు.

పూర్తి వార్త కోసం క్లిక్‌ చేయండి

09/09/2023 11:29(IST)

నేమ్‌ప్లేట్‌లో ‘భారత్‌’..

ఈ సందర్భంగా ప్రధాని మోదీ కూర్చున్న స్థానంలోని నేమ్‌ ప్లేట్‌పై దేశం పేరును ‘ఇండియా’కు బదులు ‘భారత్‌’గా పేర్కొనడం ప్రాధాన్యత సంతరించుకుంది. ఇటీవల జీ20 విందు కోసం రాష్ట్రపతి పంపిన ఆహ్వాన పత్రికల్లో ‘ప్రెసిడెంట్ ఆఫ్‌ భారత్‌’ అని ముద్రించడం రాజకీయ దుమారం రేపిన విషయం తెలిసిందే.

09/09/2023 11:01(IST)

ఆఫ్రికా యూనియన్‌కు జీ20లో శాశ్వత సభ్యత్వం

జీ20 సదస్సులో ఆఫ్రికా యూనియన్‌కు శాశ్వత సభ్యత్వం లభించింది. ఈ విషయాన్ని ప్రకటించిన ప్రధాని మోదీ.. ఆఫ్రికా యూనియన్‌ అధినేత అజలి అసౌమనిని సాదరంగా గ్రూప్‌లోకి స్వాగతించారు. ఆయనను అభినందించి సభ్య దేశాలకు కేటాయించిన కుర్చీలో కూర్చోబెట్టారు.

09/09/2023 10:54(IST)

మొరాకో భూకంప మృతులకు ప్రధాని సంతాపం..

సదస్సు ప్రారంభానికి ముందు మొరాకోలో సంభవించిన భారీ భూకంపంపై ప్రధాని మోదీ తీవ్ర విచారం వ్యక్తం చేశారు. ఈ ప్రకృతి విపత్తులో ప్రాణాలు కోల్పోయిన వారికి సంతాపం ప్రకటించారు. ఈ విపత్కర పరిస్థితుల్లో మొరాకోకు భారత్‌ అండగా ఉంటుందని ఆపన్న హస్తం అందించారు.

09/09/2023 10:46(IST)

వేదిక వద్ద ఆకట్టుకున్న ఒడిశా కోణార్క్‌ చక్రం

జీ20 సదస్సు జరిగే భారత్‌ మండపం వద్ద.. ప్రపంచ నేతలకు ప్రధాని మోదీ స్వయంగా స్వాగతం పలికారు. ఈ ప్రదేశంలో బ్యాగ్రౌండ్‌లో కోణార్క్‌ చక్రం స్పష్టంగా కనిపించింది. ఈ చక్రం కదలిక.. సమయం, పురోగతి, నిరంతర మార్పును సూచిస్తోంది.

09/09/2023 10:30(IST)

కోణార్క్‌ చక్రం గురించి బైడెన్‌కు వివరించిన మోదీ

అమెరికా అధ్యక్షుడు జో బైడెన్‌ భారత్‌ మండపానికి చేరుకున్నారు. అగ్ర రాజ్యాధినేతను సాదరంగా స్వాగతించిన ప్రధాని మోదీ.. వేదిక ప్రాంగణంలో ప్రత్యేకంగా ఏర్పాటు చేసిన కోణార్క్‌ గురించి బైడెన్‌కు వివరించారు.

09/09/2023 10:23(IST)

తుర్కియే అధ్యక్షుడు తైపీ ఎర్డోగాన్‌, దక్షిణాఫ్రికా అధ్యక్షుడు సిరిల్‌ రమఫోసా, దక్షిణ కొరియా అధ్యక్షుడు యూన్‌ సుక్‌ ఇయోల్‌, జపాన్‌ ప్రధాని ఫుమియో కిషిదా, ఇటలీ ప్రధాని జార్జియా మెలోనీ తదితరులు కూడా భారత్‌ మండపానికి చేరుకున్నారు.

09/09/2023 10:23(IST)

రష్యా తరఫున విదేశాంగ మంత్రి.. చైనా నుంచి ప్రధాని

జీ20 సదస్సుకు రష్యా అధ్యక్షుడు పుతిన్‌ దూరమైన సంగతి తెలిసిందే. ఆయన స్థానంలో సెర్గీ లావ్రోవ్‌ సదస్సుకు హాజరయ్యారు. ఇక, చైనా అధ్యక్షుడు షీ జిన్‌పింగ్‌ కూడా రాకపోవడంతో ఆయన స్థానంలో ఆ దేశ ప్రధాని లి చియాంగ్‌ సదస్సులో పాల్గొంటున్నారు.

09/09/2023 10:00(IST)

భారత్‌ మండపానికి చేరుకుంటున్న ప్రపంచ నేతలు

జీ-20 సదస్సులో పాల్గొనేందుకు పలు దేశాల అధినేతలు, అంతర్జాతీయ సంస్థల ప్రతినిధులు భారత్‌ మండపానికి చేరుకుంటున్నారు. ఆస్ట్రేలియా ప్రధాని ఆంథోనీ అల్బనీస్‌, కెనడా ప్రధాని జస్టిన్‌ ట్రుడో, అర్జెంటీనా అధ్యక్షుడు అల్బర్టో ఫెర్నాండెజ్‌, సింగపూర్‌ ప్రధాని లీ హీన్‌ లూంగ్‌ తదితరులకు ప్రధాని మోదీ సాదర స్వాగతం పలికారు.

09/09/2023 09:50(IST)

ప్రపంచ నేతలకు స్వాగతం పలుకుతున్న మోదీ..

జీ-20 సదస్సు మరికాసేపట్లో ప్రారంభం కానుంది. సదస్సుకు హజరయ్యేందుకు ప్రపంచ నేతలు ఒక్కొక్కరిగా వేదిక వద్దకు చేరుకుంటున్నారు. వారికి ప్రధాని మోదీ స్వయంగా స్వాగతం పలుకుతున్నారు.

09/09/2023 09:43(IST)

ప్రపంచ నేతలకు రాష్ట్రపతి స్వాగతం..

జీ-20 సదస్సుకు హాజరయ్యేందుకు భారత్ విచ్చేసిన పలు దేశాల అధినేతలు, ఇతర అతిథులకు రాష్ట్రపతి ద్రౌపదీ ముర్ము స్వాగతం పలికారు. ‘వసుధైక - కుటుంబం’ అనే నినాదంతో భారత్‌ ఈ సదస్సుకు అధ్యక్షత వహిస్తోందని తెలిపారు. ఈ సదస్సు ఫలప్రదం కావాలని ప్రథమ పౌరురాలు ఆకాంక్షించారు.

09/09/2023 09:42(IST)

అందుకే.. జీ-20కి వచ్చా: రిషి సునాక్‌

బ్రిటన్ ప్రధానిగా బాధ్యతలు చేపట్టిన తర్వాత తొలిసారి భారత్‌కు వచ్చిన భారత సంతతి నేత రిషి సునాక్‌ ట్విటర్‌లో ఓ వీడియో పంచుకున్నారు. యూకే ప్రధాని రిషి సునాక్‌, ఆయన సతీమణి అక్షతా మూర్తి దిల్లీ ఎయిర్‌పోర్టులో దిగడం, దేశ రాజధాని రోడ్లపై వెళ్తున్న దృశ్యాలు, విద్యార్థులతో ముచ్చటించిన వీడియోను షేర్‌ చేశారు. ‘అందుకే నేను జీ-20కి వచ్చా’ అంటూ రాసుకొచ్చారు.

09/09/2023 09:42(IST)

జీ-20 శిఖరాగ్ర సంబరం.. సర్వాంగ సుందరంగా ముస్తాబైన దిల్లీ

సర్వాంగ సుందరంగా ముస్తాబైన దిల్లీ.. అతిరథ మహారథుల రాక.. అత్యంత కట్టుదిట్టమైన భద్రతల మధ్య ప్రపంచానికి దిశానిర్దేశం చేసే రెండు రోజుల జీ20 సదస్సు శనివారం ప్రారంభం కాబోతోంది. అంగరంగ వైభవంగా తీర్చిదిద్దిన ప్రగతి మైదాన్‌లోని భారత్‌ మండపంలో ఈ సదస్సు జరగబోతోంది. భారత్‌ తొలిసారిగా ఆతిథ్యమిస్తున్న ఈ సదస్సుపై భారీ అంచనాలే ఉన్నాయి. దక్షిణార్ధ గోళ దేశాల ఆందోళనలు, ఉక్రెయిన్‌ యుద్ధంతో నెలకొన్న దారుణ పరిస్థితులు, దిగజారుతున్న ఆర్థిక వ్యవస్థలకు పరిష్కారం చూపుతూ భౌగోళికంగా ముక్కలైన రాజకీయ వాతావరణానికి చికిత్స చేసి సమ్మిళిత వృద్ధి దిశగా ప్రపంచాన్ని పరుగులు పెట్టించడంపై ఈ సదస్సు దృష్టి సారించనుంది. పూర్తి వార్త కోసం క్లిక్‌ చేయండి