Konark Wheel: అతిరథులను స్వాగతించిన వేళ.. ఆకట్టుకున్న కోణార్క్‌ వీల్‌

దిల్లీ: దేశ రాజధాని దిల్లీలో జీ20 శిఖరాగ్ర సదస్సు( G20 Summit) ప్రారంభమైంది. ఇందుకు ప్రగతి మైదాన్‌లోని భారత్‌ మండపం వేదికైంది. ఈ సదస్సు కోసం విచ్చేసిన ప్రపంచ దేశాల అధినేతలకు వేదిక వద్ద ప్రధాని మోదీ(PM Modi) స్వయంగా ఆహ్వానం పలికారు. వారికి స్వాగతం పలికే ప్రదేశంలో బ్యాగ్రౌండ్‌లో కోణార్క్‌ చక్రం(Konark Wheel) ప్రధాన ఆకర్షణగా నిలిచింది. దేశ సంస్కృతిని ప్రతిబింబించే అనేక చిహ్నాలను ఈ మండపం వద్ద ఏర్పాటు చేశారు. వాటిల్లో ఈ చక్రం కూడా ఒకటి. ఈ చక్రం అమెరికా అధ్యక్షుడు బైడెన్‌ దృష్టిని ఆకర్షించింది. ప్రధాని మోదీ ఆయనకు ఈ చక్రం ప్రాముఖ్యతను వివరించారు.  

G20 Summit: జీ20 సదస్సు.. లైవ్‌ అప్‌డేట్స్‌

కోణార్క్‌ చక్రాన్ని(Konark Wheel) 13వ శతాబ్దంలో నరసింహదేవ-1 పాలనలో నిర్మించారు. దీని భ్రమణం.. సమయం, పురోగతి, నిరంతర మార్పును సూచిస్తుంది. ఇది ప్రజాస్వామ్య సిద్ధాంతాలు, సమాజ పురోగతి కోసం నిబద్ధతకు గుర్తుగా నిలుస్తోంది. ఈ చక్రాన్ని ఏర్పాటు చేసిన ప్రదేశంలోనే మోదీ దేశాల అధినేతలకు స్వాగతం పలికారు. ఇక్కడే బ్రిటన్ ప్రధాని రిషి సునాక్‌ను ఆత్మీయ హత్తుకొని స్వాగతించారు.