TRENDING TOPICS
IPL 2023

Feedback | E-PAPER | Pratibha

GT vs MI: ఫైనల్‌కు గుజరాత్‌.. ప్లేయర్‌ ఆఫ్‌ ది మ్యాచ్‌గా గిల్‌

ఐపీఎల్‌ 2023 సీజన్‌లో (IPL 2023) రెండో క్వాలిఫయర్‌లో ముంబయి ఇంటిముఖం పట్టింది. రెండో క్వాలిఫయర్‌లో గుజరాత్‌ చేతిలో 62 పరుగుల తేడాతో (GT vs MI) చిత్తుగా ఓడిపోయింది. గుజరాత్‌ నిర్దేశించిన 234 పరుగుల లక్ష్య ఛేదనకు దిగిన ముంబయి 18.2 ఓవర్లలో 171 పరుగులకు ఆలౌటైంది. సూర్యకుమార్‌ యాదవ్ (61), తిలక్ వర్మ (43), కామెరూన్ గ్రీన్ (30) మాత్రమే రాణించారు. మిగతా వారు విఫలం కావడం.. ఇషాన్‌ కిషన్‌ గాయం కారణంగా ఆడకపోవడం ముంబయికి ఇబ్బందిగా మారింది. గుజరాత్ బౌలర్లు మోహిత్ శర్మ 5 వికెట్లు.. షమీ 2, రషీద్ ఖాన్ 2, జాషువా లిటిల్ ఒక వికెట్ తీశారు. తొలుత బ్యాటింగ్‌ చేసిన గుజరాత్ 233/3 స్కోరు చేసింది. శుభ్‌మన్‌ గిల్ (129: 60 బంతుల్లో 7 ఫోర్లు, 10 సిక్స్‌లు) సెంచరీ సాధించడంతోపాటు సాయి సుదర్శన్‌ (43), హార్దిక్‌ పాండ్య (28*) దూకుడుగా ఆడేశారు. ఆదివారం టైటిల్ కోసం చెన్నై, గుజరాత్ జట్ల మధ్య ఫైనల్‌ మ్యాచ్‌ జరగనుంది.

Updated : 27 May 2023 00:52 IST

26/05/2023 23:59(IST)

గుజరాత్ టైటాన్స్‌ విజయం

కీలకమైన క్వాలిఫయర్‌ -2 మ్యాచ్‌లో ముంబయి ఇండియన్స్‌పై గుజరాత్ అద్భుత విజయం సాధించింది. దీంతో ఐపీఎల్ 2023 సీజన్‌ ఫైనల్‌కు చేరిన చెన్నైతో ఆదివారం కప్‌ కోసం తలపడనుంది. మోహిత్ శర్మ ఐదు వికెట్ల ప్రదర్శనతో (5/10) గుజరాత్ విజయంలో కీలక పాత్ర పోషించాడు. గుజరాత్ బౌలర్ల దెబ్బకు ముంబయి 18.2 ఓవర్లలో 171 పరుగులకు ఆలౌటైంది.

26/05/2023 23:50(IST)

మళ్లీ రెండు వికెట్లు

మోహిత్ ఈ ఓవర్‌లో మూడు బంతుల్లోనే రెండు వికెట్లు తీశాడు. జొర్డాన్‌ (2), పీయూశ్‌ చావ్లా (0)ను ఔట్‌ చేశాడు. తొలుత జొర్డాన్‌ను (16.1వ ఓవర్‌లో), ఆ తర్వాత చావ్లా (16.3వ ఓవర్‌లో) పెవిలియన్‌కు చేరాడు. ఈ ఓవర్‌లో కేవలం మూడు పరుగులే రావడంతో ముంబయి స్కోరు 17 ఓవర్లకు 164/9కి చేరింది. క్రీజ్‌లో కుమార్‌ కార్తికేయ (1*), బెహ్రాన్‌డార్ఫ్‌ (1*) ఉన్నారు.

26/05/2023 23:44(IST)

టిమ్‌ ఔట్

ముంబయి ఇండియన్స్‌ కష్టాల్లో పడింది. టిమ్‌ డేవిడ్ (2)ను రషీద్ ఖాన్‌ ఎల్బీగా ఔట్ చేశాడు. దీంతో 15.3 ఓవర్లలో 158 పరుగుల వద్ద ముంబయి ఏడో వికెట్‌ను కోల్పోయింది. ఈ ఓవర్‌లో కేవలం ఐదు పరుగులే రావడంతో ముంబయి స్కోరు 16 ఓవర్లకు 161/7. క్రీజ్‌లో జొర్డాన్, చావ్లా ఉన్నారు.

26/05/2023 23:40(IST)

మరో వికెట్‌

ముంబయి మరో వికెట్‌ను కోల్పోయింది. మోహిత్ శర్మ బౌలింగ్‌లో (14.5వ ఓవర్‌) విష్ణు వినోద్ (5) ఇచ్చిన సింపుల్ క్యాచ్‌ను హార్దిక్‌ ఒడిసిపట్టాడు. దీంతో 156 పరుగుల వద్ద ఆరో వికెట్‌ను నష్టపోయింది. ప్రస్తుతం క్రీజ్‌లో క్రిస్‌ జొర్డాన్, టిమ్‌ డేవిడ్ ఉన్నారు. చివరి ఐదు ఓవర్లలో ముంబయి విజయానికి 78 పరుగులు కావాలి.

26/05/2023 23:16(IST)

గ్రీన్‌ ఔట్

కామెరూన్ గ్రీన్ (30: 20 బంతుల్లో రెండు ఫోర్లు, రెండు సిక్స్‌లు) బౌల్డ్‌గా పెవిలియన్‌కు చేరాడు. జాషువా లిటిల్‌ బౌలింగ్‌లో బంతిని వికెట్ల మీదకు ఆడుకున్నాడు. దీంతో 11.2 ఓవర్లలో 124 పరుగుల వద్ద ముంబయి నాలుగో వికెట్‌ను నష్టపోయింది. ఈ ఓవర్‌లో కేవలం ఐదు పరుగులు మాత్రమే వచ్చాయి. దీంతో ముంబయి స్కోరు 12 ఓవర్లకు 128/4కి చేరింది. క్రీజ్‌లో సూర్యకుమార్ (37*), విష్ణు వినోద్ (3*) ఉన్నారు. ముంబయి 48 బంతుల్లో 106 పరుగులు చేయాలి.

26/05/2023 23:13(IST)

ఫ్రీ హిట్‌ వచ్చినా..

11 ఓవర్లు: నూర్ అహ్మద్‌ ‘నో బాల్’ వేయడం వల్ల వచ్చిన ఫ్రీహిట్‌ను సూర్యకుమార్‌ (35*) వృథా చేశాడు. ఈ ఓవర్‌లో గ్రీన్‌ (30*) అదిరిపోయే సిక్స్‌ కొట్టాడు. మొత్తం 13 పరుగులు రావడంతో ముంబయి స్కోరు 123/3కి చేరింది. వీరిద్దరూ నాలుగో వికెట్‌కు అర్ధశతక భాగస్వామ్యం నిర్మించారు.

26/05/2023 23:07(IST)

రషీద్‌ బౌలింగ్‌లో 15

10 ఓవర్లు: టాప్‌ బౌలర్‌ రషీద్‌ ఖాన్‌ బౌలింగ్‌లో ముంబయి బ్యాటర్లు సూర్యకుమార్ (33*), కామెరూన్ గ్రీన్ (21) మూడు బౌండరీలు రాబట్టారు. మొత్తం 15 పరుగులు రావడంతో ముంబయి స్కోరు 110/3కి చేరింది. చివరి పది ఓవర్లలో ముంబయి విజయానికి 124 పరుగులు కావాలి.

26/05/2023 22:50(IST)

తిలక్‌ ఔట్

6 ఓవర్లు: దూకుడుగా ఆడిన తిలక్ వర్మ (43: 14 బంతుల్లో 5 ఫోర్లు, 3 సిక్స్‌లు) రషీద్ ఖాన్‌ బౌలింగ్‌లో క్లీన్‌బౌల్డ్‌గా పెవిలియన్‌కు చేరాడు. పవర్‌ప్లే ఓవర్‌ చివరి బంతిని భారీ షాట్‌కు యత్నించి బౌల్డయ్యాడు. దీంతో సూర్యకుమార్‌ (12*)తో కలిసి మూడో వికెట్‌కు 51 పరుగుల భాగస్వామ్యానికి తెరపడింది. ప్రస్తుతం ముంబయి స్కోరు 72/3. క్రీజ్‌లో సూర్యతోపాటు కామెరూన్‌ గ్రీన్‌ ఉన్నాడు. రిటైర్డ్‌హర్ట్‌గా వెనుదిరిగిన గ్రీన్‌ మళ్లీ బ్యాటింగ్‌కు దిగాడు. ముంబయి విజయానికి 84 బంతుల్లో 162 పరుగులు కావాలి.

26/05/2023 21:50(IST)

తొలి బంతికి సిక్స్‌

19 ఓవర్లు: తొలి బంతికే సిక్స్‌ కొట్టినప్పటికీ మధ్వాల్ అద్భుతంగా బౌలింగ్‌ చేయడంతో ఈ ఓవర్‌లో 9 పరుగులు రావడంతో గుజరాత్ స్కోరు 214/2కి చేరింది. సాయ సుదర్శన్‌ (43*) రిటైర్డ్‌ఔట్‌గా వెనుదిరగడంతో క్రీజ్‌లోకి రషీద్ ఖాన్‌ వచ్చాడు.

26/05/2023 21:43(IST)

చివరి బంతికి ఫోర్

18 ఓవర్లు: గిల్‌ ఉన్నంత వరకు దూకుడుగా సాగిన గుజరాత్ ఇన్నింగ్స్‌ ఇప్పుడు కాస్త నెమ్మదించింది. ఈ ఓవర్‌లో బెహ్రాన్‌డార్ఫ్‌ ఏడు పరుగులు ఇచ్చాడు. చివరి బంతికి సాయి సుదర్శన్ (43*) బౌండరీ కొట్టాడు. దీంతో గుజరాత్ స్కోరు 205/2కి చేరింది.

26/05/2023 21:36(IST)

30లో వదిలాడు.. 129లో పట్టాడు

ఎట్టకేలకు ముంబయికి మరో వికెట్‌ దక్కింది. మధ్వాల్ బౌలింగ్‌లో శుభ్‌మన్‌ గిల్ (129) భారీ షాట్‌కు యత్నించి డీప్‌ మిడ్ వికెట్‌లోని టిమ్‌ డేవిడ్ చేతికి చిక్కాడు. గిల్ 30 పరుగుల వద్ద ఉన్నప్పుడు టిమ్‌ డేవిడే క్యాచ్‌ను వదిలేశాడు. ఈ ఓవర్‌లో మధ్వాల్ రెండు నో బాల్స్‌ వేశాడు. మొత్తం 15 పరుగులు రావడంతో గుజరాత్ స్కోరు 198/2కి చేరింది. క్రీజ్‌లో పాండ్య (5*), సాయి సుదర్శన్‌ (38*) ఉన్నారు.

26/05/2023 21:16(IST)

గిల్ సెంచరీ

గుజరాత్ ఓపెనర్ శుభ్‌మన్‌ గిల్ సెంచరీ బాదేశాడు. కేవలం 49 బంతుల్లోనే శతకం పూర్తి చేశాడు. ఈ సీజన్‌లో మూడో సెంచరీ కావడం విశేషం. 32 బంతుల్లో హాఫ్ సెంచరీ చేసిన గిల్.. ఇంకో 17 బంతుల్లోనే మరో అర్దశతకం సాధించాడు. గ్రీన్‌ వేసిన ఈ ఓవర్‌లో గిల్ (117*) రెండు సిక్స్‌లు, ఒక ఫోర్‌ కొట్టాడు. మొత్తం 19 పరుగులు రావడంతో గుజరాత్ స్కోరు 166/1కి చేరింది. సాయి సుదర్శన్‌తో (27*) కలిసి రెండో వికెట్‌కు 112 పరుగులను జోడించాడు.

26/05/2023 21:07(IST)

గిల్‌ దూకుడు

13 ఓవర్లు: చావ్లాకు మరోసారి బాదుడు తప్పలేదు. శుభ్‌మన్‌ గిల్ (98*) రెండు సిక్స్‌లు, ఫోర్‌ కొట్టాడు. మొత్తం 20 పరుగులు రావడంతో గుజరాత్ స్కోరు 139/1కి చేరింది. సాయి సుదర్శన్‌తో (20*) కలిసి రెండో వికెట్‌కు ఇప్పటి వరకు 85 పరుగులు జోడించాడు.

26/05/2023 20:58(IST)

గ్రీన్‌కు చిన్న గాయం

11 ఓవర్లు: కామెరూన్ గ్రీన్ ఏడు పరుగులు ఇచ్చాడు. ఇందులో సాయి సుదర్శన్ (18*) కొట్టిన బౌండరీ ఉంది. గిల్ (59*) ఐదో బంతిని బలంగా బాదాడు. అయితే గ్రీన్‌ క్యాచ్‌ అందుకొనేందుకు ప్రయత్నించాడు. ఈ క్రమంలో స్వల్పంగా గాయపడ్డాడు. ప్రస్తుతం గుజరాత్ స్కోరు 98/1.

26/05/2023 20:34(IST)

సాహా ఔట్

పీయూశ్ చావ్లా బ్రేక్ ఇచ్చాడు. వృద్ధిమాన్ సాహా (18) ముందుకొచ్చి ఆడబోయి స్టంపౌట్‌గా పెవిలియన్‌కు చేరాడు. వైడ్‌గా వేసిన బంతిని ఇషాన్‌ కిషన్‌ అద్భుతంగా ఒడిసి పట్టి స్టంపింగ్‌ చేశాడు. దీంతో 54 పరుగుల వద్ద గుజరాత్ తొలి వికెట్‌ను నష్టపోయింది. ఈ ఓవర్‌లో ఎనిమిది పరుగులు రావడంతో గుజరాత్ స్కోరు 59 /1కి చేరింది. క్రీజ్‌లో శుభ్‌మన్‌ గిల్ (35*), సాయి సుదర్శన్ (4*) ఉన్నారు.

26/05/2023 20:30(IST)

గిల్‌ దూకుడు

6 ఓవర్లు: ఆరంభంలో కాస్త ఆచితూచి ఆడిన ఓపెనర్లు దూకుడు పెంచారు. జొర్డాన్‌ వేసిన ఈ ఓవర్‌లో శుభ్‌మన్‌ గిల్ (31*) సిక్స్‌, ఫోర్ కొట్టాడు. ఐదో బంతిని షాట్‌ కొట్టేందుకు గిల్ యత్నించగా.. మిడాఫ్‌లోని టిమ్‌ డేవిడ్‌ క్యాచ్‌పట్టడంలో విఫలమయ్యాడు. క్లిష్టమైందే అయినప్పటికీ క్యాచ్‌ పట్టి ఉంటే ఓపెనర్ల జోడీని విడదీసే అవకాశం వచ్చేది. ఈ ఓవర్‌లో 12 పరుగులు రావడంతో గుజరాత్ స్కోరు 50/0.

26/05/2023 20:24(IST)

గిల్‌కే ఆరెంజ్‌ క్యాప్‌!

ఐపీఎల్‌లో అత్యధిక పరుగులు చేసిన బ్యాటర్‌కు ఇచ్చే ఆరెంజ్‌ క్యాప్‌ శుభ్‌మన్ గిల్ సొంతమయ్యే అవకాశాలు ఎక్కువగా ఉన్నాయి. ఇప్పటి వరకు అగ్రస్థానంలో ఉన్న డుప్లెసిస్‌ (730)ను గిల్ అధిగమించాడు. ప్రస్తుతం 742 పరుగులతో కొనసాగుతున్నాడు.

26/05/2023 19:56(IST)

ఫస్ట్‌క్లాస్‌ గేమ్‌ ఆడాలి: హార్దిక్‌

మేం కూడా బౌలింగ్ ఎంచుకునేవాళ్లం. నాకౌట్లు, క్వాలిఫయర్స్‌లో అత్యుత్తమ గేమ్‌ ఆడాల్సి ఉంటుంది. ప్రతి దాని గురించి పక్కాగా ప్లాన్‌ చేసుకుని బరిలోకి దిగుతాం. నేను కూడా బౌలింగ్‌ చేస్తా. మా జట్టులో రెండు మార్పులు ఉన్నాయి. జాషువా లిటిల్, సాయి సుదర్శన్‌ తుది జట్టులోకి వస్తారు. శనక, నల్కాండే ఉండరు.

26/05/2023 19:47(IST)

ముంబయిదే టాస్‌

రెండో క్వాలిఫయర్ మ్యాచ్‌లో ముంబయి ఇండియన్స్‌ టాస్‌ నెగ్గింది. కెప్టెన్‌ రోహిత్ శర్మ బౌలింగ్‌ ఎంచుకున్నాడు. ‘‘వర్షం పడటం వల్ల పిచ్‌ బౌలింగ్‌కు అనుకూలంగా ఉండే అవకాశం ఉంది. ఈ సీజన్‌లో మేం ఛేజింగ్‌ బాగా చేశాం. జట్టులో ఒక మార్పు ఉంది. షోకీన్ స్థానంలో కుమార్‌ కార్తికేయ తుది జట్టులోకి వస్తాడు’’ అని రోహిత్ తెలిపాడు.

26/05/2023 19:07(IST)

ఆగిన వర్షం.. టాస్‌ ఆలస్యం

అహ్మదాబాద్‌లో వర్షం ఆగడంతో మ్యాచ్‌ ప్రారంభమయ్యేందుకు గ్రౌండ్‌ సిబ్బంది శ్రమిస్తున్నారు. కవర్లను తీసేసి అవుట్‌ఫీల్డ్‌ను సిద్ధం చేస్తున్నారు. ఈ క్రమంలో టాస్‌ పడేందుకు ఆలస్యం కానుంది. ఇరు జట్ల ఆటగాళ్లూ మైదానంలో సందడి చేస్తున్నారు. గుజరాత్‌ కెప్టెన్‌ హార్దిక్‌ పాండ్య, ముంబయి కెప్టెన్‌ రోహిత్ శర్మ పిచ్‌ను పరిశీలించారు.

26/05/2023 19:03(IST)

మ్యాచ్‌ రద్దయితే.. పరిస్థితి ఇదీ!

గుజరాత్, ముంబయి జట్ల మధ్య కీలకమైన రెండో క్వాలిఫయర్‌ మ్యాచ్‌కు వర్షం అడ్డుగా రావడంతో టాస్‌ కాస్త ఆలస్యం కానుంది. ఒక వేళ వర్షం వల్ల మ్యాచ్‌ రద్దు అయితే గుజరాత్ టైటాన్స్‌ ఫైనల్‌కు చేరుతుంది. లీగ్ స్టేజ్‌లో ముంబయి (16 పాయింట్లు) కంటే గుజరాత్‌కే (20 పాయింట్లు) ఎక్కువ పాయింట్లు ఉన్నాయి. దీంతో గుజరాత్‌ ఫైనల్‌కు వెళ్లే అవకాశం ఉంది.

26/05/2023 17:25(IST)

నాడు స్థానిక టెన్నిస్ బాల్ క్రికెట్ లీగుల నుంచి మధ్వాల్‌ను బ్యాన్ చేశారట.. ఎందుకంటే..?

లఖ్‌నవూ(Lucknow Supergiants)పై అద్భుత ప్రదర్శన చేసిన ముంబయి పేసర్‌ ఆకాశ్‌ మధ్వాల్‌(Akash Madhwal)పై ప్రశంసల జల్లు కురుస్తోంది. కీలక మ్యాచ్‌లో కేవలం ఐదే పరుగులు ఇచ్చి ఐదు వికెట్లు పడగొట్టి ముంబయికి చిరస్మరణీయ విజయాన్ని అందించాడు ఈ సంచలన బౌలర్‌. ముంబయి(Mumbai Indians) జట్టుకు మరో రత్నం దొరికిందని పలువురు మెచ్చుకుంటుండగా.. మధ్వాల్‌ సోదరుడు ఆశిష్‌ అతడి క్రికెట్‌ నేపథ్యం పై ఆసక్తికర విషయాలు పంచుకున్నాడు. తన స్వగ్రామంలో మధ్వాల్‌ను క్రికెట్‌ ఆడకుండా బ్యాన్‌ చేశారని.. ఎందుకంటే వారికి అతడు చాలా ప్రమాదకరంగా మారాడని వివరించాడు. పూర్తి వివరాలు కావాలంటే ఇక్కడ క్లిక్‌ చేయండి

26/05/2023 17:19(IST)

ముంబయిపై హార్దిక్‌ కామెంట్స్‌కు రోహిత్‌ కౌంటర్‌.. హీటెక్కిన సమరం..!

ఇటీవల జరిగిన ఓ ఇంటర్వ్యూలో హార్దిక్‌ పాండ్యా జట్ల తీరుపై వ్యాఖ్యలు చేశారు. ‘‘విజయాన్ని సాధించడానికి రెండు మార్గాలున్నాయి. ఒకటి.. పలు చోట్ల నుంచి మంచి ఆటగాళ్లను జట్టులో చేర్చుకొని విజయం సాధించడం. ముంబయి ఇలానే చేస్తుందనుకుంటాను. గతంలో మేము విజయం సాధించిన సమయాల్లో ఇలానే చేశాం. రెండోది.. మనం విజయం సాధించడానికి అవసరమైన మంచి వాతావరణం సృష్టించడం. ఇది చెన్నై సూపర్‌కింగ్స్‌ విధానం. ఆ ఆటగాళ్లు ఏవరైనా సరే.. వారికి సౌకర్యవంతమైన పరిస్థితులు కల్పించి.. వారి నుంచి అత్యుత్తమ ఫలితాన్ని రాబడుతుంది. అదే నాకు స్ఫూర్తిమంతంగా అనిపించింది. అత్యుత్తమ ఆటగాళ్లు ఉండటం కాదు.. అత్యుత్తమ వాతావరణం ఉండాలి’’ అని ఈ నెల మొదట్లో జియో సినిమాకు ఇచ్చిన ఇంటర్వ్యూలో పేర్కొన్నాడు. చాలా వరకు సోషల్‌మీడియాలో ఇటువంటి విమర్శలు గతంలో ముంబయిపై వినిపించేవి. బుమ్రా, మలింగా, రోహిత్‌, పాండ్యా బ్రదర్స్‌, డికాక్‌, ఇషాన్‌ వంటి వారితో ఆ జట్టు అత్యంత శక్తిమంతంగా ఉండేది.

26/05/2023 17:18(IST)

రోహిత్‌కు మద్దతుగా ఇర్ఫాన్‌ ట్వీట్

మరోవైపు ఎంఐ మాజీ ఆటగాడు ఇర్ఫాన్‌ పఠాన్‌ కూడా రోహిత్ వ్యాఖ్యలకు మద్దతుగా ట్వీట్‌ చేశాడు. ‘‘ఎక్కడి గ్రాడ్యుయేషన్‌ మిమ్మల్ని సూపర్‌ స్టార్‌గా చేస్తుందో.. అలాంటి యూనివర్శిటీనే ముంబయి’’ అని పేర్కొన్నాడు. 2021 ఐపీఎల్‌లో అంచనాలకు తగ్గట్లు రాణించకపోవడంతో ముంబయి జట్టు హార్దిక్‌ను వదులుకొన్న విషయం తెలిసిందే. ఆ తర్వాత అతడు గుజరాత్‌ బాధ్యతలు చేపట్టి నిరుడు ఆ జట్టును ఛాంపియన్‌గా నిలిపాడు. తాజాగా హార్దిక్‌ వర్సెస్‌ ముంబయి మాటల యుద్ధం క్వాలిఫయర్‌-2ను మరింత ఆసక్తికరంగా మార్చేసింది.

26/05/2023 17:17(IST)

మీకు ఎలానో వీరికీ అంతే..

పాండ్యా వ్యాఖ్యలపై స్పందించేందుకు ముంబయి కెప్టెన్‌ రోహిత్‌ సమయం కోసం వేచి చూశాడు. ఇటీవల ఆకాశ్‌ మధ్వాల్‌ (5/5) ప్రదర్శనతో రోహిత్‌కు అద్భుతమైన అవకాశం లభించింది. రెండేళ్ల తర్వాత ప్లేఆఫ్స్‌ చేరిన ముంబయి ఎలిమినేటర్‌ మ్యాచ్‌లో లఖ్‌నవూపై సంచలన విజయం నమోదు చేసింది. ఈ మ్యాచ్‌లో యువ ఆటగాడు ఆకాశ్‌ తూటాల్లాంటి బంతులతో లఖ్‌నవూ బ్యాటింగ్‌ ఆర్డర్‌ను పేకమేడలా కూల్చేశాడు. మ్యాచ్‌ అనంతరం రోహిత్‌ జియో సినిమాతో మాట్లాడుతూ ‘‘నిజంగా చెబుతున్నాను బుమ్రా, హార్దిక్‌ ఉన్నప్పుడు ఎలా ఉందో.. అదే బాటలో వెళుతోంది. ఇప్పుడు తిలక్‌ వర్మ, నేహాల్‌ వధేరా అదే విధంగా ఆడుతున్నారు. రెండేళ్ల తర్వాత చూడండి.. ప్రజలు ఇది సూపర్‌ స్టార్లతో నిండిన జట్టు అంటారు. సోదరా.. మేము వారిని తయారు చేస్తున్నాం. మేము వెళ్లి వారి ఆటతీరును పరిశీలిస్తాం. మా జట్టు వెళ్లి వారిని ఇక్కడకు తెచ్చుకుంటోంది’’ అని రోహిత్‌ వివరించాడు. ఇది పాండ్యా వ్యాఖ్యలకు రోహిత్‌ సూటిగా చెప్పిన సమాధానం. వాస్తవానికి ముంబయి ఇండియన్స్‌ జట్టు దేశ వ్యాప్తంగా ప్రతిభావంతులను గుర్తించి వారిని సానపట్టేందుకు ప్రత్యేక కార్యక్రమం నిర్వహిస్తోంది. టీమిండియా మాజీ కోచ్‌ జాన్‌రైట్‌ ఇటీవల ముంబయి ఇండియన్స్‌ ప్రతిభాన్వేషణ కార్యక్రమాన్ని మెచ్చుకొన్నాడు. రైట్‌ చాలా కాలం ముంబయి కోచ్‌గా వ్యవహరించాడు.

26/05/2023 17:16(IST)

మాటల యద్ధం

గుజరాత్‌ టైటాన్స్‌(GT) - ముంబయి ఇండియన్స్‌(MI) మధ్య ఐపీఎల్‌-16 (IPL-16) క్వాలిఫయర్‌-2 మ్యాచ్‌కు ముందే మాటల యుద్ధానికి తెరలేచింది. ముంబయి జట్టుపై గతంలో గుజరాత్‌ కెప్టెన్‌ హార్దిక్‌ పాండ్యా(Hardik pandya) చేసిన కామెంట్లు.. ఈ మ్యాచ్‌ను ఇప్పుడు ఉత్కంఠగా మార్చేశాయి. ఈ కామెంట్స్‌ను సీరియస్‌గా తీసుకొన్న ముంబయి కెప్టెన్‌ రోహిత్‌(Rohit sharma) ఇటీవల హార్దిక్‌కు జవాబిచ్చాడు. దీనికి తోడు ఎంఐ మాజీ ఆటగాడు ఇర్ఫాన్‌ పఠాన్‌(Irfan pathan) కూడా రోహిత్‌కు మద్దతుగా నిలిచాడు. ఈ వ్యాఖ్యలు నేటి మ్యాచ్‌కు ముందే హీట్‌ను పెంచేశాయి. రోహిత్‌ వ్యాఖ్యలు సూటిగా పాండ్యాను లక్ష్యంగా చేసుకునేలా ఉన్నాయి. ఫలితంగా మ్యాచ్‌ హార్దిక్‌ వర్సెస్‌ రోహిత్‌ లేదా హార్దిక్‌ వర్సెస్‌ ముంబయి ఇండియన్స్‌గా మారిపోయింది.

App

GT vs MI: ఫైనల్‌కు గుజరాత్‌.. ప్లేయర్‌ ఆఫ్‌ ది మ్యాచ్‌గా గిల్‌

తాజా వార్తలు (Latest News)

Hyderabad: ‘గ్యాంగ్’ ‘స్పెషల్ 26’ సినిమాలు చూసి.. సికింద్రాబాద్‌లో భారీ చోరి

Moscow: మాస్కోపై డ్రోన్ల దాడి..!

Chandrababu: వైకాపా ప్రభుత్వ నాలుగేళ్ల పాలనపై చంద్రబాబు వ్యంగ్యాస్త్రాలు

ఫోన్‌ కోసం రిజర్వాయర్‌నే తోడేసిన ఘటన.. పర్మిషన్‌ ఇచ్చిన అధికారికి జరిమానా!

CSK vs GT: సీఎస్‌కేను భయపెట్టిన చెన్నై కుర్రాడు.. గుజరాత్ జట్టులో ‘ఇంపాక్ట్‌’ అతడు!

Vijayawada: చట్టబద్ధంగా రావాల్సిన వాటి కోసం అడగడం తప్పా?: బొప్పరాజు

సుఖీభవ

చదువు