Breaking | Feedback | ePratibha | E-PAPER | Pratibha

IRE vs IND: మూడో టీ20 వర్షార్పణం.. సిరీస్‌సు కైవసం చేసుకున్న భారత్

ఐర్లాండ్‌తో మూడు టీ20ల సిరీస్‌ని 3-0 క్లీన్‌స్వీప్‌ చేయాలనుకున్న టీమ్‌ఇండియా ఆశలపై వరుణుడు నీళ్లుచల్లాడు. బుధవారం జరగాల్సిన మూడో టీ20 వర్షం కారణంగా టాస్‌ పడకుండానే రద్దయింది.

Updated : 23 Aug 2023 23:01 IST

23/08/2023 22:33(IST)

మూడో టీ20 రద్దు.. సిరీస్‌ను కైవసం చేసుకున్న భారత్

23/08/2023 20:53(IST)

కొనసాగుతున్న వర్షం..

ఐర్లాండ్, భారత్ మధ్య జరగాల్సిన మూడో టీ20 మ్యా్‌చ్‌కు వరుణుడు ఆటంకం కలిగిస్తున్నాడు. దాదాపు రెండున్నర గంటల నుంచి చిన్నపాటి వర్షం కురుస్తోంది. 9: 15 గంటల తర్వాత నుంచి ఓవర్ల కుదింపు ఉంటుందని బీసీసీఐ పేర్కొంది.

23/08/2023 20:05(IST)

ఇంగ్లాండ్‌, నెదర్లాండ్స్‌తో భారత్ వార్మప్‌ మ్యాచ్‌లు

వన్డే ప్రపంచకప్‌నకు ముందు భారత్ రెండు అధికారిక వార్మప్‌ మ్యాచ్‌లు ఆడనుంది. సెప్టెంబరు 30న గుహవాటిలో ఇంగ్లాండ్‌తో, అక్టోబర్‌ 3న తిరువనంతపురంలో నెదర్లాండ్స్‌తో తలపడనుంది. ఈ మేరకు ఐసీసీ ప్రకటన చేసింది.

23/08/2023 19:55(IST)

‘బుక్‌ మై షో’లో ప్రపంచకప్‌ టికెట్లు

భారత్ వేదికగా ఈ ఏడాది జరగనున్న వన్డే ప్రపంచ కప్‌ టికెట్లు ప్రముఖ టికెట్‌ బుకింగ్‌ వేదిక ‘బుక్‌ మై షో’లో అందుబాటులో ఉండనున్నాయి. ఈ మేరకు బుక్‌ మై షోతో ఒప్పందం కుదుర్చుకున్నట్లు బీసీసీఐ ఒక ప్రకటనలో తెలిపింది.

23/08/2023 19:04(IST)

చంద్రయాన్‌-3 ప్రయోగం విజయవంతం.. ఆనందంలో మునిగి తేలిన టీమ్‌ఇండియా క్రికెటర్లు

కోట్ల మంది భారతీయుల ఎదురుచూపులు ఫలించాయి. అగ్రరాజ్యాలకే అందని ద్రాక్షగా మారిన జాబిల్లి దక్షిణ ధ్రువంపై భారత్‌ సరికొత్త చరిత్రను లిఖించింది. జాబిల్లిపై చంద్రయాన్‌-3 విజయవంతంగా అడుగుపెట్టింది. ఇస్రో చేపట్టిన చంద్రయాన్‌-3 ప్రయోగాన్ని యావత్‌ ప్రపంచం ఎంతో ఆసక్తిగా తిలకించింది. జాబిల్లిపై దిగే ఉత్కంఠ క్షణాలను చూసేందుకు టెలివిజన్‌ల ముందు కూర్చోవడంతోపాటు అటు సోషల్‌ మీడియాకు లక్షల మంది అతుక్కుపోయారు. టీ20 సిరీస్‌ కోసం ఐర్లాండ్‌లో ఉన్న టీమ్‌ఇండియా ఆటగాళ్లు కూడా టీవీలో చంద్రయాన్‌-3 ల్యాండింగ్‌ను వీక్షించారు. ప్రయోగం విజయవంతం కాగానే చప్పట్లు కొడుతూ ఆనందంలో ముగినితేలారు.

23/08/2023 16:56(IST)

ఐర్లాండ్‌తో ఆఖరి టీ20 మ్యాచ్‌.. ఎవరికి విశ్రాంతి.. ఎవరికి అవకాశం?

మూడు టీ20ల సిరీస్‌ను పట్టేశాం.. ఇక చివరి మ్యాచ్‌లోనూ గెలిచి క్లీన్‌స్వీప్‌ చేసి భారత్‌కు బయల్దేరడమే తరువాయి. బౌలింగ్‌లో ఫిట్‌నెస్ నిరూపించుకోవాల్సిన అవసరం కూడా ఎవరికీ లేదు. మినీ టోర్నీ ఆసియా కప్‌ కోసం జట్టును కూడా ప్రకటించారు. ఇక మిగిలిన యువకులకు అవకాశం ఇవ్వడంపైనే టీమ్‌ఇండియా దృష్టి పెట్టాల్సి ఉంటుంది. డబ్లిన్‌ వేదికగా జరగనున్న మూడో టీ20 మ్యాచ్‌ రివ్యూపై ఓ లుక్కేద్దాం..

23/08/2023 16:55(IST)

రెండింట్లో విఫలమైనా తిలక్‌ రెడీనే..

ఆసియా కప్‌ కోసం ప్రకటించిన జట్టులో యువ ఆటగాడు తిలక్‌ వర్మకు చోటు దక్కింది. అతడిని ఎంపిక చేయడంపై మాజీ క్రికెటర్లు, అభిమానులు ఆనందం వ్యక్తం చేశారు. మిడిలార్డర్‌లో కీలకంగా మారతాడని, బౌలింగ్‌ చేయగలడం అదనపు బలమని పేర్కొంటూ వ్యాఖ్యలు చేస్తున్నారు. తాజాగా భారత మాజీ ఆటగాడు సంజయ్ మంజ్రేకర్ సెలెక్షన్ కమిటీ నిర్ణయంపై ప్రశంసల వర్షం కురిపించాడు.

‘‘తిలక్‌ వర్మ అద్భుతమైన ఫామ్‌లో ఉన్నాడు. అతడి దేశవాళీ క్రికెట్ గణాంకాలతోపాటు విండీస్‌ సిరీస్‌లో ప్రదర్శన సూపర్. అయితే, గత రెండు టీ20 మ్యాచుల్లో విఫలమైనప్పటికీ.. వన్డే క్రికెట్‌ కోసం సిద్ధంగా ఉన్నాడనే భావిస్తున్నా. అందుకే టీమ్‌ఇండియా నుంచి పిలుపొచ్చింది. అతడి బ్యాటింగ్‌ వీక్‌నెస్‌ను కనుక్కోవడం కష్టమే. నాలుగు, ఐదు, ఆరో స్థానాల్లో నాణ్యమైన క్రికెటర్లు ఉండాలని ఇంతకముందే చెప్పా. టాప్‌-3లో అద్భుతమైన ఆటగాళ్లు ఉన్నారు. టీమ్‌ఇండియా సెలెక్షన్ కమిటీ స్పష్టతతో ఉండటం అభినందనీయం. అజిత్‌ అగార్కర్‌, రోహిత్ ప్రెస్ కాన్ఫరెన్స్‌ సందర్భంగా ఇచ్చిన సమాధానాలు ఆకట్టుకున్నాయి. కేఎల్ రాహుల్ విషయంలోనూ ఇచ్చిన సమాధానం ముఖ్యం. రాహుల్‌ కోలుకుని వచ్చాక కూడా అదనంగా మరొక వికెట్ కీపర్‌ను బ్యాకప్‌గా ఉంచారు. ఎందుకు అవసరమనేదానిపై ఇచ్చిన వివరణ బాగుంది. ఇదే స్క్వాడ్‌ ప్రపంచ కప్‌లోనూ బరిలోకి దిగే అవకాశాలు ఎక్కువ. ఇందులో నుంచి ఓ ఇద్దరు ఆటగాళ్లు మాత్రమే బయటకు వెళ్తారు. మరీ ముఖ్యంగా ఒక స్పిన్నర్‌ను తీసేసే అవకాశం ఉంది. మరొక వికెట్ కీపర్‌ లేదా ఫాస్ట్‌ బౌలర్‌ కూడా ఉండక పోవచ్చు’’ అని మంజ్రేకర్ వ్యాఖ్యానించాడు.

23/08/2023 16:53(IST)

క్లీన్‌స్వీప్‌పై భారత్‌ కన్ను

క్లీన్‌స్వీప్‌పై కన్నేసిన టీమ్‌ఇండియా ఐర్లాండ్‌తో ఆఖరి పోరుకు సిద్ధమైంది. బుధవారమే చివరిదైన మూడో టీ20. తొలి రెండు మ్యాచ్‌ల్లో విజయంతో భారత్‌ ఇప్పటికే సిరీస్‌ను చేజిక్కించుకున్న సంగతి తెలిసిందే. గాయాల నుంచి కోలుకుని పునరాగమనం చేసిన పేస్‌ బౌలర్లు జస్‌ప్రీత్‌ బుమ్రా, ప్రసిద్ధ్‌ కృష్ట ఫిట్‌నెస్‌ను నిరూపించుకోవడం జట్టుకు సంతోషాన్నిచ్చే విషయం. మరోవైపు రిజర్వ్‌ ఆటగాళ్లను పరీక్షించేందుకు ఈ నామమాత్రమైన మ్యాచ్‌ టీమ్‌ఇండియాకు ఓ చక్కని అవకాశం. పూర్తి వార్త కోసం క్లిక్‌ చేయండి