కేంద్ర విద్యుత్తుశాఖ ఆదేశం
వాటితో పర్యావరణానికి చేటేనని స్పష్టం
జెన్‌కో వినతితో గడువు పొడిగింపు
ఈనాడు - హైదరాబాద్‌

కాలుష్యాన్ని అధికంగా వెలువరిస్తున్న పాత విద్యుత్కేంద్రాల మూతకు వచ్చే మార్చి వరకూ గడువును పొడిగిస్తూ కేంద్ర విద్యుత్తుశాఖ తాజాగా ఆదేశాలు జారీచేసింది. కొత్తగూడెంలో మొత్తం 720 మెగావాట్ల 8 విద్యుత్కేంద్రాలను గత నెలాఖరుకల్లా మూసివేయాలని గతంలో కేంద్రం గడువు పెట్టింది. వీటిలో వచ్చే మార్చి వరకూ విద్యుదుత్పత్తికి అవకాశం ఇవ్వాలని ఇటీవల తెలంగాణ జెన్‌కో కేంద్ర విద్యుత్తు మండలి (సీఈఏ)కి లేఖ రాసింది. దీనికి స్పందించి మండలి ఉన్నతాధికారుల బృందం తాజాగా హైదరాబాద్‌ వచ్చి జెన్‌కోలో పరిశీలన జరిపింది. ఎట్టి పరిస్థితుల్లో మార్చి కల్లా పాతవాటిని మూసివేయాలని సూచిస్తూ గడువు పొడిగింపునకు అంగీకారం తెలిపింది.

* కొత్తగూడెంలో మొత్తం 8 చిన్న విద్యుత్కేంద్రాలను 3 దశాబ్దాల క్రితం దశల వారీగా నిర్మించారు. వీటిలో 4 కేంద్రాలు ఒక్కొక్కటి 60 మెగావాట్లు, మరో 4 ఒక్కొక్కటి 120 మెగావాట్ల విద్యుదుత్పత్తి సామర్థ్యం గలవి. తెలంగాణ ఏర్పడ్డాక వీటి పక్కనే 800 మెగావాట్ల కొత్త విద్యుత్కేంద్రాన్ని జెన్‌కో నిర్మించింది. దీని నిర్మాణానికి పర్యావరణ అనుమతి(ఈసీ) ఇచ్చినప్పుడు.. 2019 డిసెంబరుకల్లా పాత 8 కేంద్రాలను మూసివేయాలని కేంద్ర పర్యావరణశాఖ గడువు విధించింది. పాత కేంద్రాల నుంచి అధికంగా కాలుష్యం వెలువడుతున్నందున వాటిలో విద్యుదుత్పత్తి పర్యావరణానికి మంచిది కాదని ఈ నిబంధన పెట్టింది.

* గత నవంబరు 28న కొత్త 800 మెగావాట్ల కేంద్రాన్ని వార్షిక మరమ్మతుల కోసం మూసివేశారు. మరమ్మతులు చేస్తుండగా టర్బైన్‌ పాడైనట్లు గుర్తించారు. కొత్త కేంద్రాన్ని నిర్మించిన బీహెచ్‌ఈఎల్‌ (భెల్‌)కే మరమ్మతు బాధ్యత ఉంది. ఈ నేపథ్యంలో ఉత్తరాఖండ్‌లోని హరిద్వార్‌ వద్ద గల భెల్‌ ప్లాంటుకు టర్బైన్‌ తరలించి మరమ్మతు చేయాలని నిర్ణయించారు. ఈ మరమ్మతు పూర్తయి తిరిగి 800 మెగావాట్ల ఉత్పత్తి ప్రారంభం కావడానికి మార్చి వరకూ సమయం పడుతుంది కనుక అప్పటి వరకూ ఉత్పత్తికి అనుమతించాలని జెన్‌కో కేంద్రానికి విన్నవించింది.

ఉదయం అధికం.. రాత్రి తక్కువ...

విద్యుత్‌ డిమాండ్‌లో హెచ్చుతగ్గులు అధికంగా ఉండటంతో ఉత్పత్తి, సరఫరాలపై జెన్‌కో, విద్యుదుత్పత్తి సంస్థ(డిస్కం)లు అప్రమత్తంగా ఉంటున్నాయి. రబీ పంటలకు ఉదయం పూట వ్యవసాయ బోర్ల కరెంటు వినియోగం అధికంగా ఉంటున్నందున డిమాండు పెరుగుతోంది. తిరిగి రాత్రి చలి, వ్యవసాయ వినియోగం తగ్గడం వల్ల డిమాండ్‌ పడిపోతోంది. పెరుగుదల సమయంలో పగటిపూట సౌర, జలవిద్యుత్‌ రాష్ట్రాన్ని ఆదుకుంటున్నాయి. కొంత కరెంటును బయట కొంటున్నారు. సాయంత్రం నుంచి డిమాండ్‌ పడిపోయిన సమయంలో థర్మల్‌ కేంద్రాల్లో విద్యుదుత్పత్తి తగ్గించి సరఫరాను నియంత్రిస్తున్నారు.