close

తాజా వార్తలు

‘ఉత్తమ్‌’ కంచుకోటను బద్దలుకొట్టిన సైదిరెడ్డి

 హుజూర్‌నగర్‌లో తెరాస విజయం

ఇంటర్నెట్ డెస్క్‌: ఉమ్మడి నల్గొండ జిల్లాలోని హుజూర్‌ నగర్ ఉప ఎన్నికలు రాష్ట్ర వ్యాప్తంగా అందరి దృష్టిని ఆకర్షించాయి. తక్కువ సమయంలోనే ఎన్నికలు నిర్వహించడంతో ప్రచారం కూడా ‘నువ్వా నేనా’ అన్నట్లు సాగింది. తెరాస ప్రభుత్వం రాష్ట్ర వ్యాప్తంగా తెచ్చిన సంక్షేమ పథకాలతో ఆ పార్టీ అభ్యర్థి శానంపూడి సైదిరెడ్డి గెలుపుపై ధీమా ప్రదర్శించారు. మరోవైపు కాంగ్రెస్‌కు హుజూర్‌నగర్‌ కంచుకోట కావడంతో విజయంపై ఆ పార్టీ అభ్యర్థి పద్మావతి రెడ్డి కూడా నమ్మకంగా ఉన్నారు. అనూహ్యంగా భాజపా, తెదేపా కూడా రేసులోకి వచ్చాయి. కమలం పార్టీ నుంచి కోటా రామారావు , తెదేపా నుంచి కిరణ్మయి బరిలోకి దిగారు. ఈ ఎన్నికల్లో 28 మంది అభ్యర్థులు పోటీ చేయగా..ప్రధాన పోరు మాత్రం తెరాస-కాంగ్రెస్‌ మధ్యనే నడిచింది. చివరికి గెలుపు మాత్రం గులాబీ నేతనే వరించింది. తెరాస అభ్యర్థి శానంపూడి సైదిరెడ్డి 43,358 ఓట్ల ఆధిక్యంతో ఘన విజయం సాధించారు.

ప్రచారంలో పదునైన విమర్శలు
ప్రచారానికి తక్కువ సమయం లభించడంతో కాంగ్రెస్‌-తెరాసలు వాడివేడి విమర్శలు చేసుకొన్నారు. హస్తం పార్టీ నుంచి ఎంపీలు రేవంత్‌ రెడ్డి, ఉత్తమ్‌ కుమార్‌ రెడ్డి జోరుగా ప్రచారం చేశారు. తెరాస ప్రభుత్వ పాలనలోని  లోటు పాట్లను ప్రజల్లోకి బలంగా తీసుకెళ్లే ప్రయత్నం చేశారు. ఎన్నికల సమయానికి ఆర్టీసీ సమ్మె కూడా మొదలుకావడంతో దానినే ప్రధానాంశంగా చేసుకున్నారు. 
మరోవైపు తెరాస కూడా ఏ మాత్రం తగ్గకుండా ప్రచారం చేసింది. ముఖ్యమంత్రి కేసీఆర్‌ సభ లేకపోయినా ఆ లోటు తీర్చేలా తెరాస నాయకులు ప్రచార సభలు ఏర్పాటు చేసి కాంగ్రెస్‌ వైఫల్యాన్ని ఎండగట్టే ప్రయత్నం చేశారు. కేటీఆరే స్వయంగా ఇక్కడ ప్రచారాన్ని పర్యవేక్షించారు.

‘చే’జిక్కుతుందని భావించినా...
కాంగ్రెస్‌కు కంచుకోటైన హుజూర్‌నగర్‌లో ఆ పార్టీ పై పెద్దగా అసంతృప్తి బయటపడలేదు. దీంతో రాజకీయ విశ్లేషకులు సైతం హుజూర్‌ నగరి ‘హస్త’గతమని భావించారు. సమయానికి ఆర్టీసీ కార్మికుల సమ్మె కూడా జరగడంతో ప్రభుత్వంపై ఉన్న అసంతృప్తి కాంగ్రెస్‌కు సానుకూలాంశంగా మారుతుందని భావించారు. కానీ, ఆ విషయాన్ని సొమ్ము చేసుకోవడంలో హస్తం పార్టీ నేతలు విఫలమయ్యారు.ఓడిన చోటే గెలవాలని
పోగొట్టుకున్న చోటే వెతుక్కోవాలనే మాటను తెరాస బలంగా పాటించింది. హుజూర్‌నగర్‌ నియోజకవర్గం ఏర్పడినప్పటి నుంచి పోటీ చేస్తున్నా విజయం మాత్రం వారిని వరించలేదు. ఇప్పుడు అనూహ్యంగా వచ్చిన అవకాశాన్ని సద్వినియోగం చేసుకోవాలని తెరాస సంకల్పించింది. ఉపఎన్నికల్లో గెలుపు సాధించడం అలవాటుగా మార్చుకున్న ఆ పార్టీ.. ఈ సారి కూడా అదే సంప్రదాయాన్ని కొనసాగించింది. నియోజక వర్గాల పునర్విభజన తర్వాత 2009 నుంచి హుజూర్‌ నగర్ నియోజకవర్గం మనుగడలోకి వచ్చింది. అప్పటి నుంచి 2009, 2014, 2018 సంవత్సరాల్లో కాంగ్రెస్‌ తరపున ఉత్తమ్ కుమార్‌ రెడ్డి బరిలోకి దిగి విజయం సాధించారు. 2018 అసెంబ్లీ ఎన్నికల సమయంలో సైదిరెడ్డి 7,466 ఓట్ల తేడాతో ఓడిపోయారు. 

ఏ మాత్రం పోటీ ఇవ్వలేకపోయిన తెదేపా, భాజపా
తెలంగాణలో అధికారంలో వస్తామని ధీమా వ్యక్తం చేసిన భాజపా..కనీసం డిపాజిట్లు కూడా దక్కించులేకపోయింది. మరోవైపు అనుకోకుండా బరిలోకి దిగిన తెలుగు దేశం పార్టీది కూడా అదే దారి.

తెరాస సానుకూలాంశాలివి..

* గతంతో పోలిస్తే ఓటు బ్యాంకు పెరగడం.
* ఉప ఎన్నికల్లో తెరాస గెలుపు సంప్రదాయం.
* ప్రతి 60 మంది ఓటర్లకు ఒక కార్యకర్త చొప్పున నియమించి అభిమానాన్ని ఓట్లుగా మలుచుకొని బూత్‌ వరకు తీసుకురావడంలో సఫలం కావడం.
* మంత్రులు, ఎమ్మెల్యేలు, ఎంపీలు, కార్పొరేషన్‌ ఛైర్మన్లు, జడ్పీ ఛైర్మన్లు, పార్టీ కార్యదర్శలు ఇలా అన్ని స్థాయిల్లోనూ 70 మంది నాయకులను అన్ని మండలాల్లోనూ మోహరించారు. ఇక్కడ గెలుపు కోసం ఓ ఇన్‌ఛార్జిని కూడా నియమించింది. 
* తెరాస కార్యనిర్వాహక అధ్యక్షుడు కేటీఆరే స్వయంగా రంగంలోకి దిగి ప్రచారం చేయడం.
* అన్నింటికి మించి పోల్‌ మేనేజ్‌మెంట్‌లో తెరాస నూటికి నూరు శాతం సఫలమైంది.

హుజూర్‌నగర్‌ ఫలితం: రౌండ్‌ల వారీగా..

హుజూర్‌నగర్‌ అసెంబ్లీ ఉప ఎన్నిక ఫలితాల్లో కారు జోరు కొనసాగింది. రౌండ్ల వారీగా ఫలితాలను అధికారికంగా ప్రకటించారు. 22వ రౌండ్‌ పూర్తయ్యే సరికి తెరాస అభ్యర్థి శానంపూడి సైదిరెడ్డి 43,233 ఓట్ల ఆధిక్యంలో దూసుకెళ్తున్నారు. తొలి రౌండ్‌ నుంచి తెరాస పూర్తిస్థాయిలో ఆధిపత్యం కొనసాగించింది. హుజూర్‌నగర్‌ బరిలో నిలిచిన ప్రధాన పార్టీలు ఆయా రౌండ్లలో సాధించిన ఓట్ల సరళిని పరిశీలిస్తే.. 

రౌండ్‌ తెరాస కాంగ్రెస్‌ భాజపా తెదేపా
1. 5583 3107 128 113
2. 4723 2851 170 69
3. 5089 2540 114 86
4. 5144 3961 102 127
5. 5041 3032 105 57
6. 5308 3478 72 49
7. 4900 3796 45 46
8. 5624 4055 57 46
9. 5039 3186 111 69
10. 4328 2190 122 69
11. 5877 3169 77 196
12. 4789 2586 103 70
13 5116 3578 84 51
14 5224 3237 98 94
15 6118 3504 135 128
16 6100 3751 163 101
17 5456 3206 93 69
18 4643 2972 127 73
19 5443 3044 341 82
20 5109 2964 199 77
21 5118 3080 119 87
22 3024 2276 56 68

 


Tags :

రాజకీయం

జనరల్‌

సినిమా

క్రైమ్

స్పోర్ట్స్

బిజినెస్‌

జాతీయ-అంతర్జాతీయ

జిల్లా వార్తలు

దేవతార్చన

+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.