ఢాకా: బంగ్లాదేశ్‌ టీ20, టెస్టు సారథి షకిబ్‌ అల్‌ హసన్‌ టీమిండియాతో సిరీసుల్లో ఆడటం అనుమానమే! ఐసీసీ ఆజ్ఞల మేరకు బంగ్లాదేశ్‌ క్రికెట్‌ బోర్డు (బీసీబీ) అతడిని క్రికెట్‌ కార్యకలాపాలకు దూరంగా ఉంచింది. కనీసం సాధన సైతం చేయనీయడం లేదు. ఓ అవినీతి పరుడు అతడిని సంప్రదించిన విషయం ఐసీసీకి వెల్లడించలేదని ఓ పత్రిక ప్రచురించడమే ఇందుకు కారణం.

ఆరోపణలు నిజమైతే దాదాపు 18 నెలలు షకిబ్‌పై ఐసీసీ నిషేధం విధించే అవకాశాలు ఉన్నాయి. ప్రస్తుతం నెలకొన్న సమస్యలకు తోడు బీసీబీకి ఇదో అదనపు సమస్యగా మారింది. నవంబర్‌ 3 నుంచే భారత పర్యటన మొదలవ్వనుంది. ‘ఐసీసీ ఆదేశాల మేరకే షకిబ్‌ను బీసీబీ సాధనకు దూరంగా ఉంచింది. సన్నాహక మ్యాచుల్లో ఆడకపోవడానికి, డే/నైట్‌ టెస్టుపై సమావేశానికి ఆలస్యంగా రావడానికి ఇదే కారణం’ అని సమకాల్‌ పత్రిక రాసింది.

ప్రస్తుతానికి షకిబ్‌పై బహిరంగ వ్యాఖ్యలు చేయడానికి ఐసీసీ నిరాకరిస్తోంది. రెండేళ్ల క్రితం ఓ అంతర్జాతీయ మ్యాచ్‌కు ముందు బుకీ ఒకరు షకిబ్‌ను సంప్రదించాడని ఆ పత్రిక రాసింది. ఈ విషయాన్ని అతడు ఐసీసీ అవినీతి నిరోధ విభాగానికి వెల్లడించలేదని పేర్కొంది. ఐసీసీ అధికారులు ఈ మధ్యే విచారించగా షకిబ్‌ ఈ విషయాన్ని అంగీకరించాడని తెలిపింది. మీర్పూర్‌ సన్నాహక మ్యాచ్‌, సాధన శిబిరానికి హాజరవ్వని షకిబ్‌ భారత పర్యటనకు రావడంపై అనుమానాలు నెలకొన్నాయి. అతడి గైర్హాజరీలో ముష్ఫికర్‌ రహీమ్‌ టెస్టులు, మొసాదిక్‌ హుస్సేన్‌ టీ20లకు సారథ్యం వహిస్తారని తెలుస్తోంది.