పొరుగింటి పసందు!
కశ్మీర్‌ ప్రత్యేకం!

చలికాలంలో నోరూరించే వంటకాలంటే మనకేం గుర్తుకొస్తాయి? వేడివేడి పకోడీలో...బజ్జీలో కదా. కశ్మీర్‌లో కూడా ఈ సమయంలో వేడివేడి పకోడీలు చేస్తారు. కాకపోతే అవి ఉల్లిపాయ పకోడీలో, అరిటికాయ బజ్జీలో కాదు. అందమైన దాల్‌ సరస్సులో.. మరింత అందంగా వికసించే కమలాల వేర్లతో చేసినవి. స్థానికంగా ఈ వేర్లని నద్రు అనీ కమల్‌కక్డీ అనీ నీటి దోసకాయలని అంటారు. కశ్మీరి, సింధ్‌ వంటకాల్లో ఈ కమల్‌కక్డీకి ప్రత్యేక స్థానం ఉంది. మటన్‌కి ప్రత్యామ్నాయంగా కూడా వాడుతుంటారు. వీటితో కరకరలాడే చిప్స్‌ చేస్తారు. పప్పు, రాజ్మా, చేపలు, మాంసం ఇలాదేంతో అయినా కలిపి వండుతారు. అక్కడి రాజులు ఈ కమల్‌కక్డీల కోసం గిల్‌సార్‌ పేరుతో షికారీలు చేసేవారట. వేటాడి తెచ్చిన వేర్లతో రకరకాల రుచికరమైన వంటకాలని చేసేవారట. కశ్మీర్‌ నుంచి ఇరాన్‌కు వలసవెళ్లిన వాళ్లంతా నౌరుజ్‌ వేడుక సందర్భంగా కమల్‌కక్డీతో చేసిన వంటకాలన్నీ చేసుకుంటారు.