హైదరాబాద్‌: కోట్ల రూపాయలు ఖర్చు చేసి సచివాలయం, అసెంబ్లీలకు కొత్త భవనాలు నిర్మించాల్సిన అవసరం లేదని తెలంగాణ జనసమితి అధ్యక్షుడు కోదండరాం అన్నారు. నాంపల్లిలోని తెజస కార్యాలయంలో సచివాలయం కూల్చివేత, పార్టీ ప్లీనరీ అంశాలపై ఆయన మీడియా సమావేశం ఏర్పాటు చేశారు. ఈ సందర్భంగా మాట్లాడుతూ.. ఉస్మానియా వైద్యశాల, సాంఘిక సంక్షేమ వసతి గృహాలకు వసతులు మెరుగుపర్చాలని ప్రభుత్వానికి సూచించారు. సంక్షేమ హాస్టళ్ల భవనాలు నిర్మిస్తామని రూ.1800 కోట్లు బడ్జెట్‌లో కేటాయింపులు చూపినా.. అందుకోసం రూ.400 కోట్లు కూడా ఖర్చు పెట్టలేదని ఆవేదన వ్యక్తం చేశారు. కృష్ణా నది, శ్రీశైలం ప్రాజెక్టుకు అదనంగా ఒక్కచుక్క నీరు కలిపినా మహారాష్ట్ర, కర్ణాటకలకు కూడా వాటా ఇవ్వాల్సి ఉంటుందని కోదండరాం పేర్కొన్నారు. కృష్ణానది  మీద భారం తగ్గించేలా ప్రాజెక్టులు కట్టాలన్నారు. నదుల అనుసంధానం పేరుతో విభజన సమస్యలు పక్కన పెడుతున్నారని ఆక్షేపించారు. ఉద్యోగుల విభజన జరగక ఉద్యోగులు ఇబ్బందులు పడుతున్నారని ఆయన పేర్కొన్నారు. జూలై 13న తెజస ప్లీనరీ హైదరాబాద్‌లో ఉంటుందని ఈ సందర్భంగా కోదండరాం తెలిపారు. పార్టీ ఫిరాయింపులతో రాజకీయాలు భ్రష్టు పట్టాయన్నారు. ప్రజల అవసరాల కోసం రాజకీయాలు మారాలన్నారు. మున్సిపల్ ఎన్నికల్లో తెజస సొంతంగా పోటీ చేస్తుందని స్పష్టం చేశారు. నగరంలో ఒక్క వాన పడితే రోడ్లు చెరువులను తలపిస్తున్నాయని విమర్శించారు.