హైదరాబాద్‌: ఆర్టీసీ సమ్మెలో భాగంగా కార్మిక సంఘాల ఐకాస శనివారం చేపట్టనున్న ‘చలో ట్యాంక్‌బండ్‌’ కార్యక్రమాన్ని విజయవంతం చేయాలని కాంగ్రెస్‌ శ్రేణులకు టీపీసీసీ అధ్యక్షుడు ఉత్తమ్‌కుమార్‌రెడ్డి పిలుపునిచ్చారు. న్యాయమైన డిమాండ్ల సాధనకోసం సమ్మె చేస్తున్న ఆర్టీసీ కార్మికుల పోరాటానికి కాంగ్రెస్‌ పార్టీ సంపూర్ణ మద్దతు ఉంటుందన్నారు. ఈ మేరకు ఉత్తమ్‌ ఓ ప్రకటన విడుదల చేశారు. ఆర్టీసీ కార్మికుల సమస్యలను పరిష్కరించాలని హైకోర్టు ఆదేశించినా.. సీఎం కేసీఆర్ నిర్లక్ష్యంగా నియంతలా వ్యవహరిస్తున్నారని ఆరోపించారు. ‘చలో ట్యాంక్‌బండ్‌’కు ఆర్టీసీ కార్మిక సంఘాల ఐకాస తమ మద్దతు కోరిందని చెప్పారు. ఈ కార్యక్రమంలో కాంగ్రెస్‌ కార్యకర్తలు, నాయకులు పెద్ద ఎత్తున పాల్గొని విజయవంతం చేయాలని ఉత్తమ్‌ కోరారు.