దిల్లీ: తన నియోజకవర్గమైన వారణాశిలోని ప్రజలను, భాజపా కార్యకర్తలను ప్రశంసలతో ముంచెత్తుతున్నారు ప్రధాని నరేంద్ర మోదీ. సార్వత్రిక ఎన్నికల ఫలితాల్లో భాజపా చారిత్రక విజయం సాధించింది. ఈ సందర్భంగా తన నియోజకవర్గంలోని కార్యకర్తలను ఉద్దేశిస్తూ మోదీ ఓ ట్వీట్ చేశారు. ‘వారణాశిలోని కార్యకర్తల పనితీరు గర్వించదగినది. నేను నామినేషన్‌ వేయడానికి వారణాశికి వెళ్లినప్పుడు ‘అంతా మేమే దగ్గరుండి చూసుకుంటాం సర్‌’ అని నాకు ధైర్యాన్నిచ్చారు. దాంతో నాకు మళ్లీ వారణాశికి వెళ్లాల్సిన అవసరం రాలేదు. చెప్పినట్లుగానే అంతా వారే చూసుకున్నారు. వారణాశి ప్రజలకు శిరస్సు వంచి నమస్కరిస్తున్నాను. వారికి సేవ చేయాలని ఎంతో ఆశగా ఎదురుచూస్తున్నాను’ అని వెల్లడించారు మోదీ.