కొనేద్దాం.. ఆదా చేస్తూ..

ఆర్థిక ప్రణాళిక

కొనేద్దాం.. ఆదా చేస్తూ..

ఇంట్లోకి ఏదైనా కొనాలి.. పండగల వేళ చాలామంది అనుకునే మాటే ఇది. నిజానికి కొత్త వస్తువులను కొనడానికి ఇంతకు మించి సరైన సమయమూ ఇంకోటి ఉండదు.. వ్యాపార సంస్థల దగ్గర్నుంచి బ్యాంకుల వరకూ ఎక్కడ చూసినా ఆకర్షణీయమైన తగ్గింపులు, ఆఫర్లు కళ్ల ముందు కనిపిస్తుంటాయి. ఇవి అందించే రాయితీల మాట ఎలా ఉన్నా.. మన సామర్థ్యానికి మించి ఖర్చు చేస్తే మాత్రం ఇబ్బందులు తప్పవు. పండగల వేళ.. ఆర్థిక ఆరోగ్యాన్ని కాపాడుకోవడం ఎంతో ముఖ్యం. మరి, దానికోసం మనం ఏం చేయాలి?

ఆదాయం ఎంత? అందులో ఎంత ఖర్చు చేయాలి? నిజానికి ఈ సూత్రం పండగలప్పుడే కాదు.. ప్రతి రోజూ అనుసరించాల్సిందే. ఒకవేళ పండగల కోసం మీరు ప్రత్యేక బడ్జెట్‌ వేసుకుంటే.. ముందుగా మీరు ఏం కొనాలనుకుంటున్నారనే జాబితాను స్పష్టంగా రాసుకోండి. వాటికయ్యే ప్రతి ఖర్చునూ తెలుసుకోండి. ముందుగానే మీ చేతిలో వస్తువుల జాబితా ఉంటుంది కాబట్టి, ఆ వస్తువుకు ఎక్కడెక్కడ డిస్కౌంట్లు లభిస్తున్నాయి, నగదు వెనక్కి వస్తుందా? ఆన్‌లైన్‌లో కొనాలా? లేదా నేరుగా దుకాణాలకు వెళ్లాలా అనేది నిర్ణయించుకోవడం సులభం. ఆఫర్లకు ఆకర్షితులై.. అనవసర వస్తువులను కొనొద్దు. దీనివల్ల మీ బడ్జెట్‌ పెరిగిపోతుంది. గుర్తుంచుకోండి.. నేడు అవసరం లేని వస్తువులను కొంటే.. రేపు అవసరమైన వస్తువులను అమ్మాల్సి రావచ్చు.

కార్డులతోనే...
చాలా బ్యాంకులు, ఆర్థిక సంస్థలు క్రెడిట్, డెబిట్‌ కార్డులపై ప్రత్యేక ఆఫర్లను ప్రకటిస్తున్నాయి. ఇ-కామర్స్‌ సంస్థలు, పెద్ద షోరూంలతోనూ ప్రత్యేక ఒప్పందాలు కదుర్చుకుంటున్నాయి. కార్డులను వాడి వస్తువులను కొంటే నగదు వెనక్కి, వస్తువులపై డిస్కౌంటు, ఎలాంటి వడ్డీ లేకుండానే ఈఎంఐ సౌకర్యంలాంటివి కల్పిస్తున్నాయి. ఇలాంటి ఆఫర్లు ఇంకా ఏమైనా ఉన్నాయా అనేది తెలుసుకునేందుకు మీ బ్యాంకు లేదా కార్డు సంస్థ వెబ్‌సైటులో చూడండి. పండగలప్పుడు నగదు చెల్లింపులకన్నా.. కార్డుతోనే ఎక్కువ ప్రయోజనం. పైగా రివార్డు పాయింట్లు కూడా లభిస్తాయి. ఇప్పటికే ఉన్న రివార్డు పాయింట్లనూ కొనుగోళ్ల కోసం వాడుకోండి. దీనివల్ల మీ జేబుపై కొంత భారం తగ్గుతుంది.

పరిమితిలో 30 శాతమే..
క్రెడిట్‌ కార్డును ఎప్పుడూ కాస్త జాగ్రత్తగానే వాడుకోవాలి. మీకున్న పరిమితిలో నెలకు 30% మించి వాడకపోవడమే ఉత్తమం. మీరు అంతకుమించి వాడుతున్నారంటే.. అప్పులపైన ఎక్కువ ఆధారపడినట్లుగా బ్యాంకులు భావిస్తాయి. ఇది మీ క్రెడిట్‌ స్కోరునూ తగ్గిస్తుంది. తక్కువ స్కోరుంటే.. భవిష్యత్తులో కొత్త రుణాలు తీసుకోవడంపై ప్రభావం పడుతుంది. అప్పు లభించడంలో సమస్యలతో పాటు.. వడ్డీ సైతం అధికంగా చెల్లించాల్సి వస్తుంది. కాబట్టి, పండగ కొనుగోళ్లకు పూర్తిగా క్రెడిట్‌ కార్డుపైనే ఆధారపడకుండా.. డెబిట్‌ కార్డులనూ వినియోగించడం మేలు.

అప్పుతో చేస్తున్నారా?
కొన్నిసార్లు.. చేతిలో డబ్బు లేకపోతే.. రుణం తీసుకోక తప్పకపోవచ్చు. ఇలాంటప్పుడు.. వడ్డీ రేటు, రుణ వ్యవధి, ఈఎంఐ మొత్తం, ప్రాసెసింగ్‌ ఫీజు, రుణం ఇచ్చేందుకు పట్టే సమయం ఇలా పలు అంశాలను బేరీజు వేసుకొని, మీకు సరిపోయే బ్యాంకు, రుణ సంస్థను ఎంచుకోండి. మీకు ఇప్పటికే గృహరుణంలాంటిది ఉందనుకోండి.. దానిపై టాపప్‌ రుణం తీసుకోవడం వల్ల అధిక ప్రయోజనం లభిస్తుంది. వడ్డీ తక్కువగా ఉండటంతోపాటు, వ్యవధి పరంగానూ దీనివల్ల కలిసొస్తుంది. గృహరుణం లేని వారు వ్యక్తిగత రుణాలను కొంత మేరకు పరిశీలించవచ్చు. క్రెడిట్‌ కార్డులున్నవారు.. కచ్చితంగా ఏడాదిలో బాకీ తీరుస్తామని అనుకుంటే.. కార్డును వాడి, ఆ బిల్లు మొత్తాన్ని ఈఎంఐలుగా మార్చుకోవచ్చు. లేదా కార్డు నుంచి రుణం తీసుకునే వీలూ ఉంటుంది.

క్రెడిట్‌ కార్డుపై అప్పు సాధారణంగా ముందస్తుగానే మంజూరవుతుంది. మీకు ఈ వెసులుబాటు ఉందో లేదో మీ బ్యాంకు ఆన్‌లైన్‌ ఖాతా ద్వారా తెలుసుకోవచ్చు. ముందుగానే మంజూరయి ఉంటాయి కాబట్టి, మీరు దరఖాస్తు చేసిన కొన్ని గంటల్లోనే రుణ మొత్తం మీ ఖాతాలో జమ అవుతుంది. కొన్ని బ్యాంకులు ఉన్న పరిమితిలోనే రుణాలను ఇస్తే.. మరికొన్ని క్రెడిట్‌ కార్డుపై ప్రత్యేకంగా అప్పునిస్తాయి.

⇒ బిల్లు మొత్తాన్ని ఒకేసారి చెల్లించలేని సందర్భాల్లో దాన్ని ఈఎంఐగా మార్చుకోవడం మేలు. బిల్లును గడువు తేదీలోపు చెల్లించకపోతే బ్యాంకులు విధించే రుసుములకన్నా.. ఈఎంఐలుగా మార్చుకున్నప్పుడు అయ్యే ఖర్చు తక్కువ. 3-60 నెలల వరకూ నెలసరి వాయిదాల్లో బిల్లు చెల్లించే వెసులుబాటును బ్యాంకులు కల్పిస్తున్నాయి.

⇒ కొన్ని బ్యాంకులు గృహోపకరణాల ఉత్పత్తిదారులు/వ్యాపారులతో ప్రత్యేక ఒప్పందాలు చేసుకొని, ఈఎంఐ సౌకర్యాన్ని అందిస్తున్నాయి. ఇలాంటప్పుడు ఈఎంఐ వడ్డీ భారం మనపైన ఉండదు. మీరు కొనబోయే వస్తువుకు ఇలాంటి సౌకర్యం ఉందా అనేది చూసుకోండి. కనీసం వడ్డీని ఆదా చేసుకునేందుకు ఇది ఉపయోగపడుతుంది.

రుణాన్ని తీసుకునేముందు.. ఒకటికి రెండు సార్లు మీ ఆదాయం, ఖర్చులను బేరీజు వేసుకోండి. వచ్చే ఆదాయంలో 40-50 శాతానికి మించి నెలసరి వాయిదాలు లేకుండా చూసుకోవాలి. తక్కువ వడ్డీకి అప్పు ఇస్తున్న రుణ సంస్థ.. అధిక ప్రాసెసింగ్‌ ఫీజును వసూలు చేస్తుందా పరిశీలించండి. ఆన్‌లైన్‌లో కాలిక్యులేటర్లను ఉపయోగించి, నెలసరి వాయిదాల సంఖ్య, పడే వడ్డీ భారంలాంటి వాటిని తెలుసుకున్నాకే ఒక నిర్ణయం తీసుకోండి.

- గౌరవ్‌ అగర్వాల్, డైరెక్టర్, www.Paisabazaar.com

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి రుచులు దేవతార్చన

ఆర్థిక ప్రణాళిక

మరిన్ని

రుచులు

App