దుఃఖభరితమైన సుఖాలు

స్వామి వివేకానంద విదేశాల్లో ఓ శ్రీమంతుడు ఏర్పాటు చేసిన సత్సంగంలో ప్రసంగిస్తున్నారు. ఓ విదేశీ పారిశ్రామికవేత్త- ‘స్వామీ! ఈ భౌతిక సుఖాలు, వస్తు సముదాయాలు దుఃఖానికి కారణమవుతున్నాయని మీరంటున్నారు. కానీ అది నిజమనిపించటం లేదు. ఈ ఆధునిక వసతులు, సౌకర్యాలు, సౌలభ్యాలతో గొప్ప సుఖజీవనం సాధ్యమవుతోంది కదా?’ అన్నారు. ఆ మాటలు విన్న స్వామి వివేకానంద ‘అవును! మీరు సుఖాలను అనుభవిస్తున్నామనే అనుకుంటున్నారు. కానీ వాటి వల్ల మీకు నిజమైన ఆనందమేమీ దక్కటం లేదు. ఆ సుఖాలు ఎలాంటివో చెబుతాను వినండి. మూగజీవాలు భయం భయంగా ఎవరింట్లోనో దూరి.. ఆ ఇంటి యజమాని చూస్తే తమను తరిమేస్తాడేమో అనే భయంతో దొంగచూపులు చూస్తుంటాయి. ఆకలితో వంటపాత్రల్లోని పదార్థాలను హడావుడిగా తింటుంటాయి. తాము శ్రీమంతులమని భావించేవారు కూడా లౌకికసుఖాలను అలాగే అనుభవిస్తున్నారు. ఇలా గడిపే జీవితాలు పైకి ఉల్లాసభరితంగా కనిపిస్తాయి. నిజానికి లోపలంతా విషాదమే. చివరికి అది వేదనగా పరిణమిస్తుంది. పరమాత్మను మరిపిస్తుంది’ అంటూ వివరించారు. - చక్రి