ఐఐటీ గాంధీనగర్‌ ఫెలోషిప్‌

ఇండియన్‌ ఇన్‌స్టిట్యూట్‌ ఆఫ్‌ టెక్నాలజీ (ఐఐటీ - గాంధీనగర్‌) 2023 ‘ఎర్లీ-కెరియర్‌ ఫెలోషిప్‌ (ఐఐటీజీఎన్‌ - ఈసీఎఫ్‌) ప్రోగ్రాంకి దరఖాస్తులు ఆహ్వానిస్తోంది. పరిశోధనల్లో విద్యార్థులను మరింతగా మమేకం చేయాలనే ఉద్దేశంతో దీన్ని అందిస్తున్నారు. ఈ ఫెలోషిప్‌కు ఇటీవల పీహెచ్‌డీ తీసుకుని, ఐఐటీ గాంధీనగర్‌ అధ్యాపకులతో కలిసి రిసెర్చ్‌ ప్రాజెక్టుల్లో పనిచేయాలనుకునేవారు దరఖాస్తు చేయవచ్చు. డిసెంబర్‌ 15వ తేదీ వరకూ దరఖాస్తులు స్వీకరించనున్నారు.  

ఈ ప్రోగ్రాంకి ఎంపికైన అభ్యర్థులకు నెలకు రూ.లక్ష చొప్పున స్టైపెండ్‌ అందుతుంది. ఇందులో రూ.90 వేలు ఖర్చులకు, రూ.10 వేలు హెచ్‌ఆర్‌ఏగా ఇవ్వనున్నారు. వీటికి అదనంగా ఏడాదికి రూ.2 లక్షల   వరకూ ‘ప్రొఫెషనల్‌ డెవలప్‌మెంట్‌ గ్రాంట్‌’గా అందించనున్నారు. ఈ డబ్బును అభ్యర్థి ఇతర పరిశోధనా సంబంధిత కార్యకలాపాలకు వినియోగించవచ్చు. అంతర్జాతీయంగా జరిగే సమావేశాలు, వర్క్‌షాప్స్‌, శిక్షణ తరగతుల వంటి వాటికి వెళ్లిరావొచ్చు. తొలుత ఈ ఫెలోషిప్‌ను ఏడాది కాలానికి అందిస్తారు. తర్వాత అభ్యర్థి ప్రదర్శనను బట్టి మరో ఏడాది వరకూ పొడిగించే అవకాశం ఉంది.

అర్హత: ఈ ఫెలోషిప్‌కు దరఖాస్తు చేయదలచిన వారు జనవరి 2023లోగా వారి డాక్టోరియల్‌ థీసిస్‌ను సబ్మిట్‌ చేసి ఉండాలి. అలాగే దరఖాస్తు సమయంలో అభ్యర్థి తమ గురించిన పూర్తి వివరాలతో పర్సనల్‌ స్టేట్‌మెంట్‌ అందించాలి. ఎవరు ఏ స్ట్రీమ్‌లో అయినా దరఖాస్తు చేయవచ్చు కానీ ఒకే దరఖాస్తు ఇవ్వాలి.

మరిన్ని వివరాలకు: www.iitgn.ac.in/research/early_career_fellowship