యోగక్షేమాలు అంటే...

మీకు తెలుసా

‘నిశ్చల మనసుతో నా యందే నిష్ఠ కలిగి ఎవరు నిరంతరం నన్ను సేవిస్తుంటారో వారి యోగక్షేమాలు నేను వహిస్తుంటాను’ అంటూ భగవద్గీతలో శ్రీకృష్ణుడు అభయమిచ్చాడు. మనందరికీ అవసరమైనవి యోగం, క్షేమం. అందరూ కోరుకునే ఇహలోక, పరలోక ప్రయోజనాలన్నీ యోగక్షేమాల్లోనే ఇమిడి ఉన్నాయి. యోగమంటే అవసరమైన వాటిని సమకూర్చటం. క్షేమమంటే సమకూరిన వాటిని సంరక్షించటం. ఎంతో కొంత ఆధ్యాత్మిక స్పృహ ఉన్నవాళ్లు జీవితావసర వస్తువులే కాక ఆత్మజ్ఞానం కూడా ఆకాంక్షిస్తారు. ఆ రెండూ సంప్రాప్తించటమూ యోగమే! భగవత్‌ ధ్యానంతో ఆత్మజ్ఞాన సంపద లభిస్తుంది. కానీ ఏదైనా సంపాదించగానే సరిపోదు.. దాన్ని నిలబెట్టుకోవడమూ ముఖ్యమే. కనుకనే ఆ సంపదలు చేజారిపోకుండా, క్షీణించకుండా తానే కాపాడుతూ వృద్ధి చేస్తుంటాడు దేవుడు. దీన్నే క్షేమం అంటారు. యోగక్షేమమంటే అశుభాలు, అనర్థాలను పోగొట్టి, శుభాన్ని, పుణ్యాన్ని కలిగిస్తుందనే అర్థమూ ఉంది. తనను నమ్ముకున్న భక్తులకు భౌతికంగా, పారమార్థికంగా అవసరమైనవాటిని చేకూర్చి, వాటిని సంరక్షించే బాధ్యత ఆ స్వామిదే. అందువల్ల నిరంతరం ఆయనను మనసులో స్థిరపరచుకుని ఆరాధించాలి. దైవం మన యోగక్షేమాలు చూడాలంటే- మన అర్హత అది. అందుకే గురుదేవులు రామకృష్ణ పరమహంస ‘మన భారాన్ని మోసే బాధ్యతను భగవంతుడికి ఇచ్చేయండి! సమకూర్చటం, సంరక్షించటం అంతా ఆయనే చూసుకుంటాడు’ అనేవారు.

చక్రి