ముందుకు సాగిపో!

పరమహంస కథలు

కట్టెలు కొట్టి జీవనం సాగించే నిరుపేద వ్యక్తిని చూసిన ఒక సాధువుకు సానుభూతి కలిగింది. అతని దగ్గరకు వెళ్లి ‘ఎన్నాళ్లిలా చెట్లు నరుకుతూ ఇక్కడే ఉండి కష్టపడతావు? ముందుకు వెళ్లు’ అన్నాడు. సాధువు సలహా పాటించి అతడు అరణ్యంలో కొంచెం ముందుకు వెళ్లాడు. అక్కడ చందన వృక్షాల వనం కనిపించింది. ఆ గంధం చెట్లను నరికి, విక్రయించి ధనికుడయ్యాడు. ‘సాధువు ఇక్కడ ఆగిపొమ్మనలేదు, ముందుకు వెళ్లమన్నాడు కదా!’ అనుకున్న శ్రామికుడు ఇంకా ముందుకు వెళ్లాడు. అక్కడ అతనికి రాగి గని కనిపించింది. ఆ లోహాన్ని తవ్వి, అమ్ముతూ మరింత ధనవంతుడయ్యాడు. అక్కడితో ఆగిపోకుండా ఇంకా ఇంకా ముందుకు వెళ్లగా.. కట్టెలు కొట్టే వ్యక్తికి వెండి, ఆపైన బంగారు గనులు తారసపడ్డాయి. చివరికి అతనికి వజ్రాల గని కనిపించింది. దాంతో అతడు కుబేరుడైపోయాడు. గురుదేవులు రామకృష్ణ పరమహంస- శిష్యులకు తరచూ ఈ కథ చెప్పేవారు. ‘ఆధ్యాత్మిక ప్రయాణంలో చిన్న చిన్న అనుభూతులు, దర్శనాలతో సంతృప్తి చెందకూడదు. సాధనల విషయంలో ఇంకా, ఇంకా ముందుకు వెళ్లాలి. పారమార్థిక చైతన్యానికి ముగింపు అంటూ ఏమీ లేదు. సాధన తీవ్రత పెరుగుతున్న కొద్దీ ఆధ్యాత్మిక అనుభూతి సాంద్రత మరింత పెరుగుతుంది’ అంటూ హితవు పలికేవారు.

చక్రి