పట్టణమే అరణ్యమైంది!

ఇక్ష్వాకు మహారాజు కుమారుడు దండుడు అందరినీ హింసించేవాడు. అలాంటి దుర్మార్గుణ్ణి దూరంగా ఉంచడమే సముచితమని భావించిన మహారాజు అతణ్ణి వింధ్యపర్వతాలకు పొమ్మన్నాడు. అలా వెళ్లిన దండుడు ఆ పర్వతాలకు దక్షిణాన మధుమంతం పట్టణాన్ని నిర్మించి, పాలించాడు. రాక్షసులతో స్నేహం చేసి, గురువైన శుక్రాచార్యుని వద్ద విద్య అభ్యసించాడు. ఒకసారి ఆశ్రమానికి వెళ్లినప్పుడు ఒంటరిగా తపస్సు చేస్తున్న శుక్రాచార్యుని కుమార్తె అరజను చూశాడు. ఆ సౌందర్యానికి ఆకర్షితుడై దగ్గరకు వెళ్లాడు. దండుడి చూపులను పసిగట్టిన అరజ ‘నేను శుక్రాచార్యుని పుత్రికని. గురుపుత్రి సోదరితో సమానం. వెంటనే వెళ్లిపో’ అంది. ఆమె మాటను లక్ష్యపెట్టక, బలవంతంగా రమించాడు. తండ్రి రాగానే విలపిస్తూ జరిగిందంతా చెప్పింది అరజ. ఆగ్రహించిన అతడు- దండుడు సపరివారంగా నేలపాలు అవుతాడని, మధుమంతం పట్టణం చుట్టూ నూరు యోజనాల మేర ఏడురోజుల వరకూ మట్టివాన కురుస్తుందని, ఆ ప్రాంతం జనశూన్యం అవుతుందని శపించాడు. శుక్రుని శాప ప్రభావంతో మధుమంతం పట్టణం మట్టిదిబ్బ అయ్యింది. ఆ ప్రదేశమంతా అరణ్యంగా మారింది. ఆ అరణ్యమే దండుని పేరుతో దండకారణ్యంగా ప్రసిద్ధి చెందింది. అక్కడికే శ్రీరాముడు సీతా లక్ష్మణ సమేతంగా వనవాసానికి వెళ్లాడు.

శరత్‌ చంద్రిక