సొగసైన.. కబుర్లు!

ఐదున్నర అడుగుల సొగసరి.. అన్ని భాషల్లో మెరుస్తున్న ఆల్‌రౌండర్‌...ఎవరామె? ‘ది వారియర్‌’ హీరోయిన్‌ అక్షర గౌడ. అంతర్జాలంలో, కుర్రకారు చర్చల్లో ఈమధ్య జోరుగా వినిపిస్తున్న ఈ అమ్మడి సంగతులు సంక్షిప్తంగా.నేపథ్యం: అక్షర కన్నడ భామ. బెంగళూరులో పుట్టిపెరిగింది. అక్కడే ఇంజినీరింగ్‌ పూర్తి చేసింది. అసలు పేరు హరిణి గౌడ.

తెరంగేట్రం: ఎత్తు ఐదున్నర అడుగుల పైనే. స్నేహితుల సలహాతో మోడల్‌గా ప్రయత్నించింది. వాణిజ్య ప్రకటనల్లో మెరిసింది. అవే సినిమాకు రాచబాట వేశాయి. 2014లో ‘ఉయర్థిరు 420’ అనే తమిళ చిత్రంతో తెరపైకి వచ్చింది.

మెరుపులు: ‘తుపాకీ’, ‘మాయావన్‌’, ‘శూర్పణగై’ మంచి పేరు తీసుకొచ్చాయి. ‘రంగ్రేజ్‌’ అనే ఓ హిందీ సినిమాలోనూ నటించింది. ‘ప్రేమదల్లి’తో కన్నడంలోనూ అడుగుపెట్టింది.

ఆల్‌రౌండర్‌: హిందీ, తమిళ, కన్నడ భాషల్లో ఇప్పటికే నటించింది. రెండేళ్ల కిందటే తెలుగులో ‘సిమ్రన్‌’ అనే వెబ్‌సిరీస్‌లో తళుక్కుమంది.

తెలుగులో: అక్షర టాలీవుడ్‌కి కొత్తేం కాదు. మన్మథుడు-2లో అక్షర అనే పాత్రలో నాగార్జున సరసన కనిపించింది.

ప్రేమాయణం: యువరాజ్‌సింగ్‌తో ప్రేమాయణం నడిపిస్తోందని 2011లో దేశవ్యాప్తంగా వార్తల్లోకి వచ్చింది. ‘అదంతా తూచ్‌ నేనసలు యువీని ఎప్పుడూ కలవనేలేద’ని ఖండించినా గుసగుసలు ఆగలేదు.

ఇష్టాయిష్టాలు: సామాజిక మాధ్యమాల్లో యాక్టివ్‌గా ఉంటుంది. మూగజీవాలంటే ప్రాణం. పెంపుడు కుక్కతో కలిసి దిగిన ఫొటోలు తరచూ పంచుకుంటుంది.