నమ్మొద్దు.. నట్టేట ముంచేవాళ్లని..

నమ్మిన స్నేహితురాలే నట్టేట ముంచింది. అమ్మాయిలు స్నానం చేస్తుంటే వీడియోలు తీసి బోయ్‌ఫ్రెండ్‌కి పంపింది. పరువు పోయిందని ఏడ్వడం ఆ అమ్మాయిల వంతైంది. చంఢీగఢ్‌ విశ్వవిద్యాలయంలో జరిగిన దారుణమిది. అక్కడే కాదు.. ఫ్రెండ్‌ రూపంలో ఉండే ఫ్రెనెమీలు మన పక్కనే ఉంటారు. మరి వాళ్లని గుర్తించేదెలా?

* తమకన్నా అందం, తెలివితేటలు, మంచితనం ఉంటే వీళ్లు తట్టుకోలేరు. నేరుగా కాకుండా ఆ గుణగణాలను చులకనగా చూస్తారు. ఇతరులు విజయాలు సాధిస్తే వాటిని తక్కువ చేసి చెబుతుంటారు.

* మన ముందు ఒకలా వెనక మరోరకంగా ఉంటారు. స్నేహం నటిస్తూ తీయగా మాట్లాడతారు. వెనకాల విషం చిమ్ముతారు. ఇతరులతో మన గురించి చెడుగా చెబుతుంటారు.

* మాటలతో మభ్యపెట్టి వ్యక్తిగత విషయాలు కూపీ లాగుతారు. మన రహస్యాలు, వ్యక్తిగత ఫొటోలు, వీడియోలు.. ఏదోరకంగా చేజిక్కించుకుంటారు. మనకు నచ్చని వ్యక్తుల గురించి మరింత చెడుగా చెబుతూ సాయం చేస్తున్నట్టు పోజు కొడతారు.

* ‘మందు కొట్టకపోతే మగాడివే కాద’ంటారు. ‘పొగ తాగడం ఫ్యాషన్‌’ అంటుంటారు. పబ్‌కి వెళ్లకపోతే యూతే కాదంటారు. వాళ్లు చెడుదారి పట్టింది కాకుండా స్నేహితుల్నీ ఈ రొంపిలోకి లాగుతుంటారు.

* స్మార్ట్‌ఫోన్‌, బైక్‌, ల్యాప్‌టాప్‌ లాంటి ఖరీదైన వస్తువులను కావాలనే పాడు చేస్తారు. ‘అయ్యో.. అనుకోకుండా ఇలా జరిగింద’ని అమాయకత్వం నటిస్తారు.

* వీరిలో ఎమోషనల్‌ బ్లాక్‌మెయిలింగ్‌ ఎక్కువ. ‘అంతేలే.. నేను చెబితే ఎందుకు వింటావు?’ నేనేమైనా నీ బెస్ట్‌ ఫ్రెండ్‌నా?’ అనే మాటలు ఎక్కువ వాడుతుంటారు. ఇరకాటంలో పడేస్తూ అనుకున్నవన్నీ సాధించుకుంటారు.

* పర్స్‌ మర్చిపోయానంటూ ఖర్చు పెట్టిస్తారు. అత్యవసరం అంటూ అందినకాడికి లాగుతారు. మనకి అవసరం వచ్చినప్పుడు మాత్రం మొహం చాటేస్తారు.

* ఏదైనా మంచి ప్రయత్నం చేసినప్పుడు ‘అది మనకి సెట్‌ కాదు’, ‘నీవల్ల కాదులే. సమయం వృథా’ అని నిరుత్సాహ పరుస్తుంటారు.