బాధకూ.. నవ్వు ఎమోజీలే!

మనసు సంతోషంగా ఉంటే నవ్వుతాం. బాధ అనిపిస్తే ఏడుస్తాం. ఎమోజీల వాడకమూ అంతే. మన మూడ్‌ని బట్టి సెల్‌ఫోన్‌లో.. ఆన్‌లైన్‌లో.. చాటింగ్‌లో.. సామాజిక మాధ్యమాల్లో.. ఎడాపెడా వాడేస్తుంటుంది నేటి జనరేషన్‌ జడ్‌. ఇందులో కొత్త విషయం ఏంటంటే.. యువత తమలోని ప్రతికూల భావోద్వేగాలకు సైతం ఆల్‌ ఈజ్‌ వెల్‌ అన్నట్టుగా పాజిటివ్‌ ఎమోజీలను వాడుతున్నారట. యూనివర్సిటీ ఆఫ్‌ టోక్యో పరిశోధకుల అధ్యయనంలో ఈ విషయం తేలింది. దీనికోసం వాళ్లు 16 నుంచి 29 ఏళ్ల వయస్కుల అభిప్రాయాలు సేకరించారు. అధ్యయన వివరాల్ని ఫ్రంటియర్స్‌ ఇన్‌ సైకాలజీలో ప్రచురించారు. బాధలు, ఇబ్బందుల్లో ఉన్నా.. తమని తాము సర్దిచెప్పుకోవడానికి, పరిస్థితి బాగు పడుతుందనే ఆశావహ దృక్పథంతోనే సామాజిక మాధ్యమాల్లో, స్నేహితులతో చాటింగ్‌లో, ఇలా ప్రతీచోటా యువత పాజిటివ్‌ ఎమోజీలనే వాడుతున్నారని పరిశోధకులు చెబుతున్నారు. కానీ ఇలా చేయడం తమను తాము మోసం చేసుకోవడం, బలహీన మనస్తత్వానికి సంకేతం అన్నది మానసిక నిపుణుల వాదన. ఎవరేం చెప్పినా అంతా సానుకూలం అని భావించడం శుభపరిణామమే కదా!