ఓసారి ఏమైందంటే..

బీటెక్‌ ఫైనలియర్‌లో ఉండగా జరిగిందిది. ఒక చలాన్‌ కట్టడం కోసం డీడీ తీయడానికి బ్యాంకుకి వెళ్లాను. లోపల అడుగు పెట్టగానే కౌంటర్‌లో ఒక అందమైన అమ్మాయి కనిపించింది. డీడీ ఎలా తీయాలో నాకు తెలియదు. సరాసరి వెళ్లి ఆమెనే అడిగా. వివరంగానే చెప్పింది. నేనేమో తననే చూస్తూ ఉండటంతో విన్నది సరిగా అర్థం కాలేదు. నా క్వశ్చన్‌మార్క్‌ మొహం చూసి.. ‘మీ నెంబర్‌ చెప్పండి’ అంది. నాకు ఆశ్చర్యంతోపాటు చెప్పలేనంత సంతోషం కలిగింది. గబగబా నా ఫోన్‌ నెంబర్‌ చెప్పి ‘మరి మీదో’ అన్నాను. ఆమె ఒక్కసారి నావైపు కోపంగా చూసి ‘అక్కౌంట్‌ నెంబర్‌ సార్‌. నేనడిగింది.. మీ అకౌంట్‌ నెంబర్‌’ అంది. అక్కడున్నవాళ్లంతా ఒకటే నవ్వు. నేను పని పూర్తయ్యేదాకా తల ఎత్తితే ఒట్టు. తర్వాత మళ్లీ ఆ బ్యాంకుకి వెళ్లలేదు.

ఎస్‌.ఉదయ్‌, సికింద్రాబాద్‌