వాన జోరు..కావొద్దు బేజారు

చేతికి బండి అందిందా.. మేఘాల్లోనే తేలిపోతుంటుంది యువత. ఈ వేగం అన్నివేళలా పనికి రాదు. ముఖ్యంగా వర్షాకాలంలో ప్రమాదాల బారిన పడకుండా ఉండాలంటే మరిన్ని జాగ్రత్తలు తీసుకోవాల్సిందే.

* ముఖాన్ని కప్పేసే ఫుల్‌ హెల్మెట్‌, చేతికి గ్లౌజులు, వాటర్‌ప్రూఫ్‌ బూట్లు, రెయిన్‌కోటు.. క్రమం తప్పకుండా ప్రయాణించే రైడర్లు ఈ వర్షాకాలంలో తప్పనిసరిగా వెంట ఉంచుకోవాల్సిన వస్తువులు.
* ఎక్కడ ఏ గతుకు ఉందో, ఏ నీటి మడుగు కింద మ్యాన్‌హోల్‌ ఉందో ఎవరికీ తెలియదు. ముందు వాహనాలకు సాధ్యమైనంత దూరం పాటిస్తుంటే.. ఓ అంచనాకు రావొచ్చు. నీరు నిలబడని చోటి నుంచి వెళ్లడమే ఉత్తమం.
* వర్షం పడుతున్నప్పుడు, వాతావరణం సరిగా లేనప్పుడు రోడ్డు సరిగా కనపడదు. హెల్మెట్‌ విజర్‌కి కార్‌ వ్యాక్స్‌ వాడితే నీరు వెళ్లిపోయి సాఫీగా ఉంటుంది. హెడ్‌లైట్లు, ఇండికేటర్లు, టెయిల్‌లైట్లు తప్పకుండా వాడితే.. మనతోపాటు వెనక, ముందు ఉన్నవారికి రోడ్లు స్పష్టంగా కనిపిస్తాయి.
* సడెన్‌ బ్రేక్‌లు వేయడం, ఒక్కసారిగా యాక్సిలేటర్‌ పెంచడం.. క్షణాల్లో లేన్‌లు మార్చడం ఇలాంటి సాహసాలు పనికిరావు. ఈ సీజన్‌లో హైడ్రోప్లేనింగ్‌ కారణంగా వాహనాలు జారిపోతూ ప్రమాదాలకు గురవుతుంటాయి. హైవేలు, నీరు నిల్వ ఉన్నచోట్ల వేగం ఎంత తగ్గిస్తే అంత మంచిది.