బయటికెళ్లకుండానే..భలేగా వ్యాయామం!

ఈ కాలంలో ముసురు పడితే.. ఒంటికి పని చెప్పాలనిపించదు. వర్షం పడుతుంటే.. అసలు బయటికెళ్లే అవకాశమే ఉండదు. ఇలాగైతే మనం ఫిట్‌నెస్‌ గోల్‌ చేరేదెలా? అలాంటప్పుడే కుర్రకారు ఇంటినే జిమ్‌గా మార్చేయాలి. ఇదిగో ఇలా..

• నడక.. తేలికైన మంచి వ్యాయామం. టీవీ చూస్తూ, సంగీతం వింటూ, ఫోన్‌ మాట్లాడుతూ.. ప్రతి పని చేస్తూ నడుస్తూనే ఉంటే క్రమం తప్పకుండా వ్యాయామం చేయాలనే కోరిక నెరవేరుతుంది.
• మీలో ఓపిక, ఉత్సాహం ఎక్కువైతే.. ఇష్టమైన పాటలకు స్టెప్పులేయండి. స్కిప్పింగ్‌, జంపింగ్‌ జాక్స్‌, జుంబా.. ఇలాంటివీ ఫిట్‌నెస్‌ని పెంచే వ్యాపకాలే.
• ఇంట్లో స్థలం సరిపోదు అనుకునేవాళ్లు అపార్ట్‌మెంట్‌లో ఖాళీ స్థలం, మెట్లు, షాపింగ్‌ మాల్స్‌, పార్కింగ్‌ స్థలం, కమ్యూనిటీ హాల్‌.. వీటన్నింటినీ కసరత్తుల కార్యక్షేత్రాలుగా మలచుకోవచ్చు.
• బ్యాడ్మింటన్‌, టేబుల్‌ టెన్నిస్‌.. ఇలాంటి ఇండోర్‌ గేమ్స్‌ సైతం మీ ఫిట్‌నెస్‌ వ్రతాన్ని కొనసాగించే కొన్ని ఆటలు.
• ఇల్లు శుభ్రం చేయడం, బట్టలుతకడం... నామోషీగా భావించొద్దు. ఈ పనులు ఒంట్లోని కేలరీలను భారీగా కరిగిస్తాయి. పనులు పూర్తవడంతోపాటు.. ఫిట్‌నెస్‌ ప్రయోజనమూ చేకూరుతుంది.