మనకొద్దు.. లేడీగాగా సమస్య

పాప్‌ సింగర్‌ లేడీ గాగాకి ప్రపంచమంతా అభిమానులే. తను పాడితే కుర్రకారు ఊగిపోతారు. ఆమె ఆడితే అనుసరిస్తూ స్టెప్పులేస్తారు. తన కచేరీ కనీస టికెట్‌ ధర రూ.20వేలతో మొదలై, రూ.4లక్షల వరకు ఉంటుంది. అంతలా కాసులు కురిపించే ఓ కాన్సర్ట్‌ని ఉన్నఫళంగా రద్దు చేసుకుంది లేడీ గాగా. కారణమేంటి అంటే.. ‘ఫైబ్రోమ్యాల్గియా’ అంది. ఆమె పుణ్యాన ఈ పదం ఇప్పుడు జనంలోకి వెళ్లిందిగానీ.. ఈ సమస్య యువ ఉద్యోగుల్లో తీవ్రంగా ఉందంటున్నాయి అధ్యయనాలు. కండరాలు, ఎముకలు, కీళ్లలో విపరీతమైన నొప్పి కలగడమే ఈ ‘ఫైబ్రోమ్యాల్గియా’. దీని కారణంగా ఒంట్లో నిస్సత్తువ.. వేగంగా ఆలోచించ లేకపోవడం.. నరాల బలహీనత.. నిద్రలేమి.. తదితర ఫలితాలుంటాయట. గంటలకొద్దీ కంప్యూటర్లు, సెల్‌ఫోన్లకే అతుక్కుపోవడం.. ఎక్కువసేపు ఒకే పొజిషన్‌లో ఉండటం.. కారణంగానే ఈ సమస్య మొదలవుతుంది అంటున్నారు వైద్య నిపుణులు. పని మధ్యలో ఎక్కువగా విరామం తీసుకోవడం.. పనివేళల్ని తగ్గించుకోవడమే దీనికి పరిష్కారం అంటున్నారు. అయితే కొందరిలో వయసు పెరుగుతున్నకొద్దీ సహజంగానే ఈ సమస్య ఏర్పడుతుందట. దాన్ని ఎలాగూ తప్పించుకోలేంగానీ.. చేజేతులా లేడీ గాగాలా సమస్యని కొని తెచ్చుకోవద్దు. ఏమంటారు గాయ్స్‌!