వాడికి బిల్డప్‌ ఎక్కువ..

కాలేజీ కహానీలు

మా సెకండియర్‌కి, థర్డ్‌ఇయర్‌కీ తరచూ గొడవలే! థర్డ్‌ఇయర్‌కి ఎస్‌ ప్రణీత్‌ నాయకుడు. తనకి తల పొగరు ఎక్కువ. జూనియర్లు అని మమ్మల్ని చులకనగా చూసేవాడు. బిల్డప్‌ ఎక్కువ కావడంతో తనని మేం బిల్డప్‌ ప్రణీత్‌.. బి ప్రణీత్‌ అని పిలిచేవాళ్లం. ఓసారి మేం క్యాంటీన్‌ దగ్గర్లో ఉండగా.. ఒక విద్యార్థి, వాళ్ల నాన్న మా దగ్గరకు వచ్చారు. ఆ పెద్దాయన బ్యాంకు ఉద్యోగి. బదిలీ కావడంతో వాళ్ల అబ్బాయిని మా కాలేజీలో చేర్చడానికి తీసుకొచ్చారట. ఆఫీసు ఎక్కడుందని అడిగారు. మేం దారి చూపిద్దాం అనుకునేలోపే ప్రణీత్‌ వాళ్ల గ్యాంగుతో కనిపించాడు. వెంటనే నాకో ఉపాయం తట్టింది. ‘ఆ గుంపులో బి ప్రణీత్‌ అని ఉంటాడు. వెళ్లి అడిగితే ఆఫీసుకు తీసుకెళ్తాడు’ అని వాళ్లతో చెప్పా. పాపం.. వాళ్లకేం తెలుసు? వెళ్లి ‘బాబూ మీలో బి ప్రణీత్‌ ఎవరు?’ అని అడిగారాయన. వాడికి తిక్కరేగి అరిచేశాడు. మేం నవ్వుకుంటూ అక్కడ్నుంచి వెళ్లిపోయాం.

 ఆర్‌.శ్రీకర్‌, ఇబ్రహీంపట్నం