లవ్‌ జాతకాలు...

రాశి ఏంటో చెబితే ఎవరి జాతకం ఎలా ఉందో చెప్పేస్తారు జ్యోతిష్యులు. ప్రేమ విషయంలోనూ కొన్ని రాశులవారు యమా జోరు మీదుంటారట. ఏంటా కథ? సరదాగా చదివేయండి మరి!

మేషం: ఈ రాశి వాళ్ల గుండె ఉక్కు కన్నా గట్టిదట. ప్రేమ కోసం గోడ దూకడాలు.. వీపు మోత మోగించుకోవడానికైనా సిద్ధంగా ఉంటారట. గుండే కాదు.. వాళ్ల ప్రేమలో గాఢత కూడా ఎక్కువే. జీవితంలో ఒక్కసారైనా డీప్‌గా లవ్‌లో పడిపోతారట.

వృషభం: సున్నిత మనస్కులు. అమ్మాయిలైతే మనసుకి నచ్చినవాడిని రెక్కల గుర్రం ఎక్కి వచ్చిన యువరాజులా భావిస్తారు. అబ్బాయిలు.. ప్రేమించిన అమ్మాయిని గుండెల్లో పెట్టుకొని చూసుకుంటారు. అభిప్రాయాల లోతులు.. ఆలోచనల కలబోతలు అయ్యాకే.. ఆచితూచి ప్రేమలో పడతారట.

వృశ్చికం: కళ్లతోనే చూసి ఎదుటివాళ్ల మనసులో ఏముందో పసిగట్టే బాపతు. మాటలతో మాయచేసి ప్రేమ ముగ్గులోకి దించేస్తారట. ప్రేమలో విఫలమైతే.. ‘లైట్‌ లేలో యార్‌’ అనుకునే రకం. ప్రేమకన్నా ఎక్కువగా రొమాన్స్‌కే జై కొట్టే నైజం వీళ్లది.

సింహం: కళ్లతోనే కనికట్టు చేసే కాన్ఫిడెన్స్‌.. సూదంటు చూపులతో ఆకట్టుకునే ప్రతిభ వీళ్ల సొంతం. ఏకకాలంలో నలుగురితో ప్రేమాయణం నడపగల నేర్పరులు. మనసుకి నచ్చితేచాలు.. ఎందరితో అయినా టపీమని ప్రేమలో పడిపోతారట.

తుల: పదిమందితో మాట కలపడం.. నలుగురిని మోహించడం.. ఒక్కరితో ప్రేమలో పడటం.. ఇదీ వరుస. గాఢ అనుబంధాలైనా.. రొమాంటిక్‌ రిలేషన్‌షిప్‌లు అయినా.. అన్నింటికీ జైకొట్టే అపర ప్రేమికులు. ప్రేమలో పడటం.. అందులోంచి బయట పడటం.. వీళ్లకి కన్ను కొట్టినంత తేలిక.

కుంభం: ఒక్కమాటలో చెప్పాలంటే వీళ్లు ప్రేమకి రోల్‌మోడళ్లు. ఒక్కసారి పడితే మళ్లీ బయటికి రాలేరు. ప్రేమాపెళ్లీ, మనసూజీవితం ఒక్కరితోనే అని నమ్ముతారు. వీళ్లలో రొమాంటిక్‌ పాళ్లూ ఎక్కువే. వీళ్ల జంట మేడ్‌ ఫర్‌ ఈచ్‌ అదర్‌ జంటలా ఉంటుంది.