Earworm: పదేపదే.. వెంటాడే బాణీ

ఎప్పుడో.. ఎక్కడో ఓ పాట వింటాం. అందులోని ఓ ట్యూన్‌ తెగ నచ్చేస్తుంది. లిరిక్‌లోని ఓ పంక్తి మనసులో నాటుకుపోతుంది. ఎక్కడున్నా పదేపదే ఆ బాణీనే చెవుల్లో మోగుతుంది. ఆ లైన్‌ వెంటాడుతూనే ఉంటుంది. గంటలు, రోజులు, ఒక్కోసారి నెలలదాకా! దీన్నే ‘ఇయర్‌ వామ్‌’ అంటున్నారు.

* ఈ ఇయర్‌ వామ్‌ మామూలుగా ఉండదు. మెదడుని తొలిచి, అందులో తిష్ఠ వేసుకొని కూర్చుంటుంది. మాటిమాటికీ తొంగి చూస్తుంటుంది. ఎంతకీ వదలనంటుంది.

* సెల్‌ఫోన్‌లో, రెస్టరంట్‌లో, టీవీలో.. ఎక్కడైనా సరే.. ఆ ట్యూన్‌ ఒక్కసారి మనసుకి నచ్చేసిందా? ఇక అంతే.

* అయితే ఒకే బాణీ అందరికీ ఒకేలా నచ్చాలని నిబంధనేమీ లేదంటారు మానసిక నిపుణులు. వాళ్ల అభిరుచికి అనుగుణంగా ఒక్కొక్కరికి ఒక్కోటి నచ్చుతుంది. ఒక్కసారి నచ్చితే.. మెదడులోని శ్రవణ వల్కలం అనే భాగంలో ఆ ట్యూన్‌ నిక్షిప్తం అవుతుందట.

* ట్యూన్‌లోని స్వర మాధూర్యం, లయ, లిరిక్స్‌లోని ఏదైనా పంక్తి.. అందులో ఏది మనసుకి బాగా నచ్చితే.. అది మెదడు పొరల్లోకి చేరిపోతుందట.

* ఆ ట్యూన్‌ వినగానే మెదడులోని శ్రవణ గ్రంథులు ఉత్తేజం కలిగించే డోపమైన్‌ని విడుదల చేస్తాయి. ఇది మనసుకి ఉల్లాసాన్నిస్తుంది. మళ్లీమళ్లీ అదే బాణీ వినాలనే భావన కలగజేస్తుంది.

* ఇయర్‌వామ్‌ భావన ఏర్పడగానే.. మెదడులోని ఆడిటరీ కోర్టెక్స్‌, ప్రిఫ్రంటల్‌ కోర్టెక్స్‌లు.. ఆ ట్యూన్‌ లేదా లైన్‌ల సంకేతాల్ని చిత్రాల రూపంలో భద్రపరుస్తాయి. వాటిని మళ్లీమళ్లీ మెదడుకి పంపి గుర్తుకొచ్చేలా చేస్తాయి.

దూరమిలా..

ఇయర్‌వామ్‌ పెద్ద అనారోగ్యంగా భావించలేం అంటారు వైద్య నిపుణులు. కాకాపోతే దీనితో ఏకాగ్రతకు భంగం కలుగుతుంది. ఈ ఇయర్‌వామ్‌ భావన ఒక్కోసారి కొన్ని గంటలు, రోజులు ఉంటే.. మరికొన్నిసార్లు నెలలుపాటు మెదడులోనే తిరుగుతూ చికాకు కలిగిస్తుంటుంది. ఇతర పాటలు వినడం, ఏదైనా పనిలో తీరిక లేకుండా ఉండటం.. పుస్తకాలు చదవడం, పజిల్స్‌ పూరించడం.. ఆ ధ్యాసను పోగొడుతుంది. వ్యాయామం, యోగా, ధ్యానం.. సైతం ఇయర్‌వామ్‌కి విరుగుడే