Telangana News: స్విమ్మింగ్‌పూల్‌ స్నానాల గదిలో సెల్‌ఫోన్‌ కెమెరా

సూర్యాపేట నేరవిభాగం, న్యూస్‌టుడే: ఈత కొలను స్నానాల గదిలో సెల్‌ఫోన్‌ ద్వారా రహస్యంగా వీడియో చిత్రీకరించిన ఘటన సూర్యాపేటలో ఆలస్యంగా వెలుగుచూసింది. పోలీసులు తెలిపిన వివరాల ప్రకారం.. సూర్యాపేట జిల్లా చివ్వెంల మండలం కుడకుడ గ్రామ పరిధిలోని ఈత కొలనులో పనిచేసే గుగులోతు మహేశ్‌ అనే యువకుడు స్నానాల గదిలో మంగళవారం తన సెల్‌ఫోన్‌ వీడియో కెమెరాను ఆన్‌చేసి రహస్యంగా ఉంచాడు. అదే రోజు ఇద్దరు యువతులు దుస్తులు మార్చుకుంటుండగా అనుమానంతో పరిశీలించగా.. సెల్‌ఫోన్‌ కనిపించింది. యువతుల తల్లిదండ్రులు బుధవారం రాత్రి పట్టణ పోలీసులకు ఫిర్యాదు చేశారు. ఘటనపై కేసు నమోదు చేసి దర్యాప్తు జరుపుతున్నట్లు పట్టణ ఇన్‌స్పెక్టర్‌ ఆంజనేయులు తెలిపారు.