బైపాస్‌లో రయ్‌..రయ్‌..!

హనుమాన్‌జంక్షన్‌, న్యూస్‌టుడే: ఎట్టకేలకు హనుమాన్‌జంక్షన్‌ బైపాస్‌ అందుబాటులోకి వచ్చింది. 16వ జాతీయ రహదారికి అనుసంధానంగా చేపట్టిన ఈ రహదారి పనులు దాదాపు పూర్తయ్యాయి. కరోనా ప్రభావం, భారీ వర్షాలు, భూ సేకరణలో ప్రతిష్టంభన కారణంగా పనుల్లో వేగం మందగించింది. గతేడాది నాటికి పూర్తి కావాల్సిన నిర్మాణం ఇప్పటివరకు కొన‘సాగుతూ’ వచ్చింది. పనులు కొలిక్కి రావడంతో వేలేరు నుంచి బొమ్ములూరు వరకు బైపాస్‌ మార్గం సిద్ధమైంది. మంగళవారం రాకపోకల్ని ప్రయోగాత్మకంగా ప్రారంభించడంతో వాహనాలు పరుగులు పెడుతున్నాయి.

ఇక నేరుగా..

చెన్నై-కోల్‌కతా మార్గంలో 16వ జాతీయ రహదారిపై ప్రయాణించే వాహనాలు హనుమాన్‌జంక్షన్‌ వద్ద పద్మవ్యూహం లాంటి ట్రాఫిక్‌ రద్దీలో చిక్కుకుపోయేవి. అత్యవసర వాహనాలు మొదలుకుని, ప్రముఖుల వాహనాలు సైతం జంక్షన్‌ కూడలిని దాటుకొని వెళ్లడం ప్రహసనంగా మారింది. సంక్రాంతి, పుష్కరాలు వంటి వేడుకల సమయంలో గంటల కొద్ది ట్రాఫిక్‌ ఆగిపోయేది. ఆ సమస్యకు శాశ్వత పరిష్కారంగా పుష్కర కాలం కిందట బైపాస్‌ రహదారిని ప్రతిపాదించారు. అన్ని అవాంతరాలను అధిగమించి ఎట్టకేలకు ఆరు వరుసల బైపాస్‌ రహదారి అందుబాటులోకి వచ్చింది.

రూపురేఖలు ఇలా...

ప్రారంభం: 1,060 కి.మీ. (వేలేరు) వద్ద

ముగింపు: 1,055 కి.మీ. (రామిలేరు) వద్ద

మొత్తం పొడవు: 6.720 కి.మీ.

పై వంతెనలు-2 ● అండర్‌ పాస్‌లు-2

మైనర్‌ బ్రిడ్జిలు-2

ఏలూరు వైపు వెళ్లే వారికి ఎంట్రీలు-3

విజయవాడ వైపు వెళ్లేవారికి ఎంట్రీలు-4