పార్టీ ఏదైనా టిక్కెట్‌ మంచిరెడ్డికే..

ఇబ్రహీంపట్నం నియోజకవర్గంలో 16 సార్లు ఎన్నికలు జరిగాయి. వరుసగా మూడుసార్లు గెలిచి హ్యాట్రిక్‌ సాధించి నాలుగోసారి పోటీ చేసే అవకాశం మాత్రం మంచిరెడ్డి కిషన్‌రెడ్డికి మాత్రమే దక్కింది. ఏ పార్టీలో ఉన్నా టికెట్‌ కైవసం చేసుకోవడం విశేషం. 2009, 2014 ఎన్నికల్లో తెదేపా అభ్యర్థిగా.. 2018లో తెరాస అభ్యర్థిగా బరిలో నిలిచి గెలుపొందారు. 2023 ఎన్నికల్లో భారాస అభ్యర్థిగా పోటీలో ఉన్నారు. అంతకుముందు 1957, 1962, 1967 ఎన్నికల్లో ఎంఎన్‌ లక్ష్మీనర్సయ్య(కాంగ్రెస్‌) విజేతగా నిలిచి హ్యాట్రిక్‌ సాధించారు. పంచాయతీరాజ్‌, రవాణాశాఖ మంత్రిగా పనిచేశారు. నాలుగోసారి కూడా కాంగ్రెస్‌ పార్టీ అతనికే టికెట్‌ కేటాయించి.. చివరి నిమిషంలో అనంతరెడ్డిని రంగంలోకి దించడంతో లక్ష్మీనర్సయ్య పోటీ నుంచి తప్పుకున్నారు. ఏజీ కృష్ణ, కొండిగారి రాములు రెండేసి సార్లు ఎమ్మెల్యేలుగా పనిచేశారు.

న్యూస్‌టుడే, యాచారం