యథేచ్ఛగా మట్టి దందా

యల్లారెడ్డిగూడెంలో సోమ సముద్రం చెరువు నుంచి జేసీబీ సహాయంతో మట్టిని తరలిస్తున్న చిత్రం

నార్కట్‌పల్లి గ్రామీణం, న్యూస్‌టుడే: నార్కట్‌పల్లి మండలంలో మట్టి దందా యథేచ్ఛగా సాగుతోంది. గోపలాయపల్లి, యల్లారెడ్డిగూడెంలోని చెరువులు, బ్రాహ్మణవెల్లంల ప్రాజెక్ట్‌ కాల్వల మట్టిని అక్రమంగా ఇటుక బట్టీలకు, వెంచర్లకు తరలిస్తున్నారు. మట్టి తవ్వకాలతో ఏర్పడిన పెద్దగుంతలు ప్రమాదకరంగా మారాయి. దీనికితోడు గ్రామాల్లో బోర్లు, బావులు సైతం భూగర్భ జలాలు అడుగంటుతున్నాయి. కొందరు ఎలాంటి అనుమతి లేకుండా జేసీబీల సహాయంతో మట్టి తవ్వి ట్రాక్టర్ల ద్వారా తరలిస్తున్నారు. ఒక్కో ట్రాక్టర్‌కి రూ.750 నుంచి రూ.1000 వరకు వసూలు చేస్తున్నారు. అక్రమంగా తీసుకొచ్చిన మట్టిని కట్టంగూర్‌, నార్కట్‌పల్లి, నల్గొండ, చిట్యాలలోని ఇటుక బట్టీలకు, వెంచర్లకు తరలిస్తున్నట్లు సమాచారం. మట్టిని తరలించాలంటే మైనింగ్‌, ఐబీ అధికారుల నుంచి అనుమతి పొందాలి. ఎలాంటి అనుమతులు లేకుండానే రాత్రింబవళ్లు మట్టిని తవ్వి ట్రాక్టర్ల ద్వారా రవాణా చేస్తున్నారు. దుమ్ము, ధూళితో స్థానికులు ఇబ్బందులు పడుతున్నారు. దీనికి తోడు మట్టి తవ్వకాలతో ఏర్పడుతున్న గుంతలతో ప్రమాదం జరిగే అవకాశముంది. సంబంధిత అధికారులు మట్టి దందాను అరికట్టాలని గ్రామస్థులు కోరుతున్నారు.

అనుమతి ఇవ్వలేదు

రమా, ఐబీ ఏఈ

ఆ గ్రామాల్లో చెరువులు, కాల్వ నుంచి మట్టి, మొరం తరలించేందుకు ఎవరికి అనుమతి ఇవ్వలేదు. అనుమతి లేకుండా మట్టి తీసుకెళ్లవద్దు. ఈ విషయం మా దృష్టికి రాలేదు. వెంటనే పరిశీలించి మట్టి తరలిస్తున్న వారిపై చర్యలు తీసుకుంటాం.