కరదీపిక.. సందేహాల నివృత్తికి వేదిక

సూర్యాపేటలో శిక్షణ పొందుతున్న అధికారులు

భానుపురి, న్యూస్‌టుడే: ఎన్నికల నిర్వహణలో పోలింగ్‌ విధులు నిర్వర్తించే అధికారుల పాత్ర కీలకం. ఉమ్మడి నల్గొండ జిల్లాలో నల్గొండ, భువనగిరి లోక్‌సభ నియోజకవర్గాల్లో నామపత్రాల స్వీకరణ నుంచి ఫలితాలు వెల్లడి చేసే వరకు అధికారులు, పోలింగ్‌ సిబ్బంది సమన్వయంతో పనిచేసినప్పుడే ఎన్నికల ప్రక్రియ విజయవంతమవుతుంది. ఏ చిన్న పొరపాటు జరిగినా ఎన్నికల నిర్వహణపై ప్రభావం చూపుతుంది. దీంతో కేంద్ర ఎన్నికల సంఘం ప్రత్యేక సూచనలతో కరదీపికలను రూపొందించింది.

మొదటి శిక్షణ పూర్తి

ఎన్నికల అధికారులు, సిబ్బందికి పోలింగ్‌ నిర్వహణపై మూడు విడతల్లో ప్రత్యేక శిక్షణ ఇస్తుండగా.. ఇప్పటికే మొదటి దశ పూర్తయింది. పోలింగ్‌ సమయంలో ప్రిసైడింగ్‌ అధికారి(పీవో), సహాయ ప్రిసైడింగ్‌ అధికారి(ఏపీవో), ఇతర పోలింగ్‌ అధికారులు (ఓపీవో) తమ బాధ్యతలను సక్రమంగా నిర్వహించాల్సి ఉంటుంది. పోలింగ్‌ ముందు రోజు ఎన్నికల సామగ్రి తీసుకోవటం నుంచి మొదలు పోలింగ్‌ కేంద్రానికి చేరుకున్న తర్వాత అక్కడ ఏర్పాట్లు, ఏజెంట్లకు గుర్తింపు కార్డులు ఇవ్వటం, మాక్‌ పోలింగ్‌కు సకాలంలో హాజరయ్యేలా సూచనలు చేయాల్సి ఉంటుంది. పోలింగ్‌రోజు ముందస్తుగా ఏజెంట్ల సమక్షంలో మాక్‌ పోలింగ్‌ నిర్వహించి ఈవీఎంల పని తీరుపై ఉన్న అనుమానాలు నివృత్తి చేస్తారు. పోలింగ్‌ ప్రక్రియ ముగిసిన తర్వాత ఈవీఎంలతోపాటు పోలింగ్‌ సామగ్రిని అధికారులకు అందించే వరకు సిబ్బంది సమన్వయంతో చేపట్టాల్సిన విధులపై ప్రత్యేక శిక్షణ ఇస్తున్నారు.

చేయాల్సినవి.. చేయకూడనివి

అధికారులకు ప్రత్యేక శిక్షణ ఇస్తున్నా అక్కడక్కడ పొరపాట్లు చోటుచేసుకుంటున్నాయి. దీంతో ఈసారి ఎన్నికల విధుల్లో చేయాల్సినవి.. చేయకూడనవి పేరుతో ప్రత్యేక పుస్తకాలు అందజేశారు. ఈ కరదీపికల్లో ప్రధానంగా పంపిణీ(డిస్ట్రిబ్యూషన్‌) కేంద్రం, పోలింగ్‌ కేంద్రం వద్ద ఏర్పాట్లు, మాక్‌ పోలింగ్‌ తర్వాత పోలింగ్‌ ప్రారంభం, ముగింపు బ్యాలెట్‌ యూనిట్‌, వీవీ ప్యాట్‌, కంట్రోల్‌ యూనిట్‌ విషయంలో తీసుకోవాల్సిన జాగ్రత్తలు, సీల్‌ చేసే విధానం తదితర అంశాలపై పొరపాట్లకు తావు లేకుండా విధులు నిర్వహించటంపై పుస్తకాలు తయారు చేశారు. ఈ కరదీపికలు ఇప్పటికే పీవో, ఏపీవోలకు అందజేశారు.

మరింత సులభతరం

ఎన్నికల సంఘం రూపొందించిన చెక్‌లిస్ట్‌ కరదీపిక

ఎన్నికల విధుల్లో ఎలాంటి సమస్యలు ఎదురుకాకుండా ఉండేందుకు చెక్‌లిస్ట్‌ పేరుతో మరో పుస్తకాన్ని అందజేశారు. పీవో, ఏపీవోలకు పోలింగ్‌ నిర్వహణ సమయంలో ఏదైనా చిన్న సందేహం వచ్చినా గతంలో కరదీపికలోనే వివరాలు ఉండటంతో పుస్తకం మొత్తం తిరిగేయడానికి ఎంతో ఇబ్బందిపడేవారు. ప్రస్తుతం చెక్‌లిస్ట్‌ పుస్తకాన్ని విడిగా తక్కువ సమాచారంతో ఇవ్వడంతో సులభంగా అనుమానాలను నివృత్తికి వెసులుబాటు ఏర్పడింది. ఈ పుస్తకంలో సందేహాల నివృత్తికి అవసరమైన పేజీని తెరచి చదువుకోవచ్చు.