గుంతల రోడ్లు... పూడిన కాలువలు

రాళ్లుతేలి అధ్వానంగా ఉన్న సీసీ రోడ్డు

ఉదయగిరి, న్యూస్‌టుడే: షబ్బీర్‌ కాలనీలో సీసీ రోడ్లు రాళ్లు తేలడటంతో చీకటిలో నడవాలంటే ఎక్కడ అదుపుతప్పి పడిపోతామోనని ఆందోళన చెందుతున్నారు. మురుగు కాలువలు చెత్తతో నిండినా సిబ్బంది శుభ్రం చేయటంలేదని స్థానికులు అసహనం వ్యక్తం చేస్తున్నారు.

• దిలావర్‌భాయ్‌వీధిలో మురుగు వ్యవస్థ సరిగా లేదు. ఇళ్ల ముందు రోడ్లపై మురుగు ప్రవహిస్తుండటంతో రాకపోకలకు స్థానికులు తంటాలు పడుతున్నారు. మురుగు నిలిచి దుర్వాసన వస్తోంది.
• నాగులబావి, అగ్రహారం వీధుల్లో సీసీ రోడ్లు గుంతలు పడి ప్రమాదకరంగా ఉన్నాయి. డ్రైనేజీ చెత్తాచెదారాలతో నిండి రోడ్లపై ప్రవాహం సాగుతోంది. పంచాయతీ ద్వారా నీటి సరఫరా నిత్యం అందుబాటులోఉండటంలేదు. కోళ్ల, సుద్దబావి వీధుల్లో సైతం డ్రైనేజీ సరిగా లేదు.
• చెత్త నిర్వహణ లేక రోడ్ల పక్కన, జనావాసాల మధ్య చెత్త నిల్వలు పేరుకుపోతున్నాయి. చెత్తకుండీలు ఏర్పాటు చేయలేదు.

పక్కకాలువలు లేవు  - షరీఫ్‌

పట్టణంలో పక్క కాలువలు సరిగా లేవు. దీంతో మురుగు రోడ్లపై ప్రవహిస్తోంది. కాలువల్లో పూడిక, చెత్తాచెదారాలు పేరుకుపోయాయి. చెత్త వేసేందుకు వీధుల్లో కుండీలు లేవు. పాలకులు, అధికారులు చర్యలు తీసుకొని డ్రైనేజీ వ్యవస్థ మెరుగుపరచాలి.

రోడ్లు అధ్వానం  - మహమ్మద్‌ షఫీ

పట్టణంలో సీసీ రోడ్లు రాళ్లు తేలి, గుంతలతో ప్రమాదకరంగా మారాయి. వాటిపై రాకపోకలు సాగించలేకపోతున్నాం. దెబ్బతిన్న రోడ్లను బాగుచేసి ఇబ్బంది లేకుండా చర్యలు తీసుకోవాలి.

ప్రాంతాలు: దిలావర్‌భాయ్‌ వీధి, అగ్రహారం, షబ్బీర్‌ కాలనీ, నాగులబావి వీధి, సుద్దబావి వీధి, కోళ్ల వీధి
సమస్యలు: తాగునీరు, పారిశుద్ధ్యం, అధ్వానపు రోడ్లు, అస్తవ్యస్తంగా మురుగు కాలువ వ్యవస్థ
పంచాయతీ: ఉదయగిరి
వార్డులు: 10, 11, 12, 13
జనాభా: సుమారు 4,106