గోపాల్‌పూర్‌లో ముఖాముఖి పోరు

స్థానిక సమస్యలే ప్రచారాస్త్రాలు

కమలాపురంలో తెలుగు పెద్దల సభలో మాట్లాడుతున్న బిక్రం పరిడ

గోపాలపూర్‌, న్యూస్‌టుడే: ప్రతిష్ఠాత్మక గోపాల్‌పూర్‌ అసెంబ్లీ నియోజకవర్గంలో బిజద, భాజపా అభ్యర్థుల మధ్య ఎన్నికల పోరు రసవత్తరంగా కనిపిస్తోంది. ఇక్కడ కాంగ్రెస్‌ నిలబెట్టిన శ్యాంసుందర్‌ సాహు పోటీ నామమాత్రంగా ఉండగా, బిక్రం పండా (బిజద), బిభూతి భూషణ జెనా (భాజపా) పోటీ నువ్వా?నేనా? అన్న రీతిలో ఉంది.

దివ్యాంగునికి ఓటు అర్థిస్తున్న బిభూతి భూషణ్‌ జెనా

మత్స్యకారులే నిర్ణయాత్మకం..: గోపాల్‌పూర్‌లో అభ్యర్థుల విజయానికి మత్స్యకారులు నిర్ణయాత్మకమవుతున్నారు. వారు అనేక సమస్యలు ఎదుర్కొంటున్నారు. ప్రతిసారి ఎన్నికల్లో ప్రధాన పార్టీల నేతలు హామీలిచ్చి అధికారంలోకి వచ్చిన తర్వాత విస్మరిస్తున్నారు. ఈసారి గంగపుత్రులను తమవైపునకు తిప్పుకోవడానికి బిజద, భాజపా అభ్యర్థులిద్దరూ సర్వశక్తులు ఒడ్డుతున్నారు. ప్రచారం ముమ్మరం చేశారు. దీంతో తీర పట్టణంలో ఎన్నికల వేడి తీవ్రమైంది.