Snake Bite: రెప్పపాటులో తప్పిన ప్రమాదం

కార్వార, న్యూస్‌టుడే : పాములతో చెలగాటం ఎంతటి ప్రమాదకరమో ఇటీవల కార్వార జిల్లా శిరసి తాలూకాలోని దేవరహొళె గ్రామంలో సంభవించినట్లుగా చెబుతున్న సంఘటన వైరల్‌గా మారింది. అక్కడి మేజ్‌ సయీద్‌ అనే యువకుడు ఏకంగా మూడు నాగు పాముల్ని నియంత్రించేందుకు చేసిన ప్రయత్నంలో ఓ పాము మోకాలి వద్ద కాటేసింది. రెప్పపాటులో అప్రమత్తం కావడంతో పాము కాటు ప్యాంట్‌కు మాత్రమే పరిమితమైంది. పాములతో చెలగాటం ఏమాత్రం మంచిది కాదనేందుకు ఈ సంఘటన ఓ ఉదాహరణగా స్థానికులు పేర్కొన్నారు. పాము కాటు వేసిందని తెలియగానే వెంటనే ఆసుపత్రికి తరలించారు. ఆయనకెలాంటి ప్రమాదం లేదని వైద్యులు తెలిపారు. ఓ యు-ట్యూబ్‌ ఛానల్‌ కోసమే ఇలాంటి సాహసానికి పాల్పడినట్లు తెలిసింది. ఈనెల 13న ఈ సంఘటన సంభవించినట్లుగా చెబుతున్నారు.