విజయవాడ: రాష్ట్ర డీజీపీ రాజేంద్రనాథ్‌ రెడ్డిని విధుల నుంచి తప్పించాలని ఎన్నికల ప్రధానాధికారికి తెలుగుదేశం పార్టీ నేతలు ఫిర్యాదు చేశారు. అనంతరం తెదేపా నేత వర్ల రామయ్య మాట్లాడుతూ.. సీనియర్లను పక్కనపెట్టి ఆయనకు ఇన్‌ఛార్జ్‌ డీజీపీ బాధ్యతలు అప్పగించారని అభ్యంతరం వ్యక్తం చేశారు. డీజీపీని బదిలీ చేయాలని ఎన్నికల కమిషన్‌ను కోరినట్లు తెలిపారు.

‘‘జగన్‌ ప్రచార బస్సు డోర్‌ వద్ద ఉండాలని డీజీపీ ఎస్పీలకు చెప్పడం శోచనీయం. భద్రత పెంచితే సరిపోతుంది.. బస్సు డోర్‌ వద్ద ఉండాలని చెప్పడమేంటి? రాజేంద్రనాథ్‌రెడ్డి ఎన్నికలు సజావుగా నిర్వహించగలరా అన్నదే మా అనుమానం. కడప, పులివెందులలో ఎన్నికలు సజావుగా జరగాలి. కడపలో పోటీ చేస్తున్న షర్మిలకు, ప్రచారం చేస్తోన్న సునీతకు రక్షణ కల్పించాలి. రాజేంద్రనాథ్‌రెడ్డిని మార్చకపోతే కేంద్ర బలగాలకు బాధ్యతలు అప్పగించాలి’’అని వర్ల కోరారు.