Viveka Murder Case: వివేకా కుమార్తె సునీత, అల్లుడు రాజశేఖర్‌రెడ్డిపై కేసు నమోదు

అమరావతి: మాజీమంత్రి వైఎస్‌ వివేకానందరెడ్డి(YS Viveka) కుమార్తె సునీత, అల్లుడు రాజశేఖర్‌రెడ్డిపై కేసు నమోదయ్యింది. వివేకా పీఏ కృష్ణారెడ్డి ఫిర్యాదు మేరకు సునీత, రాజశేఖర్‌రెడ్డి, సీబీఐ ఎస్పీ రామ్‌సింగ్‌పై పులివెందుల పట్టణ పోలీసులు కేసు నమోదు చేశారు. ఈ నెల 15న పులివెందుల పోలీస్‌ స్టేషన్‌లో ఈ ముగ్గురిపై కృష్ణారెడ్డి ఫిర్యాదు చేశారు. ముగ్గురిపై చర్యలు తీసుకోవాలని కోరుతూ పులివెందుల కోర్టులో 2021 ఫిబ్రవరిలో పీఏ కృష్ణారెడ్డి పిటిషన్‌ దాఖలు చేశారు. వివేకా హత్య కేసు(YS Viveka Murder Case) విచారణ సమయంలో సీబీఐ ఎస్పీ రామ్‌సింగ్‌ తనను వేధించారని కృష్ణారెడ్డి పిటిషన్‌లో పేర్కొన్నారు. సునీత, రాజశేఖర్‌ చెప్పినట్లు వ్యవహరించాలని రామ్‌సింగ్‌ బెదరించారన్నారు. కృష్ణారెడ్డి పిటిషన్‌పై విచారణ జరిపిన పులివెందుల కోర్టు.. చర్యలు తీసుకోవాలని పోలీసులను ఆదేశించింది. దీంతో కోర్టు ఆదేశాల మేరకు పోలీసులు ముగ్గురిపై కేసు నమోదు చేశారు.