Chandrababu Arrest: చంద్రబాబుకు మద్దతుగా కూకట్‌పల్లిలో నిరసనలు

హైదరాబాద్‌: తెదేపా అధినేత చంద్రబాబు అరెస్టును ఖండిస్తూ శనివారం కూకట్‌పల్లి బాలాజీనగర్‌లో ఐటీ ఉద్యోగులు నిరసన కార్యక్రమం చేపట్టారు. ఈ కార్యక్రమంలో తెలంగాణ తెదేపా ఉపాధ్యక్షురాలు నందమూరి సుహాసిని పాల్గొని ఐటీ ఉద్యోగులకు సంఘీభావంగా రోడ్డుపై ధర్నా నిర్వహించారు. ఈ సందర్భంగా ఆమె మాట్లాడుతూ.. 42 ఏళ్ల రాజకీయ అనుభవం కలిగిన చంద్రబాబు ఏనాడూ అవినీతికి పాల్పడలేదని, రాజకీయ కక్షతోనే ఆయనను జైలుకి పంపించారని అన్నారు. చంద్రబాబుపై పెట్టిన కేసులను ఎత్తివేయాలని డిమాండ్ చేశారు. ఐటీ అభివృద్ధికి చంద్రబాబు నాయుడే కారణమని, ఆయన వల్లే ఎంతో మందికి ఉపాధి అవకాశాలు లభించాయని తెలిపారు. అలాంటి వ్యక్తిని అరెస్టు చేయడం సరికాదన్నారు. చంద్రబాబు విడుదల అయ్యే వరకు నిరసన కార్యక్రమాలు నిర్వహిస్తామని సుహాసిని స్పష్టం చేశారు.