జమ్మూకశ్మీర్‌లో బస్సు పేలుళ్లు

ఉలిక్కిపడ్డ ఉధంపుర్‌

జమ్ము/ఉధంపుర్‌: జమ్మూకశ్మీర్‌లోని ఉధంపుర్‌ నగరంలో కొన్ని గంటల వ్యవధిలో జరిగిన జంట పేలుళ్లతో భద్రతా దళాలు అప్రమత్తమయ్యాయి. నిలిపి ఉంచిన బస్సుల్లో జరిగిన ఈ పేలుళ్లతో ఎవరికీ ప్రాణాపాయం లేకున్నా, ఇద్దరు వ్యక్తులు గాయపడ్డారు. నగరంలోని దోమేల్‌ కూడలి వద్ద ఉన్న పెట్రోలుబంకు సమీపంలో పార్కింగు చేసిన ఓ బస్సులో బుధవారం రాత్రి తొలి పేలుడు జరిగింది. ఈ ఘటనలో ఇద్దరు వ్యక్తులు గాయపడ్డారు. గురువారం ఉదయం 5.30 ప్రాంతంలో స్థానిక బస్‌స్టాండులో నిలిపి ఉంచిన నైట్‌హాల్టు బస్సులో రెండో పేలుడు జరిగింది. ఈ సారి ఎవరూ గాయపడకపోయినా.. పేలుడు ధాటికి బస్సు టాపు, వెనుక భాగం ఊడిపడ్డాయి. ఉధంపుర్‌ - రియాసీ రేంజి డీఐజీ సులేమాన్‌ చౌధరి మాట్లాడుతూ.. ‘ఉగ్రవాద కోణాన్ని కాదనలేం. విచారణ కొనసాగుతోంది’ అని తెలిపారు. అక్టోబరు తొలివారంలో కేంద్ర హోం మంత్రి అమిత్‌ షా పర్యటన ఉన్న నేపథ్యంలో జరిగిన ఈ పేలుళ్లతో జనం ఉలిక్కిపడ్డారు. ఉధంపుర్‌, జమ్ము జిల్లాల్లో ప్రజలు పాకిస్థాన్‌ వ్యతిరేక ప్రదర్శనలతో రాస్తారోకోలు నిర్వహించారు. కాంగ్రెస్‌, శివసేన పార్టీలతోపాటు భజరంగ్‌ దళ్‌, డోగరా ఫ్రంట్‌ ఈ పేలుళ్లను ఖండించాయి.